I. Johannes 1 - Dakota Wowapi Wakan Kin

¹ Taku otokaheya tanhan un, taku naunḣonpi, qa iśta on wanunyakapi, opaunḣtapi qa nape on unzapi, Wiconi Oie kin hee.

² Wiconi kin he ihdutanin; unkan Wiconi Owihanke Wanica Ateyapi kin kici un, qa unkiyepi kin en ihdutanin qon he wanunyakapi, qa unyaotaninpi qa unkoniciyakapi.

³ Taku wanunyakapi qa naunḣonpi kin he unkoniciyakapi, hecen niye unyecicapi kta; unkan awicakehan Ateyapi kin kici okiciciya unyakonpi, qa nakun iye Cinhintku Jesus Messiya kici.

⁴ Unkan nitowiyuśkinpi kin yucopi kta e heon dena decen wowapi unnicagapi.

⁵ Hehan wotanin waśte iye eciyatanhan naunḣonpi qa unkoniciyakapi kin, Wakantanka he iyoyanpa, qa otpaza takudan en un śni kin he hee.

⁶ Iye kici okiciciya unyakonpi ce, unkeyapi qa otpaza kin omaunnipi kinhan, unkitonpiśni qa wowicake kin econkupi śni ece.

⁷ Tuka iye iyoyanpa en un kin he iyecen iyoyanpa kin en maunnipi kinhan, otoiyohi okiciciya unyakonpi, qa iye Cinhintku Jesus Messiya we kin he woaḣtani owasin unkipakintapi kta.

⁸ Woaḣtani unnicapi ce, unkeyapi kinhan, unkic̣ihnayanpi qa wowicake kin unkiyepi en un śni.

⁹ Tuka waunḣtanipi kin unkohdakapi kinhan, iye kin wacinyepica qa owotanna un, hecen woaḣtani yutokan iyeunkiciciyapi kta, qa taku śica owasin unkipakintapi kta.

¹⁰ Eca waunḣtanipi śni ce, unkeyapi kinhan, iye itonśni undakapi, qa iye oie kin unkiyepi en un śni ece.