I. Johannes 2 - Dakota Wowapi Wakan Kin

¹ Micinca cikcistinpidan, wayaḣtanipi kte śni e heon dena decen wowapi cicagapi. Unkan tuwe waḣtani kinhan Ateyapi kin ekta Wawiciya wan unhapi, Jesus Messiya owotanna kin hee.

² Unkan waunḣtanipi wokajuju kin he iye; qa unkiye unkitawapi kin hecedan śni, tuka maka kin owancaya woaḣtani econpi kin hena.

³ Unkan deciyatanhan iye kin wanna sdonunyanpi e sdonunkiyapi, tawoahope unkokicipapi kinhan.

⁴ Tuwe, He sdonwaya ce, eye c̣a tawoahope okicipe śni kin he itonśni, qa wowicake kin en un śni.

⁵ Tuka tuwe iye oie kin okicipe cinhan, awicakehan he en Wakantanka waśtedake cin yuecetupi. Heciyatanhan iye kin en unyakonpi kin sdonunkiyapi ece.

⁶ Tuwe he kici un keye cinhan, iye token omani qon iś iyecen omani kta iyececa.

⁷ Mihunkawanji, woahope teca wan cicagapi śni, tuka woahope tanina, otokaheya tanhan duhapi qon hee. Woahope tanina kin wicoie otokahe ekta nayaḣonpi qon he hee.

⁸ Hehan akeś woahope teca wan cicagapi; he iye kin en wowicake, qa nakun niyepi kin en; otpaze cin he wanna henakeca, qa iyoyanpa wicake cin he wanna tanin kin heon etanhan.

⁹ Tuwe iyoyanpa kin en un keic̣iye c̣a, hunkawanjitku kin śicekidake cin he dehantu otpaza kin en un.

¹⁰ Tuwe hunkawanjitku waśtekidake cin he iyoyanpa kin en un ece, qa wokaśeye takudan en un śni.

¹¹ Tuka tuwe hunkawanjitku śicekidake cin he otpaza en un, qa otpaza omani, qa tokiya ye cin sdonkiye śni, iśta kin otpaza kaśeya, heon etanhan.

¹² Hokśiyopa cikcistinpidan, iye caje kin on wayaḣtanipi kin nicicajujupi kin heon wowapi cicagapi.

¹³ Hunkakeniyanpi kin, tuwe otokaheya tanhan un kin he sdonyayapi kin heon wowapi cicagapi. Kośkapi kin, tuwe śice cin he ohiyayapi kin heon wowapi cicagapi.

¹⁴ Hokśiyopa cikcistinpidan, Ateyapi kin sdonyayapi kin he etanhan wowapi cicagapi. Hunkakeyapi kin tuwe otokaheya tanhan kin he iye sdonyayapi kin heon wowapi cicagapi. Kośkapi kin, waniśakapi, qa Wakantanka oie kin en niunpi, qa tuwe śice cin he yaktepidan kin he etanhan wowapi cicagapi.

¹⁵ Wicoicage kin de waśtedapi śni po, qa taku wicoicage kin ekta un kin hena nakun. Tuwe wicoicage kin de waśtedake cinhan, Ateyapi kin waśtedake cin en un śni.

¹⁶ Taku wicoicage en un kin owasin, wicaceḣpi cantiheye cin, wicaiśta cantiheye cin, qa wiconi kin den waḣanic̣idapi kin, hena Ateyapi kin etanhan śni, tuka wicoicage kin de etanhan.

¹⁷ Unkan wicoicage kin de atakuni kte śni, qa wocantiheye kin nakun; tuka tuwe Wakantanka tawacin kin yuhe cinhan, he owihanke wanin ounye kta.

¹⁸ Hokśiyopa cikcistinpidan, anpetu ihankeya kin wanna hiyohi; unkan, Messiya kipajin kin he u kta ce, nayaḣonpi qon he iyecen Messiya kipajinpi kin ota wanna hipi; heon de anpetu ehake kin sdonunyanpi.

¹⁹ Unkiyepi kin etanhan inanpapi, tuka hena unkicicapi śni. Hena unkicicapi unkanś, unkici pi un wacinpi kta: tuka owasin unketanhanpi śni tanin kta e heon etanhan hececa.

²⁰ Tuka Wanji Wakan kin he niye sdaniyanpi, qa heon taku owasin sdonyayapi.

²¹ Wowicake kin sdonyayapi śni kin heon wowapi cicagapi śni; tuka he sdonyayapi, qa woitonśni takudan wowicake kin eciyatanhan u śni, heon etanhan.

²² Tuwe itonśni he; tuwe Jesus he Messiya kin ee śni, keye cin hee; Messiya kipajin kin hee, Ateyapi qa nakun Cinhintku kin anawicakiḣbe cin hee.

²³ Tuwe Cinhintkuyapi kin wicada śni kin he Ateyapi kin yuhe śni: tuka tuwe Cinhintkuyapi kin oyake cinhan, he Ateyapi kin nakun yuha ece.

²⁴ Taku otokaheya tanhan nayaḣonpi qon he yuha po. Taku otokahe ekta nayaḣonpi qon en niunpi kinhan, Cinhintkuyapi kin en yaunpi kta, qa nakun Ateyapi kin en.

²⁵ Unkan wahoyapi qon taku iwahounyanpi kin, owihanke wanin wiconi kin hee.

²⁶ Tona nihnayanpi kta cinpi kin hena on decen wowapi cicagapi.

²⁷ Tuka sdaniyanpi, iye eciyatanhan duhapi kin he nicipi un; qa tuwe waonspeniciyapi kta iyenicecapi śni; tuka sdaniyanpi kin he taku owasin onspeniciyapi, he wowicake qa woitonśni wanica; he taku onspeniciyapi kin iyecen, iye kin en un po.

²⁸ Unkan dehan, hokśiyopa cikcistinpidan, iye kici un po; hecen tohan iye ihdutanin kinhan wacinunyanpi kta, qa taninyan hinajin kinhan, itokam unkiśtecapi kte śni.

²⁹ Iye owotanna un sdonyayapi kinhan, tuwe woowotanna econ kin he iye kin eciyatanhan wanna teca nien tonpi o nakun sdonya po.