II. Korinth 6 - Dakota Wowapi Wakan Kin

¹ Heon iye kici ḣtaunnipi iyecen, niyepi nakun ceunniciyapi ce, ituḣ Wakantanka towaonśida kin iyacupi kte śni.

² He iye kaken eya, Omaka oiyokipi kin en naciḣon qa wiconi anpetu kin en ociciya: Iho nakaha omaka oiyokipi kin hee; nakaha wiconi anpetu kin he dee.

³ Takudan on tuwedan ibotounyanpi śni, hecen wawokiyapi kin he bapi kte śni:

⁴ Tuka Wakantanka taokiye unyaupi kin he taku owasin on unkihduotaninpi ece, wacintankapi kin en, wokakije en, waḣpaya unnicapi kin en, woiyokiśice en;

⁵ Apapi kin en, kaśka hnakapi kin en, yuomdecapi kin en, wicoḣtani kin en, kiktahan unpi kin en, wotektehdapi kin en;

⁶ Ecedan unpi kinon, wosdonye kin on, tehan apepi kin on, wacantkiyapi kin on, Woniya Wakan kin on, awicakehan waśtedakapi kin on;

⁷ Wowicake oie kin on, Wakantanka towaśake kin on, wicoowotanna wipe, etapa qa catkatanhan unpi kin on;

⁸ Wowitan qa wowiśtece kin ohna; waaiapi qa yaonihanpi kin ohna; wicahnayanpi kin iyececa, tuka wicakapi;

⁹ Sdonyapi śni un kin iyeuncecapi, tuka tankaya sdonunyanpi; ṭapi se iyecen unyakonpi, tuka ito unnipi; unkaśtakapi, tuka nahanḣin unktepi śni;

¹⁰ Iyokiśicapi iyeuncecapi, tuka ohmniyan wiunyuśkinpi; waḣpanicapi kin iyeuncecapi, tuka wicota watonka wicunkagapi; takudan yuhapi śni kin iyeuncecapi, tuka taku owasin untonpi.

¹¹ Korinth oyate kin, niyepi on i unhdukawapi, uncantepi kin tanka aya.

¹² Unkiyepi en takudan aoṭins niyanpi śni, tuka niye nicautepi kin en oṭins nic̣iyapi.

¹³ Hehan iyunwin kin de mayaqupi kta; micinca kin iyecen ociciyapi; niś eya tankaya nicicagapi nunwe.

¹⁴ Ihnuhan tona awacin śni un kin hena en ecinśniyan iyanihdaśkapi kinhan. Token wicoowotanna woaḣtani kici tidan kta he; qa token iyoyanpa kin otpaza kici un kta he:

¹⁵ Qa Messiya Belial kici token okonwanjidan cante yuzapi he; qa tuwe wicada kin he wicada śni un kin kici taku akiptan tawapi kta he;

¹⁶ Qa tipi wakan Wakantanka tawa kin he wakagapi kin kici token un kta he. Wakantanka ni un tipi wakan tawa kin he niyepi. Wakantanka heye ciqon he iyececa; Hena om wati kta, qa om mawani kta. Hena Wakantanka mayanpi kta, qa mitaoyate kin hena eepi kta ce.

¹⁷ Heon etanhan hena cokaya tanhan tankan upi, qa icunonpa un po, Itancan kin eya, qa taku aśape cin oyutanpi śni po, kinhan miś tawa ciyapi kta;

¹⁸ Niye ate mayayapi kta, qa miye cinkśi ciyapi qa cunkśi ciyapi kta ce, Itancan Iyotan Waśake cin he hena hecen eya.