II. Korinth 12 - Dakota Wowapi Wakan Kin

¹ Imawinkta kte cin he iyemicihantu śni, wowihanmde qa Itancan woyakapi tawa kin ekta wau kta.

² Ehanna waniyetu ake topa sam iyeya, wicaśta wan Messiya en un kin he sdonwaya; (wicatancan kin ohna un kin sdonwaye śni, qa tanton śni un kinhan nakun sdonwaye śni, Wakantanka he sdonya;) wicaśta kin he maḣpiya iciyamni kin ekta eyakupi;

³ Wicaśta kin he sdonwaya, (wicatancan kin ohna un sdonwaye śni, qa tanton śni un kinhan nakun sdonwaye śni, Wakantanka he sdonya;)

⁴ He Wakantanka ti kin ekta eyakupi, unkan wicoie oyagpica śni kin naḣon, hena wicaśta oyake kta eśta okitpani kta.

⁵ Wicaśta kin hecece cin on imawinkta kta, qa miye qe on imawinkta kte śni, tuka wamaśake śni waun kin heceedan on.

⁶ Tuka imawinkta wacanmi keś wimatkotkoke kte śni, wowicake epe kta; tuka nakaha hecamon kte śni, tuwe wanmayake c̣a, token waun naḣon kin he isanpa tanka kecanmakin kta he kowakipa.

⁷ Unkan woyakapi tanka kin on etanhan waḣanmic̣ida kte śni heon taku pepe wan miceḣpi kin en maqupi, Satan taokiye wanji hee, śicay a makuwa kta heon, waḣanmic̣ida kte śni heon etanhan.

⁸ Qa heon Itancan kin yamni wocekiye ewakiya, he amayuśtan kte cin heon.

⁹ Hehan, Mitowaonśida kin iyonihi kta, qa mitowaśake kin he wowaśake śni kin en hduśtanpi ce, emakiya. Hecen Messiya towaśake kin miye en miciun kte cin, heon makakije cin on iyuśkinyan imawinkta kta.

¹⁰ Heon etanhan wowayazan kin en imduśkin ece, qa waaiapi, qa iwicakakije, qa śicaya wicakuwapi, qa Messiya on wicokakije kin henakiya en; tohan wamaśake śni eca taku owakihi ece.

¹¹ Iwinktapi kin on witkotkoka imacaga, niye hecon mayakiyapi, mayadaotaninpi kta tuka qon; yewicaśipi iyotan tankapikin takudan en wicihukuya waun śni, mataku śni eśta.

¹² Awicakehan niyepi ekta yewicaśipi wowapetokeca tawapi kin econkupi, wacintankapi owasin en, wapetogtokeca, taku wowinihan, qa waśagya wicoḣan kin hena on.

¹³ Taku e on okodakiciye tokeca kin ihukuya yaunpi he; taku nitawapi kin iwacu śni kin hee naceca. Heon wawaḣtani kin he micicajuju po.

¹⁴ Wanyaka po, iciyamni ekta ciupi kta wiyeya manka, qa nakun taku nitawapi kin iwacu kte śni. Taku yatonpi kin he awakite śni, tuka niyepi atayedan. Cinca yapi kin hunkakepi kin taku wicakihnakapi kin he hecetu śni, tuka hunkake yapi kin hena hokśiyoqopa kin on taku ekicihnakapi kta.

¹⁵ Ninagipi kin on ḣtawani, qa mihdusote kte cin he iyomakipi; tuka iyotan canteciciyapi eśta, aoptetuya waśtemadakapi ece.

¹⁶ Tuka he hecetu, taku nitawapi kin iwacu śni; hececaeśta wamdupike cin heon wohnaye on ciyuzapi, keyapi.

¹⁷ Tona niyepi ekta ye wicawaśi qon hena eciyatanhan, taku mihdamna he.

¹⁸ Titos cewakiye c̣a kici hunkawanjitku wan ekta ye waśi. Niyepi etanhan Titos taku kamna he. Wicoksape okonwanjidan en maunnipi śni he; oye okonwanjidan ohna maunnipi śni he.

¹⁹ Ake niyepi en unkihduwicakapi kecannipi he. Wakantanka itokamya Messiya kin en unkiapi ece. Waśtecicidapi kin, tanyan icaḣniyanpi kte cin heon taku owasin econkupi.

²⁰ Ekta ciupi kinhan, niyepi token wacin kin hececa iyeciyapi kte śni, qa miye nakun token yacinpi śni kin hecen iyemayayapi kta kowakipa. Wakinicapi kin, winawizipi, canniyekici yapi, wicokicize, waaiapi, waajijipi, waḣanicidapi qa owodutaton kin henakiya en un kta kowakipa.

²¹ Qa okinni ekta wau kinhan, niyepi kin en Wakantanka mitawa kin iyokiśin maye kta, qa tona wanna woaḣtani econpi, qa taku aśape cin, wiinaḣmanpi, qa wicawihomnipi econpi kin on iyopeiciyapi śni kin hena awicawakiceye kta naceca, he kowakipa.