II. Korinth 11 - Dakota Wowapi Wakan Kin

¹ Witkotkoya iwae cin cistiyedan iyowinmayakiyapi kta wacin. He iyowinmayakiyapi nakaeś.

² Wakantanka winawizi kin iyecen inaciwizipi, wicaśta wanjidan kiciyus ciyapi, hokśiwinna ecedan un kin Messiya ekta aciipi kta heon.

³ Tuka he kowakipa, wamduśka wohnaye on Ewe hnaye ciqon he iyecen nitawacinpi kin yuśicapi kta, qa woyuecedan Messiya en un kin etanhan iyaye niyanpi kta naceca.

⁴ Tuwe en niupi kin he Jesus tokeca wan unkiye unkoyakapi śni kin he oyaka, qa Woniya tokeca, iyacupi śni qon, he nakaha iyacupi, qa wotanin waśte tokeca, anayagoptanpi śni qon he oniciyakapi kinhan, iyowinyakiyapi kta.

⁵ Miye yewicaśipi iyotan tanka kin takudan ihukuya waun śni, imdukcan.

⁶ Ho magahan eśta, wosdonye kin on waksapa; tuka niyepi kin en taku owasin on tanyan unkihdaotaninpi.

⁷ Wakantanka tawootanin waśte kin iyunwin codan ociciyakapi, qa wankantuya iyeniyanpi kta e on mihduhukuya kin he wawaḣtani he.

⁸ Okodakiciye tokeca kin taku wicawaki, qa opemicatonpi kin iwacu, ociciyapi kte cin heon; qa cicipi waun qa taku imakakije c̣ehan, taku nitawapi kin mun śni:

⁹ Taku iyokpani waun qon he hunkawanjin kiciyapi Makedonia etanhan hipi kin maqupi, qa ohinniyan takudan inagiyeciyapi śni waun, qa eeś nakun hecen waun kta.

¹⁰ Messiya wowicake tawa miciun kin heon Akeya makoce kin en imawinkta kin de ecetu śni makiyapi kte śni.

¹¹ Tokeca he; waśte cicidapi śni kin heon etanhan he. Wakantanka sdonya.

¹² Tuka taku ecamon kin he nakun ecamon kta, hecen tona wiyaonpapi akitapi kin hena etanhan wiyaonpapi kin emdaku kta, qa en iwinktapi kin he unkiyepi kin iyecen unpi kta.

¹³ Hena yewicaśipi itonśni kin hecapi, wohnaye oḣanyanpi, qa Messiya yewicaśi qon hena iyecen ihduzapi.

¹⁴ Qa he taku wowioihan śni, Satan iye kaeś iyoyanpa ohnihde kin iyecen ihduza.

¹⁵ Heon etanhan, iye taokiye kin hena wicoowotanna ookiye kin iyecen ihduzapi kte cin ne taku tanka śni, hena iye wicoḣan kin eciyatanhan ihang yapi kta.

¹⁶ Ake hecen epa; Tuwedan witkotkoke madake kte śni. Tuka hecon kinhan witkotkoke cin iyecen iyowinmakiye kta, cistiyedan mihdatan kta.

¹⁷ Taku epe cin hena Itancan kin eciyatanhan epe śni, tuka nina ihdatanpi kin he on witkoya ie cin iyemaceca.

¹⁸ Wicota wicaceḣpi kin on ihdatanpi kin he iyecen miś eya mihdatan kta.

¹⁹ Witkotkopike cin hena iyokipiya iyowinwicayakiyapi ece, niye yaksapapi nakaeś.

²⁰ Tuwe wowidag niyanpi, tuwe temniyanpi, tuwe wanicipi, tuwe waḣanic̣ida, tuwe ite ohna anipapi hecinhan, iyowinwicayakiyapi ece.

²¹ Waośtehdapi kin he waka, waunsakapi śni kin heon. Tuka taku on tuwe waditake cinhan, witkotkoya iwaa ce, he on miś eya wadimataka.

²² Hena Hebrew wicaśta kin hecapi he. Miś eya hemaca. Hena Israel etanhanpi he. Miś eya. Hena Abraham cinca he. Miś eya.

²³ Hena e Messiya taokiye kin hecapi he; witkotkoke cin iyecen iwaa, miś eya imayotan. Wicoḣtani kin en imayotan; apapi kin en wopteca śni waun; kaśka hnakapi kin en imayotan, qa wiconṭe kin en otakiya waun.

²⁴ Juda oyate zaptan akihde, apapi wikcemna topa wanjidan iyokpani maqupi.

²⁵ Yamni akihde cansakadan on amapapi; wancadan inyan on makininpi; yamni akihde wita wata micamdecapi; anpetu wanjidan hanyetu iyahna ośbe kin mahen waun;

²⁶ Nina icimawani, mini ota wokokipe kin en waun, wakipi sa okokipe kin en, mitaoyate on wokokipe kin en, Ikcewicaśta on wokokipe en, otonwe ekta wokokipe en, ḣewoskantuya wokokipe en, miniwanca ekta wokokipe en, hunkawanjin kiciyapi itonpi śni kin hena ekta wokokipe en;

²⁷ Mdowakiṭa qa nina ḣtawani kin on, ota kiktahan waun kin on, wotektewahda qa imapuza on, ijehan amakiḣan kin on, macuwita qa tancodan waun kin on;

²⁸ Qa tankan tanhan anpetu iyohi taku amaupi kin, okodakiciye kin owasin awanhdakapi kin he nakun.

²⁹ Tuwe waśake śni un, qa miye wamaśake śni he; tuwe aiapi un, qa miye śinwahda śni he.

³⁰ Tuka imawinkta kta iyecece cinhan, wamaśake śni waun kin heon imawinkta kta.

³¹ Jesus Messiya Itancan unkiyapi he Wakantanka tawa, qa Atkuku kin, owihanke wanin wowaśte yuhe cin he sdonmayan, itonśni mawanica.

³² Damaskos en, Aretas wicaśtayatapi yanke cin ihukuya, wicaśta itancan kin akicita ota wicayuha, Damaskos oyate otonwe tawapi kin awanhdake c̣a, maktepi kta akita.

³³ Hehan conkaśke owanyeye wan etanhan, makanyankapi wan ohna, kun hiyumayanpi; qa iye nape kin etanhan nawajica.