II. Timotheos 4 - Dakota Wowapi Wakan Kin

¹ Heon, Wakantanka itokam, qa Jesus Messiya Itancan kin, tona nipi ṭapi ko wicayaco kta, tohan wokiconze hduha hi kinhan, he nakun itokam wahokonciciya;

² Wicoie kin oyaka wo, tohan oiyokipi, qa nakun oiyokipi śni eśta, ḣanditaic̣iya, wo. Owotanna wicakage wacin, iyopewicaya, wahokonwicakiya wo, woonspe qa wawacinkta yuzapi tanka kin on.

³ Anpetu wan u kte cin he tohan hi kinhan, woonspe waśte kin aktapi kte śni, tuka iye wicotawacin śice cin eciyatanhan waonspekiyapi kin awicakitapi kta, noge yaśpuyapi se iyececa heon etanhan.

⁴ Qa nogepi kin wowicake kin etanhan hduhomnipi, qa hitunkakanpi kin ekta ihdoyapi kta.

⁵ Tuka niye q̇e taku owasin en wakta yaun kta, wicokakije en waditaka wo; wotanin waśte oyakapi wicoḣan kin ecen econ wo; wicoḣan duhe cin he hduśtan wo.

⁶ Wanna wamihduśna kta iyemicihantu, qa wahde kte cin he wanna kiyadan ihan.

⁷ Okicize waśte kin ecamon, woinyanke kin ihuniwakiya, wacinyanpi kin he hduha waun;

⁸ Qa tokata, woowotanna wateśdake wan mihnakapi, he Itancan wayaco owotanna kin maqu kta, anpetu kin he en; qa miye miśnana śni, tuka tona iye taninic̣iye kte cin waśtedakapi kin hena owasin koya.

⁹ Kohanna en mayahi kta nipa ac̣iciya wo.

¹⁰ Demas he amayuśtan, wiconi kin de waśtedake c̣a Thessalonike ekta kihda, Kreskes Galatia ekta, qa Titos Dalmatia ekta.

¹¹ Lukas kiciśnana waun; Markos icu qa kici u wo, he iye wicoḣan kin de en omakiya ece.

¹² Tocikos Ephesos ekta ye waśi.

¹³ Yau kinhan, Troas ekta Karpos śina emicihnake waśi qon he au wo, qa naken wowapi kin hena, tahasaka owapi kin ena iyotan.

¹⁴ Aleksander mazazi kage cin he taku śica ota iyamaonpa; iye oḣan kin on Italican kin kicicajuju nunwe.

¹⁵ He on waktaya un wo; wicoie unyaotaninpi qon he nina kipajin.

¹⁶ Tokaheya wowahdake ciqon he ehan tuwedan micica śni, qa owasin inamatanpi, he wicakiciyawapi śni nunwe.

¹⁷ Tuka hececa eśta, Itancan kin mici inajin, qa waśagmaye, c̣a hecen miye on woyakapi kin tanyan sdonyapi kta, qa Ikcewicaśta kin owasin naḣonpi kta; qa mnaja i kin etanhan emahdakupi.

¹⁸ Nakun Itancan kin wicoḣan śica owasin etanhan emahdaku kta, qa wokiconze maḣpiya ekta un kin he en nimaye kta. He iye wowitan owihanke wanin kiciun nunwe.

¹⁹ Priskila qa Akula napewicayuza wo, qa nakun Onesiphoros tiyohnaka tawa kin.

²⁰ Erastos Korinth ekta yanka. Miletos ekta Trophimos wayazanka eḣpeya wahdicu.

²¹ Nahaḣin waniyetu śni u kte ḣinca wo. Yubulos nape niyuza, qa nakun Pudens, qa Linos, qa Klauda, qa hunkawanjin kiciyapi kin owasin.

²² Jesus Messiya Itancan kin ninagi kici un nunwe. Wowaonśida nicipi un nunwe. Amen.