I. Johannes 3 - Dakota Wowapi Wakan Kin

¹ Wanyaka po, Ateyapi kin wocantekiye hinsko tanka unqupi kin, Wakantanka cinca unkekiciyapi kta: heon etanhan wicoicage kin sdonunyanpi śni, iye kin sdonyapi śni qon iyececa.

² Waśtecicidapi kin, wanna Wakantanka cinca kin heuncapi; qa tounkecapi kte cin hinaḣin tanin śni: tuka iye kin ihdutanin kinhan, iyeuncecapi kta e sdonunkiyapi; he token un kin wanunyakapi kta nakaeś.

³ Unkan tuwe hecen wacinyan canteyuze cinhan ihduecedan ece, iye kin ecedan un kin iyecen.

⁴ Tuwe woaḣtani ecen kin he woope kin kicaksa ece; woaḣtani he woope kicaksapi kin hee.

⁵ Unkan iye ihdutanin qon, waunḣtanipi kin yutokan iyeye kta e heon, he sdonyayapi; qa iye kin woaḣtani takudan en un śni.

⁶ Tuwe iye en un kin he waḣtani śni; tuwe waḣtani ece kin he iye kin tohinni wanyake śni, qa nakun sdonye śni.

⁷ Hokśiyopa cikcistinpidan, ihnuhan tuwe nihnayanpi kinhan; tuwe taku owotanna econ ece kin he owotanna, iye kin owotanna un kin iyececa.

⁸ Tuwe woaḣtani econ ece kin he wakanśica eciyatanhan un; otokaheya tanhan wakanśica kin waḣtani ece. Heon etanhan Wakantanka Cinhintku kin ihdutanin, wakanśica oḣan kin ihangye kte cin heon.

⁹ Tuwe Wakantanka eciyatanhan teca nien tonpi kin he woaḣtani econ śni, taku on icaḣye cin he en un kin heon; unkan waḣtani okihi śni, Wakantanka eciyatanhan teca nien tonpi kin he etanhan.

¹⁰ Detanhan Wakantanka cinca kin sdonwicayapi, qa nakun wakanśica cinca kin; tuwe taku owotanna ece econ śni kin he Wakantanka eciyatanhan śni, qa nakun tuwe hunkawanjitku tanyan cante kiyuze śni kin.

¹¹ Otokaheya tanhan taku iwahokonunkiciyapi nayaḣonpi qon he dee, otoiyohi waśteunkicidakapi kta cin.

¹² Qain taku śice cin eciyatanhan un, qa iye sunkaku kikte qon iyecece śni. Unkan taku on kikte he. Iye kin oḣan śica, qa sunkaku kin waśte kin heon etanhan.

¹³ Mihunkawanji, wicoicage kin śicenidapi eśta inihanpi śni po.

¹⁴ Hunkawanjinkiciyapi waśtewicunkidapi kin heon wiconṭe etanhan wiconi e ekta unkiyohipi sdonunkiyapi; tuwe hunkawanjitku waśtekida śni kin he wiconṭe ehna un.

¹⁵ Tuwe hunkawanjitku śicekidake cin he tinwicakte kin heca; unkan tuwe tinwicakte kin he wiconi owihanke wanica aihduhe śni e sdonyayapi.

¹⁶ Deciyatanhan wacantkiyapi kin sdonunyanpi; iye kin unkiyepi on wiconi eḣpekiye cin heon; hecen unkiś eya hunkawanjinkiciyapi kin on wiconi eḣpeunkiyapi kta iyececa.

¹⁷ Tuka tuwe maka akan woyuha ton, qa hunkawanjitku waḣpanica wanhdake c̣a, cantekiye cin anakipte cinhan, token Wakantanka waśtedake cin en un kta he.

¹⁸ Micinca cikcistinpidan, wicoie qa wicaceji ecedan on wacanunkiyapi kte śni, tuka wicoḣan qa wowicake kin on.

¹⁹ Unkan deciyatanhan wowicake eciyatanhan unyakonpi, qa iye itohnake kin en cante unhduṭinzapi kta e sdonunkiyapi.

²⁰ Uncantepi kin unhdacopi kinhan, Wakantanka uncantepi kin sam iyeya tanka, qa taku owasin sdonya un.

²¹ Waśtecicidapi kin, uncantepi kin unhdacopi śni kinhan, Wakantanka ekta wowaditake kin unhapi:

²² Qa taku unkidapi kin owasin unkicupi ece, tawoahope kin unkiciyuhapi, qa taku iye iśta kin en iyokipi kin he econkupi, heon etanhan.

²³ Unkan tawoahope kin he dee, Iye Cinhintku Jesus Messiya caje kin wacinunyanpi, qa otoiyohi waśteunkicidapi kta, econ unśipi qon iyececa.

²⁴ Tuwe tawoahope kin opecinhan, he Wakantanka kici un, qa iś iye kin en un; unkan Woniya unqupi kin he eciyatanhan iye unkicipi un kin he sdonunyanpi ece.