I. Korinth 15 - Dakota Wowapi Wakan Kin

¹ Tuka, mihunkawanji, wotanin waśte unkoniciyakapi, qa iyacupi qon en ayahanpi kin he sdonye ciciyapi.

² He eciyatanhan nakun yanipi kta, wicoie unkoniciyakapi kin on, he ṭinsa duhapi kinhan, qa ecinśniyan awacanipi śni kinhan.

³ Otokaheya ekta taku iwacu qon he cic̣upi; Waunḣtanipi kin on Messiya ṭe cin, wowapi wakan eye cin ecetu;

⁴ Qa hnakapi, qa anpetu iciyamni kin piya ikicage cin, wowapi wakan eye cin ecetu.

⁵ Qa Inyan wanhdake c̣a, hehan ake nonpapi kin wanhdakapi.

⁶ Hehan he iyohakam wancadan hunkawanjin kiciyapi opawinge zaptan wanyakapi, hena wicota nahaḣin ni unpi, tuka wanjikji iśtinmapi.

⁷ Qa he iyohakam Jakob wanhdaka; hehan yewicaśipi kin owasin wanhdakapi.

⁸ Qa ehake miś miye wanmda ka, okaśkan tonpi kin iyemaceca.

⁹ Yewicaśipi kin miye iyotan macistinna, qa Wakantanka taokodakiciye kin śicaya wakuwa qon heon yeśipi emakiyapi kte cin iyemacece śni.

¹⁰ Tuka tomakece cin Wakantanka towaonśida kin on hemaceca. Qa iye towaonśida mici un kin he taku śni wanica, tuka hena owasin iyakapeya nina ḣtawani; qa he miye śni, Wakantanka towaonśida mici un kin hee.

¹¹ Heon, he miś miye, qa iś iyepi kin, hecen unyeotaninpi, qa nakun hecen wicayadapi qon.

¹² Unkan Messiya wiconṭe kin etanhan piya ikicage cin he oyakapi hecinhan, token on niyepi wanjikji, Wiconṭe etanhan piya wicoicage wanica ce, ehapi he.

¹³ Wicaṭe cin piya wicoicage wanica hecinhan, Messiya piya ikicage śni.

¹⁴ Qa Messiya piya ikicage śni hecinhan, hehan unkoyakapi kin he taku śni qa wacinyayapi kin he nakun taku śni.

¹⁵ Qa Wakantanka en unkitonpi śni kin; Wakantanka Messiya piya najin kiye cin he unkoyakapi; tuka he najin kiye śni, wicaṭe cin ake najinpi śni kinhan.

¹⁶ Wicaṭe cin piya najin kiyapi kte śni kinhan, hehan Messiya nakun piya najin kiyapi śni.

¹⁷ Qa Messiya piya ikicago śni hecinhan, wacinyayapi kin he takudan okihi śni, qa nahaḣin wayaḣtanipi kin ehna yaunpi.

¹⁸ Hehan tona Messiya on iśtinma iyayapi qon hena nakun takunipi śni.

¹⁹ Wiconi kin de en ecedan Messiya on ape unyakonpi hecinhan, wicaśta owasin unkiye iyotan iyotanhan iyeunkiyapi ece.

²⁰ Tuka wanna Messiya wieonṭe etanhan piya ikicaga, qa tona iśtinmapi qon hena en taku tokaheya icage cin hee.

²¹ Wicaśta kin eciyatanhan wiconṭe u kin, he iyecen wicaśta kin eciyatanhan wiconṭe etanhan piya wicoicage kin u ce.

²² Adam en owasin ṭapi kin, he iyecen Messiya en owasin piya ni yapi kta.

²³ Tuka otoiyohi tohan iyeitantu kinhan; Messiya e tokaheya, qa hehan tona tawa kin hena, Messiya ake hi kinhan.

²⁴ Qa hehan owihanke kta, tohan wokiconze kin Wakantanka Ateyapi kin kicu kta; wokiconze owasin, qa wicowaśake owasin, qa wookihi kin ihangye cinhan.

²⁵ Tona toka yapi kin hena owasin iye siha kin ihukun iyewicaye kte cin hehanyan ito wicaśtayatapi yanke kta.

²⁶ Qa toka ehake ihangye kte cin he wiconṭe kin ee.

²⁷ He siha kin ihukuya taku owasin ekihnaka. Tuka tohan, He ihukuya taku owasin ehnakapi kin, eye c̣ehan, tuwe he ihukuya taku owasin ehnake cin he okaptapi e tanin.

²⁸ Qa tohan taku owasin he ihukun iyeyapi kinhan, hehan Cinhintku kin eqe tuwe taku owasin iye ihukun iyeye cin he ihukun un kta, hecen Wakantanka owasin en ocowasin un kta.

²⁹ Wicaṭe cin ecaca piya ikicagapi kte śni hecinhan, tona wicaṭe cin on baptem wicaqupi kin hena taku tokonpi kta he; qa tokeca e wicaṭe cin on baptem wicaqupi he.

³⁰ Qa tokeca anpetu iyohi ta ikopeya unyakonpi he.

³¹ Jesus Messiya Itancan unkiyapi kin en widuśkinpi kin en owape cin he cajemdate c̣a, Anpetu iyohi maṭa ce, epa.

