I. Korinth 4 - Dakota Wowapi Wakan Kin

¹ Wicaśta kin kaken ecanunkinpi kta, Messiya iwicadake cin qa Wakantanka tawowiyukcan awanyakapi kin heuncapi.

² Nakun tona waawanyakapi un kin hena owotanna oḣanyanpi kta iyececa wicadakapi ece.

³ Tuka mayadacopi, qa wicaśta akantu mayacopi eśta, he taku śni wadaka; qa nakun mihdaco śni.

⁴ Miye cinka takudan sdonwakiye śni, tuka heon owotanna mihdawa śni; tuka tuwe mayukcan kin Itancan kin hee.

⁵ Hecen iyehantu śni kin itokam takudan yacopi śni po, Itancan kin he hi śni kin hehanyan; he iye kin taku otpaza en naḣmanpi qon aiyoyam ye kta, qa wicocante awacinpi kin yuatanin kta; unkan hehan otoiyohi Wakantanka eciyatanhan idowanpi kta.

⁶ Mihunkawanji, niyepi on etanhan hena hecen Apolos kici miye imihdacin; hecen unkiyepi kin on wowapi en kagapi kin isanpa kecanwicayakinpi kte śni onnispepi kta, qa hecen otoiyohi on waḣannic̣idapi kte śni.

⁷ Tuwe hecen iyotan nicaga he; qa taku nic̣upi śni kin tukte e duha he. Qa nic̣upi kinhan tokeca nic̣upi śni kin iyecen on iniwinkta he.

⁸ Nakaha winipipi; nakaha winijicapi; unkiyepi unkicunonpa tanhan wicaśtayatapi yaunpi: Unkan wicaśtayatapi yaunpi wacin, hecen niyepi kici wicaśtayatapi unyakonpi kta tuka.

⁹ Miś kaken wacin mduza; Wakantanka yewicaśipi unkiyepi kin ehake taninyan eunhdepi, wiconṭe iyacopi kin iyececa; hecen wicoicage qa maḣpiya ohnihde cin, qa wicaśta kin en woiwanyakekin he unkiyepi kta.

¹⁰ Messiya on wiuntkotkopika, tuka niye Messiya en yaksapapi. Unkiye waunśakapi śni, tuka niye waniśakapi. Unkiye unyuonihanpi śni, tuka niye niciniḣanpi.

¹¹ Qa nakun anpe dehan wotekteunhdapi, qa iunpuzapi, qa tancounkapidan, qa unkaśtakapi, qa tuktedan tinsadan unyakonpi śni;

¹² Qa ḣununkiṭapi, unnapepi kin on ḣtaunnipi. Unkaiapi keś wicunyawaśtepi; śicaya unkuwapi keś wacin untankapi;

¹³ Unyaśicapi keś ceunkiyapi ece. Wicoicage en watuśekśeca kin iyecen unkagapi, qa anpe dehanyan taku owasin etanhan taku kahin eḣpeyapi kin hecen unyawapi ece.

¹⁴ Iśtenciyapi kta heon hena hecen wowapi wakage śni, tuka micinca waśte wicawakidake cin iyecen wahokonciciyapi.

¹⁵ Messiya en waonspekiyapi kektopawinge wikcemna duhapi eśta, ateyapi ota duhapi śni; Jesus Messiya en wotanin waśte on cinca cicagapi.

¹⁶ Heon etanhan ceciciyapi ce, ecen omicipa po.

¹⁷ Heon niyepi kin ekta Timotheos ye waśi, he nakun micinca hokśincantkiyapi, qa Itancan kin en wacinyepica, he mitacanku Messiya en un kin kiksuye niyanpi kta, ohinniyan okodakiciye otoiyohi en waonspewakiye cin iyececa.

¹⁸ Ekta ciupi kte śni se ececa, heon wanjikśi waḣanḣanic̣idapi.

¹⁹ Tuka ecadan ekta ciupi kta, Itancan kin iyokipi kinhan, qa tona waḣanic̣idapi token eyapi kin hee śni, tuka taku okihipi kin he sdonwaye kta.

²⁰ Wakantanka tokiconze kin he wicoie en ahe śni, tuka wowaśake en han.

²¹ Cansakadan yulia ekta ciupi kta, qa iś wacantkiyapi cante aḣbayedan ko hduha wau kta, unma tukte yacinpi he.