II. Korinth 5 - Dakota Wowapi Wakan Kin

¹ Makata wakeya unkitawapi kin de yujujupi kinhan, Wakantanka ticage cin tipi nape codan kagapi kin, maḣpiya ekta, owihanke wanin yanke cin he unhapi e sdonunyanpi.

² Qa de ohna comniunhdazipi, qa tipi unkitawapi maḣpiya eciatanhan un kin he kounyakapi ta e cantounkpanipi.

³ He kounyakapi kinhan, tancodan unyakonpi kte śni.

⁴ Wakeya kin de ohnaunkanpi kin hehanyan comniunhdazipi, unśakapi kin heon. Wokoyake unhduśdokapi kin he uncinpi śni, tuka kounyakapi kta: Hecen wiconi e wiconṭe ocowasin napce kta.

⁵ Tuwe he en icaḣunyanpi kin he Wakantanka ee; qa he Woniya tokaheya kin wanna unqupi.

⁶ Heon ohinniyan cante unwaśtepi, qa tohanyan wicatancan kin ohna unkanpi kin hehanyan Itancan kin itehanyan unyakonpi kin he sdonunyanpi.

⁷ Wacinyanpi eciyatanhan maunnipi, qa wawanyakapi kin eciyatanhan śni.

⁸ Cante unwaśtepi, tuka tancan kin de ohna unkanpi śni, qa Itancan kin kici unyakonpi kta e he iyotan uncinpi ece.

⁹ He de aic̣iciya unkakitapi, ekta kici unyakonpi, qa iś den unkanpi, unma tukte kaśta, iyokipiunyanpi kte cin he.

¹⁰ Owasin Messiya tawoyaco oiyotanke kin itokam taninyan inaunjinpi kta, otoiyohi taku iye tancan kin ohna oḣanye cin hena icu kta, token econ qon eciyatanhan, he waśte qa śica unma tukte kaśta.

¹¹ Itancan wohitike cin he sdonunyanpi kin, heon wicaśta cin wicunkiyapi; Wakantanka en unkihdaotaninpi, qa nakun widukcanpi kin en unkihdaotaninpi wacanmi.

¹² Ake niyepi en unkihdatanpi śni, tuka unkiyepi on iniwinktapi kta e okihi unniyanpi; hecen tona cante kin eciyatanhan śni, tuka itohnake kin on iwinktapi kin hena ekta, taku on iniwinktapi kte cin duhapi kta.

¹³ Wacinunhnunipi hecinhan, he Wakantanka on etanhan; qa wacinunksapapi hecinhan, he niyepi kin on etanhan.

¹⁴ Messiya wacantkiye cin he iyounpaśtakapi ece.

¹⁵ Qa he de unkiyukcanpi, wanji owasin on ṭe cinhan hehan owasin ṭapi tuka; qa owasin on ṭe cin, heon tona nipi kin hena iś iyepi on nipi kte śni, tuka tuwe hena on ṭe c̣a ake kini kin hee on nipi kta.

¹⁶ Heon etanhan, detanhan wicaceḣpi eciyatanhan tuwedan sdonunyanpi śni; han, Messiya hee wicaceḣpi eciyatanhan sdonunyanpi eśta, nakaha detanhan sdonunyanpi śni.

¹⁷ Hecen tuwo Messiya en un kin he wanna wicaśta teca; taku tannike cin hena enakiyapi; iho, taku owasin teca icaga.

¹⁸ Qa taku owasin Wakantanka etanhan un, he iye kici okiciciye unkiyapi, Jesus Messiya eciyatanhan, qa wookiye wawokiyapi kin he unqupi.

¹⁹ Hecen Wakantanka Messiya on, wicoicage kin, iye kici, okiciciye wicaye c̣a, waḣtanipi kin wicakiciyawa śni; qa wookiye wicoie kin he yuhe unkiyapi.

²⁰ Heon Messiya on wawiciyapi kin unkiyepi, unkiyepi eciyatanhan Wakantanka ceniciyapi kin iyececa, Messiya caje on ceunniciyapi, Wakantanka kici okiciciya po.

²¹ Tuwe woaḣtani sdonkiye śni un qon he, unkiyepi on woaḣtani kagapi; hecen iye en Wakantanka toowotanna unkicagapi kta.