I. Inyan 2 - Dakota Wowapi Wakan Kin

¹ Heon etanhan, wocanniye owasin, qa wohnaye ocowasin, qa woanakiḣbe, qa wowinawizi, qa iapi śica iyuḣpa eḣpeya po;

² Qa hokśiyoqopa nakaha tonpi kin iyecen, wicoie asanpi wohnaye wanin un kin he cin po, hecen on inicagapi kta:

³ Itancan kin wacantkiya e uyatapi hecinhan.

⁴ He en yahipi, inyan wan ni un kin iyececa, wicaśta akantu eḣpeyapi, tuka Wakantanka e kaḣnige c̣a teḣike daka;

⁵ Unkan niś eya, inyan ni un kin iyececa, tipi wakan wan en icaḣniyanpi, wawayuśnapi wakan kin, hecen wośnapi wakan qa Jesus Messiya eciyatanhan Wakantanka iyokipi kin waduśnapi kta.

⁶ Heon etanhan nakun wowapi en kagapi qon, Wanyaka po, Zion en inyan wan oise pa ḣinca ewahde, kaḣnigapi, teḣika; unkan tuwe he wacinye cinhan wiśtece kte śni ce.

⁷ Niye wacinyayapi kin he teḣike yadapi; tuka tona waanagoptanpi śni kin hena, inyan tipi kagapi eḣpeyapi qon he oise pa ḣinca icaga, inyan on siha ibotopi qa imnija on śinhdapi ece kin hee;

⁸ Tona wicoie kin on śinhdapi qa waanagoptan śni unpi kin hena on; heon hecen ewicahdepi.

⁹ Tuka wicoicage kaḣnigapi, wawayuśnapi wicaśtayatapi, wicoun wakan, qa oyate opewicakitonpi kin he niyepi; hecen tuwe otpaza etanhan, iye iyoyanpa wakan tawa kin en nicopi kin he oḣan waśte kin odakapi kta.

¹⁰ Ehanna oyate henicapi śni, tuka nakaha Wakantanka taoyate yaunpi; he ehan onśinidapi śni, tuka wanna wowaonśida iyoyahipi.

¹¹ Waśtecicidapi, ceciciyapice, oyate tokeca qa unhdaka unpi kin iyecen wicaceḣpi cantiheyapi kin, wicanagi kin kici kicize cin, hena ayuśtan po:

¹² Qa Ikcewicaśta ehna owotanna oḣanyan po; hecen śicaya econ keniciyapi keś, wiwicawangapi anpetu kin en, nioḣanpi waśte wanyakapi kte cin hena on Wakantanka yaonihanpi kta.

¹³ Itancan kin on etanhan, wicaśta akantu wakonzapi kin owasin anagoptan po; wicaśtayatapi kin he iyotan tanka;

¹⁴ Qa wicaśta itancanpi kin iś tona śicaya oḣanyanpi śitkihdawicayapi kta, qa tona tanyan econpi wicayaonihanpi kta e on u wicaśi kin hena.

¹⁵ Hecen Wakantanka tawacin, tanyan oyaḣandapi kin on wicaśta witkotkoka wiyukcan śni kin hena inina yankewicayakiyapi kta.

¹⁶ Nihduhapi, tuka tawanic̣iyapi kin he wocanniye onḣoḣda iyecen yec̣unpi kte śni, tuka Wakantanka tawowidake kin iyececa.

¹⁷ Owasin wicayuonihan po. Hunkawanjinkiciyapi kin waśtekida po. Wakantanka kokipa po. Wicaśtayatapi kin yuonihan po.

¹⁸ Wowidake yaunpi kin, tona niyuhapi kin ocowasin kokipeyahan anawicagoptan po, tona waśte qa waḣbadan kin hecedan śni, tuka tona ksizece cin hena nakun.

¹⁹ Tuwe Wakantanka awacin un kin on, hecetu śni eśta kakiśyapi qa woiyokiśice yuha un kinhan, he wowaśte.

²⁰ Wayaḣtanipi kin on anipapi, qa wacinnitankapi kinhan taku iyokihi kta he; tuka tanyan ecanonpi kin on kakiśniyanpi kinhan, wacinnitankapi hecinhan, he Wakantanka iyokipi.

²¹ Unkan he on nicopi; Messiya unkiyepi on kakije c̣a woonspe aiḣpeunkiyapi kin he iyecen niś eya iye owe kin en opa dapi kta.

²² Iye qe woaḣtani takudan econ śni, qa i kin ohna wohnaye takudan iyeyapi śni;

²³ Kigepi qehan itkom wicakige śni; kakiśyapi he ehan owawicakiye śni; tuka tuwe owotanna wiyukcan ece kin he en ihdoya.

²⁴ Iye ḣinca can akan un qehan, iye tancan kin en waunḣtanipi kin yuha; hecen unkiye woaḣtani eḣpeunyanpi woowotanna en unnipi kta: Iye apapi qon on asniniyanpi ce

²⁵ Taḣin wanunyanpi nunipi kin iyenicecapi; tuka wanna tuwe wonniyanpi qa nagi awanniyakapi kin he ekta yahdipi.