I. Korinth 16 - Dakota Wowapi Wakan Kin

¹ Wicaśta owotanna un kin hena taku wicakicamnanpi kte cin, token Galatia ekta okodakiciye kin econ wicawaśi qon, he iyecen niś econ po.

² Anpetu tokaheya kin en niyepi otoiyohi token oyakihipi kin, iyacinyan eyahnakapi kta, hecen wau kinhan, wamnayanpi wanice kta.

³ Qa wau kinhan, tona wowapi on wicayakaḣnigapi kin, hena wicaqupi nitawapi kin he Jerusalem ekta aye wicawaśi kta.

⁴ Qa miye ekta mde kte cin he waśte kta naceca hecinhan hena om mde kta.

⁵ Unkan Makedonia opta mde cinhan, hehan ekta ciupi kta: qa Makedonia opta mde kte cin he hecetu.

⁶ Qa okinni cicipi waun kta, han, waniyetu ihunniwaye kta naceca; hecen hetanhan tokiya mde cinhan niye amayadapi kta.

⁷ Nakaha tahepi wanciyakapi kte śni, tuka Itancan kin iyokipi kinhan, cicipi owanji manke kta wacanmi.

⁸ Tuka anpetu iwikcemna zaptan kin hehanyan Ephesos en owanjidan manke kta.

⁹ Tiyopa tanka wawokihi kin makiyuḣdokapi, qa tona wakinicapi kin hena ota.

¹⁰ Unkan Timotheos ekta i kinhan, kokipeśniyan en niunpi kta e akita po: He nakun miye ecamon kin iyecen Itancan to ḣtani kin econ ece.

¹¹ Heon tuwedan iḣaḣa kte śni; tuka wookiye yuha au po, ekta mahiyu kta; he hunkawanjin kiciyapi kin om u kta ape manka.

¹² Apolos mihunkawanji, he hunkawanjin kiciyapi kin om niepi ekta niipi kta e nina cinwaiya; tuka iye dehan ekta ye kta ecaca cin śni, tuka tohan cin kinhan ekta i kta.

¹³ Kiktahan un po, wowacinye en sutaya han po, wicaśta iyecen oḣanyan po, waśaka po.

¹⁴ Taku nitawapi kin owasin wacantkiyapi on econpi nunwe.

¹⁵ Mihunkawanji, ceciciyapi ce; Stephanas tiyohnaka kin sdonyayapi, he Akeya en waskuyeca tokaheya icage cin hee, qa wicaśta owotanna owicakiyapi kin en ye ic̣iyapi ece kin;

¹⁶ Tona hececapi, qa tona wawokiyapi, qa ḣtanipi kin hena owasin wicihukuya ye nic̣iyapi kta.

¹⁷ Stephanas qa Phortunatus qa Akekus hipi kin heon imduśkin; hena e taku ecamiyeconpi śni kin he ecetu miciciyapi.

¹⁸ Qa minagi kin magaga mayanpi, qa nitawapi nakun. Heon etanhan tona hececapi kin hena wicayuonihan po.

¹⁹ Asia ekta okodakiciye kin hena nape niyuzapi. Akula qa Priskila Itancan kin on sutaya nape niyuzapi, qa okodakiciye iye tipi ohna un kin hena koya.

²⁰ Hunkawanjin kiciyapi kin owasin nape niyuzapi. Iiputakapi wakan kin on otoiyohi i ikiciputaka po.

²¹ Palos he miye nape kiciyuzapi kin de miye minape kin on wakaga.

²² Tuwe Jesus Messiya Itancan kin waśtedake śni kinhan, he anathema maran-atha un nunwe.

²³ Jesus Messiya Itancan unyanpi towaonśida kin nicipi un nunwe.

²⁴ Jesus Messiya on wacanwakiye cin niyepi owasin en nicipi un nunwe. Amen.