³² Wicaśta akantu iyecen, Ephesos ekta wamanica kici weciza eśta, on taku iyomapte kta he, wicaṭe cin piya wicoicage śni kinhan. Wauntapi, qa waunyatkanpi kta, heyakecinhan unṭapi kta ce.

³³ Ic̣ihnayanpi śni po; kodakiciyapi śice cin hena wicoḣan waśte yuśica ece.

³⁴ Wicoḣan owotanna on ihduhicapi, qa waḣtanipi śni po. Wanjikji Wakantanka sdonyapi śni. Winiśtecapi kte cin heon hena hecen epe.

³⁵ Tuka okinni tuwe heye kta; Wicaṭe cin token piya icaḣyapi, qa taku tancan kin yuha hiyupi he.

³⁶ Winitkotkoka, taku oyaju kin he ṭe śni kinhan, icage śni ece.

³⁷ Qa taku oyaju kin he tancan icage kte cin he oyaju śni, tuka su ecedan, aguyapi qa iś taku toktokeca naceca.

³⁸ Tuka Wakantanka token iyokipi kin hecen tancan qu, qa su ocaje otoiyohi tancan tawa kin kicu ece.

³⁹ Ceḣpi owasin ceḣpi okonwanjidan śni, tuka wicaceḣpi kin he wanji ee, qa woteca ceḣpi kin wanji hee, qa hogan ceḣpi kin wanji hee, qa zitkadan ceḣpi kin wanji hee.

⁴⁰ Unkan maḣpiyata tancan, qa makata tancan kin heca yukan. Tuka maḣpiyata un kin he towitan kin wanjidan, qa makata un kin he towitan kin tokeca.

⁴¹ Anpetu wi towitan kin wanjidan, qa hanyetu wi towitan kin he tokeca, qa wicanḣpi towitan kin he nakun tokeca; qa wicanḣpi wanji wicanḣpi tokeca kici wowitan en akidecece śni.

⁴² He iyecen wicaṭe cin piya wicoicage. Tancan ḣwin ojupi, tuka ḣwin kte śni ekicetu yapi.

⁴³ Wowiḣaḣaya ojupi, tuka wowitan ekicetu yapi. Wowaśake śni yan ojupi, tuka wowaśagya ekicetu yapi.

⁴⁴ Wicaceḣpi tancan ojupi, tuka wowakan tancan ekicetu yapi. Wicaceḣpi tancan yukan, qa wowakan tancan kin yukan.

⁴⁵ Kaken wowapi en kagapi qon, Adam wicaśta tokaheya kin he wicanagi ni un kin heca kagapi, qa Adam ehake un kin he Woniya Wanikiye cin hee.

⁴⁶ Tuka taku wakan un kin he tokaheya śni, tuka taku ceḣpi kin hee, qa iyohakam taku wakan kin.

⁴⁷ Wicaśta tokaheya kin he maka etanhan un, qa maka kin heca; Wicaśta iyokihe kin he Itancan maḣpiya eciyatanhan un kin hee.

⁴⁸ Maka kin heca un qon, tona maka hecapi kin hena hececapi; qa maḣpiya tanhan un qon, tona maḣpiya tanhan un kin hena hececapi.

⁴⁹ Unkan makata un kin touncage kin unhapi kin, he iyecen maḣpiya tanhan un kin touncage kin unhapi kta.

⁵⁰ Mihunkawanji kaken epa; Wicaceḣpi qa wicawe kih Wakantanka tokiconze kin tawapi kta okihipi śni, qa nakun wicaḣwin wicaḣwin kte śni kin tawa kte śni.

⁵¹ Wanyaka po, wowiyukcan wan ociciyakapi; owasin unkiśtinmapi kte śni, tuka owasin unyutokecapi kta.

⁵² Ihnuhanna, iśta kakpapi se en maza yahotonpi tanka ehake kin tanin kinhan; maza yahotonpi tanka kin he yahotonpi kta, qa wicaṭe cin ḣwin śni yan najin wicakiyapi kta, qa unkiye unyutokecapi kta.

⁵³ Taku ḣwin kte cin de wicaḣwin śni koyake kta, qa ṭe kte cin de ṭepica śni koyake kta.

⁵⁴ Qa tohan taku ḣwin kte cin de wicaḣwin śni koyake c̣a, tancan wiconṭe kin de wiconi kin ogeton kinhan, hehan wicoie kin wowapi en kagapi qon ecetu kta; Wiconṭe kin he woohiye kin e ocowasin iocokaya.

⁵⁵ Wiconṭe, wicape nitawa kin tokiya un he. Wicahnakapi, woohiye nitawa kin tokiya un he.

⁵⁶ Wiconṭe icape kin he woaḣtani ee, qa woaḣtani wowaśake kin he woahope kin ee.

⁵⁷ Tuka Wakantanka woohiye unqupi, Jesus Messiya Itancan unkiyapi kin eciyatanhan, he wopida yuha nunwe.

⁵⁸ Hecen mihunkawanji waśte cicidapi kin, sutaya yahanpi, qa pahoho śni yaunpi nunwe; qa ohinniyan Itancan oḣan kin en aic̣iciya po, Itancan kin on ḣtayanipi kin he taku śni wanice kta sdonyayapi kin heon etanhan.