II. Korinth 8 - Dakota Wowapi Wakan Kin

¹ Mihunkawanji, Wakantanka towaonśida Makedonia okodakiciye kin en yutaninpi qon he sdonyeciciyapi.

² Hena wokakije tanka en nina iyuśkinpi, qa iyotan waḣpanica unpi kin he etanhan taku ota iyokipiya wicaqupi.

³ Okihipi kin iyacinyan, (miś mdaotanin,) qa okihipi kin kapeya, iye cinka wicaqu wacinpi.

⁴ Qa wocekiye ota on ceunkiyapi, taku wicaqupi kin he, qa tona ecedan un kin wicakipamnipi wawokiyapi kin he nakun unkicupi kte.

⁵ Qa unkecinpi qon iyecece śni, tuka tokaheya iye tancanpi kin Itancan kin ic̣ic̣upi, qa nakun Wakantanka tawacin kin eciyatanhan unkiyepi kin en ic̣ic̣upi.

⁶ Hecen Titos ceunkiyapi, niyepi en wanna tokaheya hecon kin, he iyecen wowaonśida kin de nakun niciyuśtanpi kta.

⁷ Heon taku owasin on winijicapi, wacinyanpi, qa iapi, qa wosdonye, qa wicamniheca owasin, qa waśteunyakidapi ko, he iyecen wowaśte kin de on nakun winijicapi kta.

⁸ Wicoope eciyatanhan hena hepe śni, tuka wicaśta tokeca aic̣iciyapi kin heon; qa wacanyakiyapi kin he wowicake kinhan imdute kta.

⁹ Jesus Messiya Itancan unkiyapi towaonśida kin he sdonyayapi, watonka tuka niyepi on waḣpaniic̣iya, hecen iye waḣpanica kin on winijicapi kta.

¹⁰ Unkan he de on wahokonciciyapi; niye decanonpi kta iyececa, wanihan sanpa hecanonpi kta e niciconzapi, qa wiyeya yaunpi kin heon etanhan.

¹¹ Nakaha woecon kin he hduśtan po, kohanna wicayadapi qon he iyecen taku duhapi kin etanhan ecen ecanonpi kta.

¹² Tokaheya wicadapi yuke cinhan, wicaśta taku yuhe cin he eciyatanhan iyokipiya icupi ece, qa taku yuhe śni kin eciyatanhan śni.

¹³ Wicaśta tokeca oziic̣iyapi kta, qa niye duśakapi kte cin hee śni; tuka akiyecen unpi kta; heon nakaha wijinya yuunpi kin he hena taku iwicakakije cin en un kta;

¹⁴ Qa iś iyepi nakun wijicapi kinhan, wicakiśya yaunpi kin en oniciyapi kta; hecen akiyececapi yuke kta.

¹⁵ Wowapi en kagapi qon iyececa; Tuwe ota pahi kin he takudari ohdapte śni, qa tuwe waniqadan pahi kin he takudan icakiś un śni ce.

¹⁶ Tuka Wakantanka wopida uha nunwe, he niyepi on Titos hecen cante yuskiya.

¹⁷ Awicakehnn wahokonkiyapi kin anagoptan; tuka iye ḣinca inaḣni, qa kohanna niyepi kin ekta ye wacin.

¹⁸ Unkan he kici hunkawanjinkiciyapi wan, wotanin waśte on okodakiciye owasin en yatanpi kin hee ekta ye unśipi.

¹⁹ Qa hecedan śni, tuka kici ohnihde unyakonpi kta e he okodakiciye kin kaḣnigapi, Itancan kin yatanpi kta, qa unkiye de iyokipiya econkupi kta e heon taku ituḣanpi kin de en ounkiyapi kta.

²⁰ Qa taku ota unpamnipi kin de on tuwedan unhapi kte śni e he unkakitapi.

²¹ Taku waśte ece unkihnipi kta, Itancan kin itokam, qa nakun wicaśta kin en.

²² Unkan hena om hunkawanjinunyanpi kin yeunśipi, he wanna ota unkiyukcanpi, owotanna oḣanyan ece, qa nakaha iyotan aic̣iciya, tanyan wacinniyanpi nakaeś.

²³ Hecen Titos he kapi hecinhan, he mitawaśi qa niyepi on omakiye cin hee; qa hunkawanjinwicunyanpi kin hena eepi kinhan, okodakiciye yewicaśipi qa Messiya towitan kin hena eepi ce.

²⁴ Heon etanhan, hena en, qa okodakiciye kin wicitokam, wacanyakiyapi kin, qa unniyatanpi qon he nakun wicakipazo po.