I. Korinth 12 - Dakota Wowapi Wakan Kin

¹ Mihunkawanji, taku wakanyan wicaqupi kin iyukcan śni yaunpi kta wacin śni.

² Ikcewicaśta kin henicapi, wakagapi iapi okitpani kin en aniyanpi, ye niyanpi qon iyececa, he sdonyakiyapi.

³ Heon he sdonye ciciyapi; Tuwedan Wakantanka Taniya kin eciyatanhan ie c̣a, Jesus yaśice kte śni; qa nakun tuwedan Jesus e Itancan eciye kta okihi śni, tuka Woniya Wakan ecedan eciyatanhan okihi ece.

⁴ Unkan taku wicaqupi kin hena okonwanjidan śni, tuka Woniya kin e wanjidan.

⁵ Qa waeconpi kin okonwanjidan śni, tuka Itancan kin e wanjidan.

⁶ Qa wicoḣan toktokeca; tuka Wakantanka kin e okonwanjidan, iye owasin en taku owasin owicakiciḣan.

⁷ Qa otoiyohi on iyopta ye kte cin heon Woniya yuotaninpi kin wicaqupi ece.

⁸ Woniya kin wicaśta wan woksape wicoie kin qu ece; qa wanji iś wosdonye wicoie kin, hena Woniya wanjidan etanhan.

⁹ Qa Woniya kin he wanji tokeca wowacinye qu ece; qa wanji tokeca iś wawokiziyapi qu ece, qa hena Woniya wanjidan etanhan.

¹⁰ Qa wicaśta wan wowapetokeca econpi, qa wanji tokeca wiyukcanpi, qa wanji tokeca taku wakan iyukcanpi, qa wanji tokeca iapi ocaje ota, qa wanji tokeca iapi ieska oyakapi kin hecekcen wicaqupi ece.

¹¹ Tuka heha owasin Woniya wanjidan qa okonwanjidan un kin ne oḣanye c̣a, token cin kin hecen wicaśta otoiyohi kipamni wicaqu ece.

¹² Wicatancan kin he wanjidan tuka wicahuha ota yukan; qa tancan kin en huha kin hena ota qeyaś tancan wanjidan; Messiya kin iś he iyececa.

¹³ Woniya wanjidan on, unkiye owasin wicatancan wanjidan kta e baptem unqupi, Juda qa Helenes oyate, wowidake un kin, tona tawa ic̣iyapi kin hena koya; qa owasin Woniya wanjidan kin he en wayatke unkiyapi.

¹⁴ Wicatancan kin he huha wanjidan śni, tuka ota.

¹⁵ Hehan wicasiha kin he, Wicanape kin he miye śni heon wicatancan kin en opeya waun śni ce, eye cinhan, heon etanhan wicatancan kin en ope śni he.

¹⁶ Qa wicanoge kin he, Wicaiśta kin he miye śni qa heon wicatancan kin en opeya waun śni ce, eye cinhan, ehantanhan wicatancan kin en ope śni he.

¹⁷ Wicatancan kin ocowasin iśta kin ee unkanś, winaḣonpi kin tokiya un kta he; qa ocowasin winaḣonpi kin ee unkanś, waomnapi kin tokiya un kta he.

¹⁸ Tuka nakaha Wakantanka token iyokipi kin hecen wicahuha kin otoiyohi wicatancan kin en ehde.

¹⁹ Qa hena iyuḣpa wicahuha wanjidan unkanś, tancan kin tokiya un kta he.

²⁰ Tuka nakaha wicahuha ota eśta, tancan wanjidan.

²¹ Hecen iśta kin he, Cicin śni ce, nape kin eciya okihi śni; qa nakun pa kin he, Cicin śni ce, siha kin eciye kte śni.

²² Qa nakun sanpa, wicatancan en wicahuha kin tona waśake śni se un kin hena iyotan.

²³ Qa wicatancan ekta tona yuonihan śni undakapi kin hena iyotan unhduonihanpi ece; qa tona owanyag śice cin hena iyotan woiyokipi ece.

²⁴ Tona waśte unyukanpi kin hena takudan sanpa cinpi śni; tuka Wakantanka wicatancan kin icikoyagya kage c̣a, tukten iyokpaniyan un kin he en yuonihanpi tanka kaga.

²⁵ Hecen wicatancan kin en yuomdecapi wanice kta; qa wicahuha kin hena otoiyohi awakicicinpi kta.

²⁶ Qa hecen huha wanjidan iyotanhan iyekiye cinhan, he kici huha kin iyuḣpa iyotanhan iyekiyapi kta; qa huha wanjidan yuonihanpi kinhan he kici huha kin iyuhpa iyuśkinpi kta.

²⁷ Messiya tancan kin he niyepi, qa otoiyohi huha yecidukanpi.

²⁸ Unkan okodakiciye kin en Wakantanka kakenken ewicahde, tokaheya yewicaśipi kin hena, qa iyokihe wokcanpi, qa iciyamni waonspekiyapi; nehan wicowaśake, hehan waasniyanpi, waokiyapi, itancanpi, qa ceji toktokeca.

²⁹ Owasin yewicaśipi kin hecapi he; owasin wokcanpi he; owasin waonspekiyapi he; owasin wicowaśake kin heca he:

³⁰ Owasin waasniyanpi okihipi he; owasin ceji tokeca on iapi he; owasin ieskapi he.

³¹ Wookihi iyotan waśte kin hena nina akita po. Tuka hena isanpa canku waśte wan cicipazopi kta.