II. Korinth 13 - Dakota Wowapi Wakan Kin

¹ De iciyamni ekta ciupi; waayatanin nonpa qa yamni ipi kin on wicoie owasin yasutapi kta.

² Ociciyakapi qon he ake nakaha ociciyakapi, icinonpa ekta waun kin iyececa; qa nakaha en waun śni, tona toka waḣtanipi, wicaśta tokeca ko owasin, wowapi wicawecaga, ake ekta wai kinhan itonwicawape kte śni.

³ Miye mahen tanhan Messiya ie cin on wowapetokeca ayakitapi kin heon etanhan; he niyepi ekta taku okitpani śni, tuka niyepi kin en waśake ḣinca.

⁴ He iye wowaśake śni on can susbeca kin en okatanpi eśta, Wakantanka towaśake kin on ni un. Heon unkiś eya waunśakapi śni, tuka niyepi kin ekta Wakantanka towaśaae kin on kici unnipi kta.

⁵ Niś niyepi ihdukcan po, wacinyanpi kin en yaunpi hecinhan; tanyan wihduta po. Eḣpeniyanpi śni kinhan, Jesus Messiya niyepi kin mahen un, he sdonyakiyapi śni he.

⁶ Tuka eḣpewicayapi kin heuncapi śni e sdonyayapi kta imdukcan.

⁷ Taku śica takudan ecanonpi kte śni he Wakantanka icewakiya; unkiye unwaśtepi e unyaotaninpi kte cin hee śni, tuka waḣtepi śni kin iyeuncecapi kta eśta, niye taku waśte ecanonpi kte cin hee wacin.

⁸ Taku wowicake kaśeye cin takudan unkokihipi śni, tuka wowicake kin on etanhan.

⁹ Unkiye waunśakapi śni, qa niye waniśakapi eca unkiyuśkinpi ece. Qa tanyan onihduśtanpi kte cin he uncinpi.

¹⁰ Heon etanhan en waun śni icunhan, hena wowapi en wakaga, okinni ekta waun kinhan yaśinya iapi kin ohna iwae kta naceca; wowasake Itancan maqu kin eciyatanhan, he waicaḣyapi kin on maqupi, qa waihangyapi kin on etanhan śni.

¹¹ Ehake, hunkawanjin ciyapi kin, wiyuśkin po; oihduśtan un po, cante wuśte po, okonwanjidan awacin po, wokiyapi kin en un po; qa wowaśte, wookiye ko Wakantanka kin nicipi un nunwe.

¹² Otoiyohi iiputakapi wakan kin on i ikiciputaka po. Wicaśta owotanna un kin owasin i iniputakapi.

¹³ Jesus Messiya Itancan towaonśida kin, Wakantanka towaśtedake kin, qa Woniya Wakan iwicakiye cin niyepi owasin en nicipi unpi nunwe. Amen.