II. Korinth 3 - Dakota Wowapi Wakan Kin

¹ Ake unkihdatanpi unkayapi he; qa wicaśta wanjikji iyecen waayatanin wowapi nicagapi kte cin heca uncinpi he; qa iś waayatanin wowapi unyecagapi kta uncinpi he.

² Wowapi unkitawapi unkicantepi kin ekta owapi kin he niyepi, wicaśta owasin sdonyapi qa yawapi;

³ Messiya tawowapi taninyan oyakapi unkiye unkagapi kin; mini sapa on kagapi śni, tuka Wakantanka ni un kin Taniya kin on owapi; inyan mdaska kin en un śni, tuka wicacante conica kin he en.

⁴ Unkan Wakantanka ekta Messiya eciyatanhan woawacin kin de unhapi.

⁵ Unkiye cinka taku unkiyukcanpi kta unkokitpanipi, unkiyepi atayedan, taku unkokihipi kin he Wakantanka eciyatanhan.

⁶ Iye wicotakuye teca kin en ookiye wawokihika unkagapi, oowa kin he en un śni, woniya kin hee en; oowa kin he waṭeya, tuka woniya kin he waniya ece.

⁷ Wiconṭe wawokiyapi kin he owapi, qa inyan akan pagopiqon he wowitan yuhe cin, on Israel cinca kin Moses itohnake wiyatpa kin he opaḣta yukanpi kta okihipi śni hecinhan, wowitan kin he enakiyapi tuka;

⁸ Hecen Woniya wawokiyapi kin he sam iyeya nina wowitan kte śni he.

⁹ Woyaco wawokiyapi kin he wowitan hecinhan, wicoowotanna wawokiyapi kin he sanpa nina wowitan kta.

¹⁰ Qa taku yuwitanpi qon he taku wanji on wowitan śni, taku iyakapeya wowitan kin hee on etanhan.

¹¹ Qa taku enakiyapi qon he wowitan kin hee hecinhan, taku ecen he cin he iyotan wowitan kin ee.

¹² Woape hececa unhapi kin heon nina wadiuntakapi ece.

¹³ Unkan Moses ite akaḣpe wan itohnake kin akaḣpe kiton kin he iyecece śni, taku enakiyapi kin owihanke kin hehanyan Israel cincapi kin ekta etonwan okihipi śni kin heon etanhan.

¹⁴ Tuka iye tawacinpi kin aotpasyapi: qa anpetu kin dehanyan Wowapi Wakan tanina kin yawapi eca, ite akaḣpe kin he eyakupi śni ecen un; he Messiya eciyatanhan eyakupi tuka.

¹⁵ Tuka anpetu kin dehanyan, Moses yawapi eca, ite akaḣpe kin he iye cantepi kin akaḣpa.

¹⁶ Tuka tohan Itancan kin ekta yuhomnipi kinhan, hehan ite akaḣpe kin he yuzamnipi kta.

¹⁷ Woniya kin he Itancan kin ee, qa tukten Itancan taniyakin un kin, hen tawa ic̣iyapi yukan.

¹⁸ Tuka unkiye owasin itohnake kin en takudan unkaḣpapi śni, ihdiyomdasin en wawanyakapi kin iyecen Itancan towitan kin wauunyakapi, qa iye ouncage kin iyecen unkagapi, wowitan sanpa wowitan kin en, Itancan Taniya kin on etanhan iyececa.