II. Timotheos 2 - Dakota Wowapi Wakan Kin

¹ He etanhan, micinkśi, Jesus Messiya towaonśida kin he en wakiśaka wo.

² Qa miye etanhan taku nayaḣon, wicota yaotaninpi qon, hena wicaśta wacinyepica, tona tokan onspewicakiya okihipi kin, hena wicaqu wo.

³ Qa niye nakun Jesus Messiya taakicita waśte kin iyecen taku teḣika en waditaka wo.

⁴ Tuwe ozuye econ kinhan, he taku wiconi kin de wicoḣan kin en ihdupemni śni, tuwe taakicitaye cin he iyokipiye kte cin heon.

⁵ Qa tuwe ohiye wacin econ kinhan, qa wakiconzapi kin ecen econ śni kinhan, he wateśdagkicatonpi śni ece.

⁶ Wicuśta wakicanye cin he ḣtani kinhan, iye tokaheya taku icage cin etanhan yute kta.

⁷ Taku epe cin he awacin wo. Qa Itancan kin taku owasin okaḣniḣniyan nunwe.

⁸ Wotanin waśte mitawa kin eciyatanhan, Jesus Messiya, Dawid wicowazi tawa kin etanhan, he wiconṭe etanhan ekicetuyapi kin he kiksuya wo.

⁹ Qa iye on wicaśta wabotice cin iyecen kakiśniayanpi, makaśkapi kin he en; tuka Wakantanka oie kin he kaśkapi śni.

¹⁰ He etanhan tona wicakaḣnigapi qon hena on taku owasin iyowinwaya, hena e wiconi Jesus Messiya en un kin he yuhapi kta, qa nakun owihanke wanin wowitan kin.

¹¹ Wicoie kin de wicakapi; Iye kici unṭapi kinhan, nakun kici unnipi kta;

¹² Iye on unkakijapi kinhan, kici wicaśtayatapi unyakonpi kta. Qa unkiye eḣpeunyanpi kinhan, iś eya eḣpeunyanpi kta.

¹³ Qa wacinunyanpi śni eśta, iye wacinyepica un, ihduecinśniyan kta okihi śni ce.

¹⁴ Hena taku kin kiksuyewicaye c̣a, Itancan kin itokam, wicoie wawokihi śni, tona naḣonpi kin wicahnaye cin hena on akinicapi kte śni e iwahokonwicakiya wo.

¹⁵ Wakantanka iyokipiyaye kta, wicaśta wakage cin iśtece kta iyecece śni kin heca e nihdutanin kta, qa wowicake wicoie kin owotanna yapamni kta e aic̣iciya wo.

¹⁶ Tuka iapi śica ecinśniyan kin he nakicipa wo, he iyotan wicośice ekta icaḣ aye kta.

¹⁷ Unkan wicoie tawapi kin śiyaka śica wan iyecen Waihangye kta; Yumeneos qa Philetos hena hececapi;

¹⁸ Hena wowicake kin icunonpa iyayapi qa, Woekicetu kin wanna yuśtanpi ce, eyapi, qa heon wanjikji wacinyanpi kin etanhan wicayahomnipi.

¹⁹ Hececa eśta, Wakantanka ahehde tawa kin sutaya he c̣a ipuspe kin de en un; Itancan kin tona tawa wicaye cin hena sdonwicakiya. Qa nakun, Tuwa Messiya caje kin hoyekiye cinhan, he woaḣtani ayuśtan kta ce.

²⁰ Tuka tipi tanka wanji ohna mazaskazi, qa mazaska wakśica hecedan śni, nakun can, qa maka wakśica ko yukan, hunḣ taku waśte, qa hunḣ taku śica on yuhapi.

²¹ Hecen on, tuwe hena taku kin etanhan itpakinte cinhan, he wakśica waśte kin heca kta, ecedan, qa Itancan kin wowinyunye kta e iyokipi, qa wicoḣan waśte owasin on yuśtanpi:

²² Kośka cantiḣeyapi śice cin hena nakicipa wo; tuka wicoowotanna, wowacinye, wacantkiyapi, wookiye ko, henakiya tona cante ecedan on Itancan cekiyapi kin hena om en opa wo.

²³ Tuka wiwangapi okaḣniḣpica śni ecinśniyan kin hena en yeic̣iye śni wo, hena wicokicize kaga esdonyaya.

²⁴ Unkan Itancan taokiye kin he wicakis un kte śni; tuka owasin en waḣbayedan un kta, waonspekiye c̣a, wawacinkta yuza tanka kta:

²⁵ Qa tona tokaic̣iya unpi kin hena iwahnana wahokonwicakiye kta, okinni Wakantanka ihduecetupi wicaqu kta, hecen wowicake kin iyukcanpi kta.

²⁶ Qa hecen, tona Wakanśica tohan cin eca, wayaka awicahda ece kin hena mazaḣtakiyapi tawa kin etanhan ihduśpapi kta.