I. Johannes 4 - Dakota Wowapi Wakan Kin

¹ Waśtecicidapi kin, ihnuhan woniya owasin wicayadapi kinhan; tuka woniya kin wicayukcan po, Wakantanka etanhan unpi kinhan; wicaśta wokcan itonpiśni ota wanna wicoicage kin ehna iyayapi.

² Deciyatanhan Wakantanka Taniya kin sdonyayapi kta; woniya kin tona Jesus Messiya wicaceḣpi un hi oyake cin hena Wakantanka eciyatanhampi ece.

³ Qa woniya kin tona Jesus Messiya wicaceḣpi un hi oyake śni kin hena Wakantanka eciyatanhanpi śni; tuka Messiya kipajin u kta nayaḣonpi qon he dee, wanna wicoicage kin en un.

⁴ Kokśiyopa cikcistinpidan, Wakantanka eciyatanhan yaunpi, qa hena ohiwicayayapi; tuwe en niunpi kin he tuwe wicoicage en un kin isanpa tanka.

⁵ Hena e wicoicage kin etanhanpi; heon wicoicage kin iyecen iapi, unkan wicoicage kin anawicagoptan ece.

⁶ Unkiye Wakantanka unketanhanpi; tuwe Wakantanka sdonye cin he unkiye anaungoptanpi ece; qa tuwe Wakantanka eciyatanhan śni kin he anaungoptanpi śni. Deciyatanhan wowicake woniya qa wohnaye woniya kin napin sdonunyanpi.

⁷ Waśtecicidapi kin, otoiyohi canteunkiciciyapi kte; wacantkiyapi kin he Wakantanka eciyatanhan un; qa tuwe wacantkiye cin he Wakantanka eciyatanhan tonpi, qa Wakantanka sdonya.

⁸ Tuwe wacantkiye śni kin he Wakantanka sdonye śni; Wakantanka he wacantkiyapi kin hee.

⁹ Wakantanka canteunkiyapi kin he deciyatanhan tanin, Wakantanka iye Cinhintku iśnana icage cin he makata u śi, heciyatanhan unnipi kta e heon.

¹⁰ Wacantkiyapi kin he deciyatanhan, unkiye Wakantanka waśteundakapi kin hee śni, tuka iye canteunkiyapi, qa Cinhintku waunḣtanipi yutokan iyeye kta e on u śi qon hee.

¹¹ Waśtecicidapi kin, Wakantanka hecen canteunkiyapi kinhan, unkiś eya otoiyohi canteunkiciciyapi kta iyececa.

¹² Tuwedan tohinni Wakantanka wanyake śni. Otoiyohi canteunkiciciyapi kinhan Wakantanka unkicipi un, qa iye canteunkiyapi kin unkiyepi en tanyan yuśtanpi ece.

¹³ Heciyatanhan unkiye kici unyakonpi, qa iye unkicipi un kin sdonunyanpi ece, iye Taniya unqupi kin heon.

¹⁴ Unkan wanunyakapi, qa Ateyapi kin Cinhintku ukiya, wicoicage kin ekta, Wanikiya hee kta e he unyaotaninpi.

¹⁵ Tuwe Jesus he Wakantanka Cinhintku kin hee e oyake cin he kici Wakantanka un, qa iś eya Wakantanka en un ece.

¹⁶ Wakantanka canteunkiyapi kin he sdonunyanpi qa wicaundapi. Wakantanka wacantkiyapi kin hee: qa tuwe wacantkiyapi en un kin he Wakantanka kici un, qa Wakantanka iś nakun iye en un ece.

¹⁷ Deciyatanhan wocantekiye unkiyepi en unkiciyuśtanpi ece, hecen woyaco anpetu kin en wowaditake unhapi kta: iye un kin unkiś iyecen wicoicage kin den unyakonpi ece.

¹⁸ Wacantkiyapi kin en wokokipe wanica, tuka wacantkiyapi yuśtanpi kin he wokokipe tankan eḣpeya ece; wokokipe kin he wicocante śica yuha ece; tuwe wakokipe cin he nahanḣin wacantkiyapi kin en yuśtanpi śni.

¹⁹ Iye tokaheya canteunkiyapi kin heon unkiye Wakantanka waśteundakapi.

²⁰ Tuwe, Wakantanka waśtewadaka ce, eye c̣a hunkawanjitku śicekidake cinhan, he itonśni. Tuwe hunkawanjitku wanhdake cin he waśtekidake śni kinhan, token ecin Wakantanka wanyake śni kin waśtedaka okihi kta be.

²¹ Unkan iye etanhan woahope kin de unhapi; tuwe Wakantanka waśtedake cin he hunkawanjitku kin iś nakun waśtekidake kta ce.