II. Korinth 4 - Dakota Wowapi Wakan Kin

¹ Heon etanhan wawokiyapi kin de unhapi kin, wowaonśida unkicupi kin heon wacin ibounśakapi śni.

² Tuka taku wowiśtece naḣmana un kin hena eḣpeunyanpi, qa wicahnayanpi kin en maunnipi śni, qa wohnaye yuha Wakantanka oie kin unkiciyuhapi śni, tuka wowicake yaotaninpi kin on wicaśta owasin wiyukcanpi kin ekta unhdaotaninpi, Wakantanka itokam.

³ Wootanin waśte unkitawapi kin he anaḣmanpi hecinhan, tona takunipi śni kin hena anawicakiḣmanpi.

⁴ Hena ekta wicoicage kin de taku wakan tawa kin tona wicadapi śni wicotawacin kin wacinton śni wicakaga; Messiya Wakantanka ouncage kin hee, tawootanin waśte wowitan iyoyanpa kin he iyoyamwicaye kte śni heon etanhan.

⁵ Unkiye unkihdaotaninpi śni, tuka Messiya Jesus Itancan kin he unyaotaninpi ece; qa unkiye Jesus on ookiyewicayayapi kin.

⁶ Wakan tanka iyoyanpa kin otpaza etanhan yege śi qon he uneantepi kin iyoyamunyanpi, Jesus Messiya itohnako kin eciyatanhan, Wakantanka towitan wosdonye iyoyanpa kin unqupi kte cin heon.

⁷ Tuka woyuha kin de maka cega ohna unhapi, hecen wowaśake tanka kin Wakantanka etanhan un kta, qa unketanhanpi kte śni.

⁸ Ihdukśantanhan aoṭinsunyanpi, tuka unkahdaskicapi śni: wacinhnuni unyanpi, tuka takudan wacinye śni kin heuncecapi śni.

⁹ Śicaya unkuwapi, tuka eḣpeunyanpi unyakonpi śni; makata eḣpeunyanpi, tuka ihang unyanpi śni.

¹⁰ Ohinniyan untancanpi kin en Jesus Itancan ṭe cin he yuha unkanpi, hecen Jesus wiconi tawa kin untancanpi kin en taninyan un kta.

¹¹ Unkiye unnipi kin Jesus on ohinniyan wiconṭe en iyaye unyanpi, Jesus wiconi tawa kin unceḣpipi ṭe kte cin en atanin kte cin heon.

¹² Hecen unkiyepi kin en wiconṭe oḣanyan un, tuka niyepi kin en wiconi.

¹³ Unkiye wowacinye woniya kin de unhapi, wowapi en kagapi qon iyececa; Wicawada kin heon iwaa ce; unkiś eya wicaundapi kin heon unkiapi ece.

¹⁴ Qa tuwe Jesus Itancan kin piya ekicetu ye ciqon, he Jesus eciyatanhan, ake ekicetu unyanpi kta, qa niyepi kin om sutaya he unkiyapi kta e sdonunyanpi.

¹⁵ Niyepi kin on etanhan taku owasin ecen un, hecen wowaonśida tanka kin, wicota wopida eyapi kin on sanpa ota aye kta, Wakantanka towitan kin on.

¹⁶ Heon wncin ibounśakapi śni, tuka wicaśta akantanhan unkitawapi kin he takuni śni ay a eśta, wicaśta mahen tanhan un kin he anpetu iyohi yutecapi.

¹⁷ Unkakijapi cistinna, qa ptecedan kin he wowitan ota ḣinca, ota ḣinca, owihanke wanin tke ḣinca unkicagapi kta.

¹⁸ Icunhan taku wanyakapi kin hena ekta unketonwanpi śni, tuka taku tona wanyakapi śni kin hena ekta ewauncinpi. Taku tona wanyakapi kin hena ihanke kta, qa taku tona wanyakapi śni un kin hena owihanke wanica.