I. Korinth 13 - Dakota Wowapi Wakan Kin

¹ Wicaśta akantu, qa maḣpiya ohnihde cejipi kin on iwaa eśta, wacanwakiye śni ehantanhan maza śa snasna, qa taku ituya sna kin he iyemaceca.

² Qa wowiyukcan mduhe c̣a, taku anaḣbeya un kin owasin, wookaḣnige owasin ko, sdonwaye c̣a, wowacinye owasin mduha, on ḣe kin yutokan iyewaye kta owakihi eśta, wacanwakiye śni ehantanhan mataku śni.

³ Qa taku mitawa kin owasin won wicayapi kin en wahdusote c̣a, mitancan kin hee kaeś ḣuḣnage kta e waqu eśta, wacanwakiye śni ehantanhan takudan iciyopteya waun śni.

⁴ Wacantkiyapi kin he wicotawacin tanka qa wowaśte ocowasin. Wacantkiyapi kin he wawinawizi śni. Wacantkiyapi kin he waḣanḣanic̣ida śni, qa ihdatan śni ece;

⁵ Wawiśtenya econ śni, qa iśnana takudan amnaic̣iye śni, wacinko śni, qa taku śica iyawicaonpe śni;

⁶ Woaḣtani en iyuśkin śni, tuka wowicake kin en iyuśkin;

⁷ Taku owasin kajuju; taku owasin wicada; taku owasin ape; qa taku owasin iyowinyan.

⁸ Wacantkiyapi kin he tohinni owihanke śni. Wokcanpi kin hena enakiyapi kta; ceji tokeca kin hena ayuśtan aye kta; qa wookaḣnige kin hee kaeś atakuni kte śni.

⁹ Apadan sdonunyanpi, qa apadan unkiyukcanpi.

¹⁰ Tuka tohan woyuśtan kin he hi kinhan tona woyuśtan śni kin hena ihanke kta.

¹¹ Homakśiyoqopa qehan, hokśiyoqopa iyecen iwae c̣a, hokśiyoqopa iyecen wimdukcan, qa hokśiyoqopa iyecen awacin waun; tuka wicaśta imacaga hehan taku hokśiyoqopa tawa kin amduśtan.

¹² Dehan ihdiyomdasin en iyecen aotpasya wawanunyakapi ece; tuka eqe hehan anog itohnake icitkokim wanunkiciyakapi kta. Nakaha taku kin tanyan sdonwaye śni; tuka e qe tokata sdonmayanpi kin iyecen tanyan sdonwaye kta e imicihan.

¹³ Unkan nakaha hena yamni en ounyan, wacinyanpi, qa apepi, qa wacantkiyapi; tuka wacantkiyapi kin he iyotan tanka.