II. Korinth 2 - Dakota Wowapi Wakan Kin

¹ Miye qe hecen mihdukcan, ake iyokiśinya ekta ciupi kte śni.

² Miye iyokiśinciyapi kinhan, tuwe iyuśkinmaye kta he; iyokiśinwaye cin hee kta.

³ Hecen on he wowapi cic̣agapi, ekta wau kinhan tona on imduśkin kte cin hena on etanhan iyokiśin waun kte śni. Qa niyepi owasin wacinciyapi, mitowiyuśkin kin he en niyepi owasin oyapapi kta.

⁴ Wicokakije tanka, qa wicocanteśica, qa iśtamnihanpe ota ehna wowapi cicagapi qon, iyokisinniyanpi kte cin heon hecamon śni; tuka nina canteciciyapi kin he sdonyayapi kte cin heon.

⁵ Tuwe iyokiśicapi kage ciqon he miye iyokiśinmaye śni; tuka niye nihunḣnanpidan, owasin cibapi kte śni.

⁶ He tuwe kin hecen yacopi qon, wicota econpi kin hecehnana kta.

⁷ Heon nakaha wicośta kin he iyuśkinyayapi, qa yecanptapi kta, okinni nina iyokiśice cin on ktepidan kta.

⁸ Heon ceciciyapi ce, he cante en duzapi kin hduotanin po.

⁹ Taku owasin on waanagoptan yaunpi hecinhan, iciyukcanpi kte cin heon wowapi cicagapi qon.

¹⁰ Tuwe taku yecicajujupi kinhan, miś eya hecamon, qa tuwe taku wecicajuju kin he niyepi kin on wecicajuju, Messiya itokam.

¹¹ Hecen Satan ohiunyanpi kte śni; iye token ic̣iconze cin sdonunyanpi.

¹² Troas ekta Messiya tawoo tan in waśte yuha wahi, qa Itancan kin tiyopa wan makiyuzamni;

¹³ Hehan minagi ekta cante waśteya waun śni, Titos mihunkawanji kin hen iyewaye śni kin heon; hecen hena nape wicamduze c̣a, hetanhan Makedonia ekta imdarada.

¹⁴ Wakantanka, ohinniyan Messiya on ohiye unyanpi, qa ohinniyan unkiyepi kin on tawosdonye woomna yaotanin kin, hee wopida yuha nunwe.

¹⁵ Wakantanka ekta, Messiya on woomna waśte kin he unkiyepi, tona wiconi yuhapi kta, qa nakun tona yutakunipi kte śni kin hena en.

¹⁶ Dena iś ṭapi kta e wiconṭe oomna kin he unkiyepi, qa hena e nipi kta e wiconi oomna kin he unkiyepi; qa tuwe hena taku kin okihi he.

¹⁷ Wicota Wakantanka oie kin hnayan kuwapi kin hena iyeuncecapi śni; tuka wowicake eciyatanhan, tuka Wakantanka eciyatanhan, qa Wakantanka itokam, Messiya unkoyakapi ece.