I. Inyan 1 - Dakota Wowapi Wakan Kin

¹ Inyan, Jesus Messiya yeśi qon, wicaśta toktokeca enanakiya unpi, Pontus, Galatia, Kappadokia, Asia qa Bithunia ekta,

² Wakantanka Ateyapi kin otokaheya tanhan sdonwicaye cin eciyatanhan, qa Woniya wicayuecedan kta on wicakaḣniga, anagoptanpi kta, qa Jesus we kin awicamnimni kta e on, hena wowapi wicakicaga: Wowaonśida en niunpi, qa wookiye niciyuotapi nunwe.

³ Wakantanka, Jesus Messiya Itancan unyanpi Atkuku kin he yawaśtepi nunwe; iye towaonśida ota eciyatanhan Jesus Messiya wicaṭe cin etanhan kinikiye ciqon he on wowacinyan ni un kin en piya icaḣunyanpi;

⁴ Woaiḣpeye wan ḣwinpica śni, aśapapi śni, qa ohinniyan un kta, maḣpiya ekta enicihnakapi kin on;

⁵ Wacinyanpi eciyatanhan Wakantanka towaśake kin on wiconi anikpatanpi, eqe anpetu ehake kin en yuotaninpi kta.

⁶ Heon nina iduśkinpi ece, tuka nakaha ptenyedan, he hecetu naceca, taku wawiyutanyan un kin ota on iyoniciśicapi:

⁷ Hecen wacinyayapi iyutanpi kin, he mazaskazi peta ece on śdoyapi keś atakuni śni ece, sam iyeya nina teḣike cin he woyaonihan, wicakinihanpi qa wowitan on tanin kta, tohan Jesus Messiya ihdutanin kinhan.

⁸ He wandakapi śni eśta waśteyadakapi; qa nakaha wanyake śni yaunpi keś wacinyayapi kin on iduśkinpi, wowiyuśkin oyagpica śni qa wowitan ojudan kin on:

⁹ Wacinyayapi ihanke kin iyacupi, ninagipi ni kte cin hee.

¹⁰ Wiconi kin he on, wicaśta wokcan wowaonśida en niunpi kin he oyakapi qehan, aic̣iciya akitapi qa wiwangapi;

¹¹ Messiya Taniya iyepi en un kin, tohantuqa anpetu kin tukte e ka e iwangapi, Messiya kakije kte c̣a wowitan ihakam un kte cin henaitokamoyake ciqon he ehan.

¹² Unkan, iś iyepi kte śni, tuka tona wotanin waśte, Woniya Wakan maḣpiya eciyatanhan kun u śipi kin iyahna sdonyeniyanpi kin eqe nakaha taku oniciyakapi kin hena unkiyepi on yuhapi e owicakiyakapi; taku kin hena maḣpiya ohnihde kin en eyokasin wacinpi.

¹³ Heon etanhan, nitawacin nisehu kin opta ipiyagkiton po, waktaya un po, qa Jesus Messiya ihdutanin kinhan wowaśte nicaupi kte cin he ape yukan po, owihanke kin hehanyan.

¹⁴ Wicacinca waanagoptanpi kin iyenicecapi kta, qa ehanna wasdonye śni yaunpi qehan cantiheyayapi śica ake iyecen nic̣icagapi kte śni.

¹⁵ Tuka tuwe nicopi kin he wakan, he iyecen niś eya oyaḣandapi kin ocowasin en niwakanpi nunwe.

¹⁶ Heon hecen owapi qon, Wakanyan un po, miye mawakan kin heon etanhan.

¹⁷ Qa Ateyapi kin wicaśta itohnake iwanyake śni wicaśta otoiyohi iye oḣan kin eciyatanhan wicayukcan ece kin he hoyeyakiyapi kinhan, tohanyan den unhdaka yaunpi kin kokipeyahan un po.

¹⁸ Witkotkoya oyaḣandapi kin, nihunkakepi wohdakapi eciyatanhan duhapi qon he etanhan, taku atakuniśni ece, mazaskazi qa mazaska on openicitonpi śni e sdonyakiyapi;

¹⁹ Tuka Messiya we teḣike cin he on, taḣin wanunyanpi cincadan, taku iyaonpepica śni qa ecedan un kin iyececa.

²⁰ Iye qe maka kin de kagapi śni itokam wakiconzapi, tuka anpetu ihankeya kin dena en yutaninpi, niyepi kin on;

²¹ Wakantanka wicaṭe cin etanhan najinkiye c̣a wowitan qu qon he wicayadapi, iye eciyatanhan; hecen wicayadapi qa wacinyayapi kin he Wakantanka en un kta.

²² Woniya kin eciyatanhan wowicake anayagoptanpi kin heon nagi nihduskapi, hunkawanjinkiciyapi kin awicakehan waśtewicayadakapi kta, heon cante ecedan on otoiyohi nina waśtekicidaka po.

²³ Piya icaḣniyanpi, oicage kuke kte cin etanhan śni, tuka kukepica śni kin on, Wakantanka oie kin ni un qa owihanke wanice kte cin hee on.

²⁴ Wicaceḣpi owasin peji iyececa, qa wicaśta towitan kin owasin peji ḣca kin iyececa. Peji kin he śniś aye c̣a waḣca kin hinḣpaya ece;

²⁵ Tuka Itancan oie kin he owihanke wanin un kta. Unkan wotanin waśte oniciyakapi kin wicoie kin he hee.