I. Korinth 3 - Dakota Wowapi Wakan Kin

¹ Unkan mihunkawanji, miś wicaśta wakanpi kin iyecen ociciyapi kta owakihi śni, tuka wicaceḣpi wicaśta kin heca, qa Messiya en hokśiyopa kin iyececa.

² Pteasanpi yatke ciciyapi, qa waconica kin he cic̣upi śni; he ehan nahaḣin he oyakihipi śni, qa dehan nahaḣin nakun oyakihipi śni.

³ Nahaḣin wicaceḣpi wicaśta kin henicapi. Niyepi ekta wipawizipi, qa wakinicapi, qa yuomdecapi yukan hecinhan, wicaceḣpi kin henicapi, qa wicaśta akantu iyecen mayanipi śni he.

⁴ Wanji, Palos opeya waun, qa wanji iś, Apolos opeya waun, eye cinhan, wicaceḣpi wicaśta kin henicapi śni he.

⁵ Palos he tuwe, qa Apolos he tuwe he; wowidake unpi kin hecapi, on wicayadapi, otoiyohi Itancan kin wicaqu kin iyececa.

⁶ Miye wowaju, Apolos mini akaśtan, qa Wakantanka icaḣya.

⁷ Tuwe woju kin he taku śni, qa tuwe mini akaśtan kin kin he nakun, tuka Wakantanka waicaḣye cin hee tanka.

⁸ Tuwe woju qa tuwe mini akaśtan kin hena okonwanjipidan; otoiyohi iye toḣtani kin iyacinyan iyunwin icupi kta.

⁹ Wakanṭanka kici ḣtanipi kin hena unkiyepi; Wakantanka tamaga, qa Wakantanka tipi kage cin he niyepi.

¹⁰ Wakantanka towaonśida maqupi kin eciyatanhan wicaśta ticaga ksape cin iyecen, taku ahehde kin ewahde, qa he akan wicaśta tokeca tipi kaga; tuka otoiyohi token ticage cin he on waktaya un kte.

¹¹ Tuka ahehde kin tokeca tuwedan ehde kta okihi śni, taku ehdepi kin hecedan, Jesus Messiya hee.

¹² Unkan tuwe ahehde kin de akan mazaskazi, qa mazaska, qa inyan okitanin, qa can, qa peji, qa cedi en kage cinhan,

¹³ Otoiyohi oḣan kin atanin kta; anpetu kin he yuotanin kta, peta on yuotaninyan aye kta; qa peta kin otoiyohi oḣan kin he taku kin iyukcan kta.

¹⁴ Tuwe ticage cin en oḣan kin sutaya un kinhan he wokajuju icu kta.

¹⁵ Qa tuwe oḣan kin ḣuḣnage cinhan he iwaḣpanice kta, tuka iyeqe peta kin etanhan iyecen niyanpi kta.

¹⁶ Wakantanka tipi tawa kin he niyepi, qa Wakantanka Taniya kin onitipi kin he sdonyakiyapi śni he.

¹⁷ Tuwe Wakantanka ti kin aśamye cinhan he Wakantanka ihangye kta. Wakantanka ti kin he wakan, qa he niyepi.

¹⁸ Ihnuhan tuwe ic̣ihnaye cinhan. Tuwe niyepi ekta wicoicage kin de en ksapeic̣ida kin he witkotkoke ic̣icaga nunwe; hecen ksape kta.

¹⁹ Wicoicage kin de en taku woksape kin he Wakantanka witkotkoke daka. Kaken wowapi en kagapi; Wicaśta ksape cin hena iye wohnaye tawapi kin on wicayuza ece.

²⁰ Qa ake, Wicaśta ksape cin tawacinpi kin hena taku śni e, Itancan kin sdonya ce.

²¹ Hecen tuwedan wicaśta kin on iwinkta kte śni. Taku owasin nitawapi.

²² Palos, qa Apolos, qa Inyan, qa wicoicage kin, qa wiconi, qa wiconṭe, qa taku nakaha un kin, qa taku u kte cin hena owasin nitawapi;

²³ Qa Messiya tawa niyanpi, qa Wakantanka Messiya tawa ya.