II. Korinth 7 - Dakota Wowapi Wakan Kin

¹ Heon waśtecicidapi kin, wahoyapi kin dena unhapi kin heon wicaceḣpi wicanagi ko taku aśape cin etanhan unhduecepidan, qa Wakantanka kokipeyahan wicoowotanna kin tanyan unhduśtanpi kta.

² Anaungoptan po; unkiye tuwedan śicaya ecawicunkiconpi śni, tuwedan wicunyuśicapi śni, tuwedan taku icakiś wicunyanpi śni.

³ He wayaco hepe śni; cante en unniyuzapi, ptaya unṭapi qa iś unnipi kta ce, epe ciqon.

⁴ Niyepi on wadimatake ḣinca, niyepi on nina imawinkta; wocantohnake omajudan, unkakijapi owasin en nina imduśkin.

⁵ Makedonia en unhipi qehan, unceḣpipi kin takudan oziic̣iye śni, tuka taku owasin on iyounkiśicapi; tankan tanhan wicokicize, qa mahen tanhan wokokipe.

⁶ Tuka Wakantanka tona iyokiśicapi iwicakiye cin he cantohnag mayan, Titos hen hdi kin heon:

⁷ Qa he hdi kin hecedan śni, tuka nakun niye cantohnagyayapi kin heon; nina wacin en yeyayapi, qa iyoniciśicapi, qa token cante en unyakiduzapi kin hena unkokiyakapi qehan, nina imduśkin.

⁸ Wowapi wan on iyokiśnciyapi eśta, neon nakaha iyopemiciye śni, iyopemic̣iya tuka qon. He wowapi kin ptenyedan iyokiśinniyanpi wanmdaka.

⁹ Nakaha imduśkin, iyokiśinniyanpi kin heon etanhan śni, tuka nihduecetupi kta e on iyoniciśicapi kin heon. Wakantanka eciyatanhan iyokiśinnic̣iyapi, hecen takudan icakiś uuniyanpi śni.

¹⁰ Wakantanka eciyatanhan iyowicakiśice cin he ihduecetupi on wiconi kta, on tohinni iyopeic̣iyapi śni kin he kaga; tuka wicoic̣age kin de en iyowicakiśice cin he wiconṭe icaḣya.

¹¹ Wanyaka po, Wakantanka eciyatanhan iyoniciśicapi kin he itonpeya nicagapi, waayuptapi, qa wośihda, qa wokokipe, qa cante en hiyeyapi, qa winawizipi, qa hdajujupi kin hena niyepi en icaḣniciyapi; taku owasin on, he econpi qon en, takudan iyanionpapi śni yaunpi e nihduotaninpi.

¹² Heon wowapi cicagapi, tuwe śicaya econ qon he on etanhan śni, qa tuwe śicaya ecakiconpi qon he on etanhan śni, tuka Wakantanka itokamya token wacin en unniyuzapi kin he niyepi en yutaninpi kta.

¹³ Heon etanhan iniciyapi kin on unkikiyapi; qa Titos iyuśkin kin heon miś eya nina imduśkin, iye nagi kin niyepi owasin eciyatanhan magagayapi kin heon etanhan.

¹⁴ Heon ciyatanpi qa owakiyaka eśta, on imaśtece śni; tuka taku owasin eciyatanhan eciciyapi qon, he iyecen Titos en ciyatanpi kin he nakun wowicake.

¹⁵ Unkan niye owasin token anayagoptanpi, qa wokokipeya, cancanyan iyowmyakiyapi qon he kiksuya eca, iye iyotan cante en niyuzapi.

¹⁶ Heon etanhan, taku owasin on wicacidapi kin heon miś eya imduśkin.