I. Korinth 2 - Dakota Wowapi Wakan Kin

¹ Unkan mihunkawanji, ekta ciipi qehan, wicoie qa wicoksape oiyokipi kin yuha wai śni, tuka Wakantanka tawoyatanin kin ociciyakapi.

² Niyepi kin ekta takudan sdonwaye kte śni e mic̣iconza, Jesus Messiya hecedan, qa he cansusbeca kin en okatanpi.

³ Unkan waśake śni, wokokipeya nina macancan cicipi waun.

⁴ Qa mioie, qa womdake cin hena wicaśta toksape wicoie oiyokipi kin en un śni, tuka Woniya wayuotanin, qa wowaśake kin en un.

⁵ Hecen wicayadapi kin he wicaśta wicoksape tawa kin en ahe kte śni, tuka Wakantanka townśake kin en.

⁶ Tuka tona ksapapi kin hena ekta woksape unkoyakapi ece; tuka wicoicage kin de en wicoksape kin hee śni, qa wicoicage kin de en wicaśtayatapi toksape kin hee śni, hena atakuni śni aya.

⁷ Tuka wowiyukcan en Wakantanka toksape kin he unkoyakapi ece; eqe naḣmanpi qon, woicage śni itokam wowitan unkitawapi kte cin heon, Wakantanka wakiconze ciqon.

⁸ He wicoicage kin de en wicaśta itancanpi kin tuwedan sdonye śni; sdonyapi unkanś Wowitan Itancan kin cansusbeca en okatanpi kte śni tuka.

⁹ Tuka wowapi qon iyececa; Tona Wakantanka waśtedakapi kin taku wicakiciyuśtan kin he wiciśta kin tohinni wanyake śni, qa wicanoge on naḣonpi śni, qa wicaśta cante kin mahen iyoḣpaye śni.

¹⁰ Tuka hena Wakantanka iye Taniya kin eciyatanhan unkokiyakapi; Woniya kin he taku owasin iyukcan, Wakantanka wośbe tawa kin sdonya.

¹¹ Wicaśta kin ekta tuwe taku wicaśta tawa kin sdonya he, wicaśta taniya iye mahen un kin hee sdonkiya. He iyecen taku Wakantanka tawa kin tuwedan sdonye śni, tuka Wakantanka Taniya kin hecedan.

¹² Unkan unkiye wicoicage kin de en wicoksape kin he unkicupi śni; tuka Wakantanka eciyatanhan Woniya Wakan kin he unkicupi, hecen taku Wakantanka iyunwin codan unqupi kin hena sdonunyanpi kta.

¹³ Qa hena unkoyakapi, wicaśta wicoksape woonspe wicoie kin eciyatanhan śni, tuka Woniya Wakan woonspe tawa kin eciyatanhan, hecen wicoie wakan kin wicaśta wakan iyukcanwicunyanpi ece.

¹⁴ Tuka wicaceḣpi wicaśta kin he Wakantanka Taniya taku tawa kin icu śni, hena taku witkotkoke dake c̣a okaḣniga okihi śni, hena wakanyan iyukcanpi nakaeś.

¹⁵ Tuka tuwe wakanyan un kin he taku owasin iyukcan, tuka iye kin tuwedan on yukcanpi śni.

¹⁶ Itancan tawacin kin tuwe he iyukcan he, hecen onspekiye kta. Tuka unkrye Messiya tawacin kin unhapi.