II. Korinth 10 - Dakota Wowapi Wakan Kin

¹ Palos he miye, Messiya waḣbayedan qa wacintanka heon ceciciyapi ce, niyepi ekta onśiḣanyan waun, tuka en waun śni ehantanhan, niyepi on wadimataka;

² Tuka ceciciyapi, en waun kinhan, wanjikji wicaceḣpi kin eciyatanhan maunnipi kecanunkinpi kin, hena en waditagya waun kta wacanmi kin he iyecen wadimatake kte śni.

³ Wicaceḣpi kin en maunnipi eśta, wicaceḣpi eciyatanhan unkicizapi śni.

⁴ Wipe unkunpi kin hena wicaceḣpi kin heca śni, tuka waśaka, Wakantanka on, inatake suta kin yujuju ece:

⁵ Wacinyuzapi kin kun eḣpeya, qa taku tehan wankantuya un Wakantanka sdonyapi kin en wankan iyeiciye cin hena owasin, qa wicotawacin iyuḣpa Messiya anagoptanpi kin en wayaka ai ece.

⁶ Qa wanaḣonpi śni kin tounkic̣onpi kta e wiyeya unkanpi; tohan anayagoptanpi kin hduśtanpi kinhan.

⁷ Wicaśta itohnake kin hecedan iwandakapi he. Tuwe Messiya tawa kecanic̣in kinhan, he ake kaken awacin kta: is iye Messiya tawa kin heca he iyecen unkiś unkiyepi Messiya tawa unyanpi.

⁸ Wookihi Itancan unqupi kin, on icaḣunniyanpi kta, qa on ihangunniyanpi kte śni, heon sanpa mihdatan eśta, imaśtece kte śni.

⁹ Wowapi on wakokipe cicagapi kta wacanmi śni.

¹⁰ He wowapi kage cin hena suta qa waśaha, tuka tancan en un kin he waśake śni qa ie cin he wowiḣa ce, eyapi.

¹¹ Tuwe hecece cin he kaken awacin kta, en unkanpi śni wowapi wicoie kin on tounkecapi kin, he tohan en unkanpi kinhan, wicoḣan kin on heuncścapi kta.

¹² Tona ihdatanpi kin hena unkihdacinpi, qa opeya unkihdawapi kta tawaṭenunyanpi śni; hena e iś iye on Wihdutapi, qa iyepi on ihdukcanpi, qa hecen okaḣnigapi śni.

¹³ Unkiye wiunhdutapi kin isanpa unkihdatanpi kte śni; tuka wicoḣan iyutapi Wakantanka unqupi kin he eciyatanhan, iyutapi kin niyepi kin iyahde niyanpi.

¹⁴ Ekta tyahde unniyanpi kta e sanpa unkihdutitanpi śni. Tuka Messiya tawootanin waśte kin en niyepi kaeś ekta unniupi.

¹⁵ Wiunhdutapi kin isanpa unkihdatanpi śni, wicaśta tokeca wicoḣtani kin en; tuka wicayadapi kin he icage cinhan, niyepi on wiyutapi unhapi kin eciyatanhan sanpa unyuonihanpi kta unkapepi.

¹⁶ Hecen niye dukanpi kin akowapa wotanin waśte kin unkoyakapi kta, qa tuwe tokeca taku tawa wiyeya yanke cin en unkiwinktapi kte śni.

¹⁷ Tuka tuwe iwinkta kinhan Itancan kin on iwinkta nunwe.

¹⁸ Tuwe ihdaonihan kin he ecetudakapi kin ee śni, tuka Itancan kin tuwe yaonihan kin hee kta.