II. Timotheos 3 - Dakota Wowapi Wakan Kin

¹ He de sdonya wo, anpetu ihankeya kin en taku teḣika e u kta.

² Hehan wicaśta kin waśteic̣idapi kta, mazaska waśtedakapi, wamnaic̣idapi, waḣanic̣idapi, hunkakeyapi kin anawicakigoptanpi śni, wapidapi śni, owotanpidan śni;

³ Cinca cantekiyapi śni, woope kicaksapi, waaiapi sa, iyatahdeic̣iyapi sa, ohitiic̣idapi, qa taku waśte śicedapi;

⁴ Wicahnayanpi sa, wacinkopi, watankaic̣idapi, magagaic̣iyapi kin he iyotandapi, qa Wakantanka iyotandapi śni.

⁵ Wakantanka awacinpi kin wiyacinpi kin yuhapi, tuka wowaśake kin he wicadapi śni; tona hececapi kin hena etanhan ihdamna wo.

⁶ Hena hececapi kin tipi naḣmana tin ipi, qa winoḣinca wacintonpi śni, woaḣtani hduśakapi, qa śicaya wacin yuzapi on icunonpa ayapi;

⁷ Ohinniyan waonspeiciciyapi keś wowicake adonyapi kin ehan ipi okihipi śni kin wayaka awicayapi ece.

⁸ Unkan, Jannea qa Jambres hena Moses kici akinicapi qon he iyecen, dena iś eya wowicake kin en ibotopi, wicaśta tawacin śicapi, qa wacinyanpi kin ayuśtanpi.

⁹ Tuka dena e sanpa iyoopta aye kte śni, witkotkopike cin owasin en tanin kta, hena e qe econpi qon iyececa.

¹⁰ Tuka niye wowaonspekiye mitawa kin tanyan sdonyaya, mioḣan kin, token mic̣iconze cin, wacinwaye cin, wawacipkta mduza tanka kin, wacanwakiye cin, waḣbayedan awape kin,

¹¹ Teḣiya makuwapi kin, makakije cin, tona mahiyahde kin, Antiyoka ekta, Ikoniyon ekta, Lustra ekta, hena śicaya makuwapi kin mahiyahde; unkan owasin etanhan Itancan kin emahdaku.

¹² Qa tona Jesus Messiya en owotanna oḣanyan cinpi kin hena owasin śicaya wacakuwapi kta.

¹³ Tuka wicaśta śica, wicahnayanpi sa ko, hena sanpa śicapi kta, wicahnayanpi qa nakun hnayanpi kta.

¹⁴ Hececa tuka niye qe taku onnispe, qa wicayada kin hena en un wo, tokiya tanhan onnispe kin he sdonyaya.

¹⁵ Qa honikśiyoqopa kin ehantanhan Wowapi wakan sdonyaya, he niniyan on ksamniye kta okihi, Jesus Messiya wacinyanpi kin ecijatanhan.

¹⁶ Wowapi wakan ocowasin Wakan tanka Taniya kin eciyatanhan, qa waonspekiyapi, wiyopeyapi, owotanna kagapi, qa wicoḣan waśte en onspewicakiye cin he okihi.

¹⁷ Hecen Wakan tanka wicaśta tawa kin ecedan un kta, qa wicoḣan waśte owasin on hduśtanpi kta.