I. Inyan 3 - Dakota Wowapi Wakan Kin

¹ He iyecen, winoḣincapi kin, nihihnapi wicihukun un po; hecen tona wicoie kin anagoptanpi śni kin hena, wicoie codan eśta, iye tawicupi oḣanpi kin on iyakapewicayapi kta;

² Nioḣanpi waśte wokokipe iyahna wanyakapi kin icunhan.

³ Ihduzapi kin he akantanhan, paha kisonpi, qa mazaskazi oinpi, qa wokoyake unpi kin hee kte śni:

⁴ Tuka wicaśta mahentanhan cante kin ekta, taku ḣwinpica śni kin, tawacin waḣbadan qa inina un, he Wakantanka itokam taku teḣike cin ee.

⁵ Iś eya, wanakaja, winoḣinca waśteśte Wakantanka wacinyanpi qon hena e hecen kic̣unpi, qa hihnakupi kin wicihukun unpi.

⁶ Hecen Sara Abraham anakigoptan, qa, Itancan, eciya ece; he cunkśiwicaye cin hena niyepi, tanyan ecanonpi qa wokokipe takudan on niyuśinyayapi śni kinhan.

⁷ Nakun wicaśta yaunpi kin, wosdonye eciyatanhan om yukan po, nitawinpi wakśica wankadan iyececa, qa om wiconi wowaśte kin tawanic̣iyapi kta iyecen wicahduonihan po; hecen wocekiye nitawapi kin kagipi kte śni.

⁸ Ehake, owasin cante wanjidan hduwitaya onśikicida po; hunkawanjinkiciyapi kin iyecen waśtekicida po, waonśidapi qa wacantkiya po.

⁹ Taku śica on itkom taku śica econpi śni po; qa nicigepi eśta wicakigepi śni po; tuka itkopatanhan wayawaśte po; heon nicopi, hecen woyawaśte tawayayapi kta e sdonya po.

¹⁰ Tuwe wiconi waśtedake c̣a anpetu waśte wanyaka cin kinhan, iye ceji kin taku śica en yeye kte śni, qa iha kin wohnaye takudan ie kte śni.

¹¹ Taku śice cin okamna kta, qa taku waśte e econ kta; wookiye akite c̣a kuwa aye kta ce.

¹² Johowa iśta kin wicaśta owotanna awicatonwan, qa wocekiye eyapi kin he anoḣwicakiciya; tuka tona śicaya econpi kin Jehowa itohnake kin itkowicakipa ece.

¹³ Unkan taku waśte kin pasi yaunpi kinhan, tuwe e kiunniniyanpi kta he.

¹⁴ Tuka owotanna oḣanyanpi kin on śicaya nicuwapi kinhan, he wowaśte; hecen wokokipe tawapi kin kokipapi śni, qa cante hahayedan yankapi śni po:

¹⁵ Tuka nicantepi kin en Wakantanka Itancan kin wakanda po; qa tuwe wowacinye en niunpi kin on iniwangapi kinhan, waḣbayedan kokipeyahan aduptapi kta e ohinniyan wiyeya yanka po;

¹⁶ Wawiyukcan waśte hduha po; hecen śicaya oḣanyanpi iyecen tona aniiapi kin hena iśtecapi kta, Messiya on nioḣanpi waśte kin itonśniyan oniyakapi kin.

¹⁷ Wakantanka hecen tawacin hecinhan, taku śica econpi kin hee śni, tuka taku waśte econpi kin on kakiśniyanpi kinhan hee waśte kta.

¹⁸ Messiya iś eya wancadan woaḣtani on kakija, owotanna un kin owotanpidan śni kin hena on, Wakantanka ekta unkaupi kta e heon, wicaceḣpi kic̣un ktepi, tuka Woniya kin on kiniyanpi.

¹⁹ Nakun he on ekta ye c̣a wicanagi wicakaśka tipi ohna unpi kin hena wowicakiyaka;

²⁰ Hena e ehanna waanagoptanpi śni, Wakantanka wawacinkta yuza tanka tehan awicape, Nowa taanpetu kin en, wita wata kagapi kin icunhan, he ohna tonana, wicanagi śahdoganna mini on nipi.

²¹ Qa wiyacinpi kin he iyececa, baptem nakaha niunyanpi ece; wicaceḣpi aśape cin yutokan iyeyapi kin hee śni, tuka Wakantanka ekta wawiyukcan waśte waayupte cin hee, Jesus Messiya ihduekicetu kin heon etanhan;

²² Iye qe maḣpiya kin ekta kihde c̣a Wakantanka etapa kin eciyatanhan yanka; maḣpiya ohnihde, qa wicookihi, qa wowaśake kin owasin iye ihukun iyewicayapi.