I. Johannes 5 - Dakota Wowapi Wakan Kin

¹ Tuwe Jesus he Messiya kin ee e wicada kin he Wakantanka eciyatanhan tonpi; qa tuwe waicaḣye cin waśtedake cinhan, he tuwe iye eciyatanhan teca ni en tonpi kin he nakun waśtedaka ece.

² Deciyatanhan Wakantanka cinca kin waśtewicundakapi kin sdonunkiyapi, Wakantanka waśteundakapi qa tawoahope kin tanyan unkiciyuhapi kinhan.

³ Wakantanka waśtedakapi kin he dee, tawoahope kin tanyan ounpapi kin he; unkan tawoahope kin wośitkihda śni.

⁴ Tuwe Wakantanka eciyatanhan tonpi kin he wicoicage kin ohiya ece; unkan woohiye wicoicage ohiye cin he dee, wacinunyanpi kin hee.

⁵ Wicoicage ohiya ece kin he tuwe he; tuwe Jesus he Wakantanka Cinhintku kin ee e wicada kin hee.

⁶ Tuwe mini qa we eciyatanhan hi qon he Jesus Messiya ee; mini ecedan on hi śni, tuka mini we ahna. Unkan wayaotanin kin he Woniya kin hee; Woniya kin he wowicake, heon etanhan.

⁷ Maḣpiya kin ekta yamni wayaotaninpi ece, Ateyapi kin, Wicoie kin, qa Woniya Wakan kin; unkan hena yamni wanjipidan.

⁸ Nakun maka akan taku yamni wayaotanin ece, Woniya kin, qa mini kin, qa we kin; unkan hena yamni wanjidan en un.

⁹ Wicaśta akantu taku yaotaninpi kin he unkicupi kinhan, Wakantanka taku yaotanin kin he iyotan tanka; Wakantanka taku yaotanin kin he dee, iye Cinhintku hdaotanin qon hee.

¹⁰ Tuwe Wakantanka Cinhintku kin wicada kin he wayaotanin iye atayedan yuha un. Tuwe Wakantanka wicada śni kin he itonśni daka ece; wayaotanin kin on Wakantanka iye Cinhintku hdaotanin qon he wicada śni kin heon.

¹¹ Unkan wayaotanin qon he dee, Wakantanka wiconi owihanke wanica unqupi kin he; unkan wiconi kin he iye Cinhintku kin en un.

¹² Tuwe Cinhintkuyapi kin yuhe cin he wiconi yuha; qa tuwe Wakantanka Cinhintku kin yuhe śni kin he wiconi yuhe śni.

¹³ Wakantanka Cinhintku caje kin wacinyayapi kin dena wowapi cicagapi kin; wiconi owihanke wanica duhapi e sdonyakiyapi kta, qa Wakantanka Cinhintku caje kin wacinyayapi kta e heon.

¹⁴ Unkan iye ekta wowaditake unhapi kin he dee, Iye tawacin kin eciyatanhan taku unkidapi eca naunkiḣonpi ece:

¹⁵ Qa taku unkidapi eca naunkiḣonpi ece e sdonunkiyapi kinhan, taku tona unkidapi kin hena unhapi e nakun sdonunkiyapi ece.

¹⁶ Tuwe hunkawanjitku waḣtani wanhdake cinhan, woaḣtani kin he wiconṭe ekta śni kinhan, wocekiye ekiciye kta, unkan Wakantanka wiconi qu kta, tona waḣtanipi wiconṭe ekta iyahde śni hena on. Woaḣtani wanji wiconṭe ekta; he on wocekiye eye kta epe śni.

¹⁷ Taku śica econpi kin owasin woaḣtani; unkan woaḣtani wiconṭe iyohi śni kin heca yukan.

¹⁸ Tuwe Wakantanka eciyatanhan tonpi kin he waḣtani śni ece e sdonunyanpi; tuka tuwe Wakantanka eciyatanhan icage cin he tanyeḣ ihduhe c̣a hecen taku śice cin he oyutan śni ece.

¹⁹ Wakantanka eciyatanhan unyakonpi kin he sdonunkiyapi; qa wicoicage kin ocowasin woaḣtani en wanka.

²⁰ Unkan Wakantanka Cinhintku kin he hi, qa wicoksape unqupi, on tuwe wicake cin iyeunkiyapi kta e sdonunyanpi; unkan tuwe wicake cin he en unyakonpi, iye Cinhintku Jesus Messiya hee. Wowicake Wakantanka qa owihanke wanin wiconi kin hee.

²¹ Hokśiyopa cikcistinpidan, taku wakagapi kin itehan ihduha po. Amen.