I. Korinth 11 - Dakota Wowapi Wakan Kin

¹ Miye omicipa po, Mea iya opeya waun kin iyececa.

² Mihunkawanji, ciyatanpi e, taku owasin on miyeksuyapi, a woope cic̣upi qon eceḣin duhi i kin heon etanhan.

³ Tuka he de sdonyayapi kin wacin; Wicaśta otoiyohi en pa kin he Messiya ee; qa winoḣin ca pa kin he wicaśta kin ee; qa. Messiya pa kin he Wakantanka ee.

⁴ Wicaśta otoiyohi pa akaḣpe ton cekiye c̣a wiyukcan kinhan, he iye pa kin wowiśtenya ece.

⁵ Tuka winoḣinca otoiyohi pa akaḣpe ton śni cekiye c̣a, wiyukcan kinhan, he iye pa kin wowiśtenya; he paha yuśdapi kin kici akidececa.

⁶ Winoḣinca iś pa akaḣpe ton śni kinhan paha yuśdapi kta. Tuka winoḣinca paha yuśdapi, qa iś hdasanpi kin he wowiśtece kinhan, pa akaḣpe ton un kte.

⁷ Wicaśta kin iś pa akaḣpe ton un kin he hecetu śni, he Wakantanka touncage qa towitan kin hee; qa winoḣinca kin wicaśta towitan kin hee.

⁸ Wicaśta kin he winoḣinca kin etanhan śni; tuka winoḣinca kin he wicaśta kin etanhan un.

⁹ Qa wicaśta kin he winoḣinca kicagapi śni, tuka winoḣinca kin iś wicaśta kin kicagapi.

¹⁰ Heon winoḣinca kin pa kin akan wowaśake hduhe kta, maḣpiya ohnihde cin hena on etanhan.

¹¹ Tuka nakun wicaśta kin winoḣinca codan un śni, qa winoḣinca kin iś wicaśta codan un śni, Itancan kin en.

¹² Unkan winoḣinca kin he wicaśta kin etanhan un kin, he iyecen wicaśta kin iś winoḣinca kin eciyatanhan u; qa taku owasin Wakantanka etanhan un.

¹³ Niś niyepi kin he iyukcan po; winoḣinca pa akaḣpe ton śni Wakantanka cekiye cinhan he hecetu he.

¹⁴ Taku oiyokipi kin hee kaeś he onspeniciyapi śni he; wicaśta kin paha hanskaska hecinhan he wowiśtece.

¹⁵ Tuka winoḣinca kin iś paha hanskaska koyake cinhan he wowitan kin ee; paha kin he woakaḣpe qupi.

¹⁶ Tuka tuwe waakinin un kinhan, wicoḣan kin de iyececa takudan unhapi śni, qa nakun Wakantanka taokodakiciye kin.

¹⁷ Unkan he de omdake c̣a ciyatanpi śni; taku sanpa waśte kin on mniniciyapi śni; tuka taku aoptetu kin heon etanhan.

¹⁸ Tokaheya okodakiciye mniniciyapi eca yuomdecapi dukanpi keyapi nawaḣon; qa onśpa wicawada.

¹⁹ Waakinicapi niyepi en un kta, hecen tona owotanna iniyukcanpi kin tanin kta.

²⁰ Heon witaya mniniciyapi eca, he ḣtayetu wotapi Itancan tawa kin yutapi kte cin hee śni;

²¹ Wotapi kin en otoiyohi taku yute kte cin tokaheya icu ece; unkan wanji wotektehda qa wanji iś witko ece.

²² Tokeca, tipi ohna wayatapi, qa wadatkanpi kte cin yahdphapi śni he. Wakantanka taokodakiciye kin ayaktapi śni, qa tona taku yuhapi śni kin hena iśtenwicayayapi he. Token eciciyapi kta he. Heon ciyatanpi kta he. Hiya, ciyatanpi śni.

²³ Miye taku Itancan maqu qon he cic̣upi, Jesus Itancan kin, hanyetu wan iyopeyapi qon he en, aguyapi icu;

²⁴ Qa wanna wopida eye cin hehan kiyuśpe c̣a heya; Icupi qa yuta po; mitancan kin niyepi on kiyuśpapi kin he dee; decen miksuya econ po.

²⁵ Nakun iś eya iyecen wanna yatkan qehan, wiyatke kin icu qa heya; Mawe kin en wicotakuye teca kin he dee ce; decen econ po, tohanhan datkanpi eca, miksuya po.

²⁶ Hecen tohan aguyapi kin de yatapi, qa wiyatke kin de datkanpi kinhan, henakiya Itancan ṭe cin he duotaninpi ece, tohanyan hi śni kin hehanyan.

²⁷ Heon etanhan, tuwe aguyapi kin de iyacin śni yute c̣a, Itancan tawiyatke kin de yatke cinhan, he Itancan kin tancan, we ko, on yacopi.

²⁸ Tuka wicaśta kin wihdukcan kta, hecen aguyapi kin de yute c̣a, wiyatke kin de etanhan yatke kta.

²⁹ Tuwe iyacin śni yute c̣a yatke cinhan, he woyaco hdute c̣a hdatkan, Itancan tancan kin iyukcan śni kin heon.

³⁰ Heon etanhan niyepi ekta wicota waśakapi śni, qa wayazanpi sa, qa hunḣ iśtinmapi.

³¹ Unkiye unkihdukcanpi kinhan, tokan tanhan unkiyukcanpi kte śni.

³² Qa unkiyukcanpi kinhan, Itancan kin wahokonunkiyapi, hecen wicoicage kin om unyacopi kte śni.

³³ Hecen mihunkawanji tohan wota mniniciyapi kinhan, otoiyohi akicipe po.

³⁴ Qa time wotektehda kinhan, he tiyata wote kta; hecen woyaco en witaya yaipi kte śni. Qa taku nahaḣin ihe cin hena tohan wau kinhan, wiyeya ewahnake kta.