I. Inyan 4 - Dakota Wowapi Wakan Kin

¹ Heon etanhan, Messiya wicaceḣpi en unkiyepi on kakije cin heon, niś eya iyecen tawacin kic̣un po: tuwe wicaceḣpi kin en kakije cin he wanna woaḣtani ayuśtan:

² Hecen, hetanhan icimana wicaceḣpi eciyatanhan ni kte śni, wicaśta taku śica cantiheyapi kin en, tuka Wakantanka tawacin kin eciyatanhan.

³ Hekta unnipi kin, Ikcewicaśta tawacinpi kin ecen econkupi kin he ota, wicoḣan śica, wocantiheye śica, miniśa ota, wakan wacipi, witkopi, qa wakagapi wakandapi śice cin hena omaunnipi qehan.

⁴ He en iś iye witkoya śkanpi kin on iyecen iyatahdenic̣iyapi śni kin heon tognihdapi qa niyaśicapi ece;

⁵ Hena e tuwe ni unpi ṭapi koya wicayaco kta wiyeya yanke cin hee itokam wohdakapi kta.

⁶ Heon etanhan, nakun tona ṭapi kin hena wotanin waśte owicakiyakapi qon, hecen wicaśta wicaceḣpi en un kin iyecen wicayacopi eśta woniya en Wakantanka eciyatanhan nipi kta.

⁷ Tuka taku owasin ecadan owihanke kta. Heon etanhan wacinksapa po, qa wocekiye on waktaya un po.

⁸ Qa taku owasin isanpa niye iyakitedan nina cantekiciya po; wacantkiyapi kin he woaḣtani ota akaḣpe kta.

⁹ Iapi śica wanin otoiyohi wonkiciya po.

¹⁰ Taku wicaqupi kin wicaśta otoiyohi icu kin he iyecen iyakitedan okinikiciciya po, tona Wakantanka towaonśida ocaje ota tanyan yuhapi kin iyececa.

¹¹ Tuwe ie cinhan Wakantanka oie kin iyecece kta; qa tuwe waokiya hecinhan wookihi Wakantanka qu kin he eciyatanhan kte; hecen taku owasin on Wakantanka yatanpi kta, Jesus Messiya eciyatanhan; iye qe woyatan qa wookihi owihanke wanin kiciun nunwe. Amen.

¹² Waśtecicidapi kin, peta on iyutanpi kin on iniyutanpi kte cin he on yuśinyayapi śni po, taku tokeca ayakipapi iyececa.

¹³ Tuka Messiya kakije ciqon en oyapapi kin heon iyuśkin po; hecen tohan towitan tanin kinhan nina iduśkinpi kta.

¹⁴ Messiya caje kin on niyaśicapi kinhan, niyuwaśtepi ece; wowitan qa Wakantanka Taniya kin en niunpi kin heon. Hena e eciyatanhan ośtehdapi, tuka niye eciyatanhan yatanpi ece.

¹⁵ Tuka ihnuhan wanji tin wicakte sa, qa wamanon sa, qa taku śica econ sa, qa tokan tawa i en iyewicakiciciye cin iyecen kakiśniyanpi kinhan.

¹⁶ Hececa eśta tuwe Messiya tawa kin on kakiśyapi kinhan iśtece kte śni; tuka heon Wakantanka yatan kta.

¹⁷ Wakantanka tiyohnaka tawa kin wicayukcanpi kte cin wanna iyehantu. Unkan he unkiyepi etanhan aye cinhan, tona Wakantanka tawootanin waśte wicadapi śni kin hena token owihankepi kta he.

¹⁸ Qa wicaśta owotanna kin kitan se ni kinhan, tuwe śicaya econ qa waḣtani sa kin hena tukten yakonpi kta he.

¹⁹ Heon etanhan, tona Wakantanka eciyatanhan kakijapi kin hena, waśte ece econpi kin en, Wawicaḣye wacinyepica kin iyecen iye nagipi kin yuhekiyapi kte.