II. Korinth 1 - Dakota Wowapi Wakan Kin

¹ Palos, Wakantanka tawacin kin eciyatanhan, Jesus Messiya yeśi qon he, qa Timotheos hunkawanjinkiciyapi wan kici, Korinth ekta Wakantanka taokodakiciye kin, qa Akeya owancaya tona owotanna un kin hena oya, wowapi unnicagapi.

² Wowaonśida, wookiye ko, Wakantanka Ateunyanpi, qa Jesus Messiya Itancan kin etanhan, nicipi un nunwe.

³ Wakantanka Jesus Messiya Itancan unkiyapi he Atkuku, qa waonśidapi en ateyapi, qa Wakantanka owasin wacintonhnag wicaye cin he wowaśte yuha nunwe.

⁴ He unkakijapi owasin en wacintonhnag unyanpi, hecen tona wokakije owasin ehna un kin hena iwicunkiyapi unkokihipi kta, wacintonhnagyapi on Wakantanka unkikiyapi kin he eciyatanhan.

⁵ Hecen Messiya tokakije kin unkiyepi en unkiciyuotapi kin, he iyecen Messiya eciyatanhan wacintonhnag unyanpi kin he nakun unkiciyuotapi kta.

⁶ Kakiśunyanpi eca he wacintonhnag niyanpi, qa ni niyanpi kte cin heon; he wokakije on kakiśunyanpi kin hena yuha okihi wicaye Kta e oḣanyan ece; qa wacintonhnag unyanpi hecinhan, he wacintonhnake niyanpi, qa ni niyanpi kte cin heon.

⁷ Unkan niyepi kin on sutaya wacinunyanpi, wokakije kin en opeya yaunpi kin he iyecen wacintonhnakeyapi kin en oyapapi kta, sdonunyanpi.

⁸ Mihunkawanji, Asiaen token wokakije unhiyahdepi qon he sdonye śni yaunpi kta uncinpi śni, iyotan nina unkakijapi, unkokihipi kin isanpa, hecen unnipi kta unkecinpi śni.

⁹ Tuka unkiyepi kin mahen wiconṭe woyaco kin unhapi, hecen takudan wacinunkic̣iyapi kte śni, tuka Wakantanka wicaṭe cin ekicetu wicaye cin he wacinunyanpi kta:

¹⁰ Iye wiconṭe hinsko tanka etanhan eunhdakupi, qa nakaha ehdaku ece; qa eeś nakun eunhdakupi kta wacinunyanpi:

¹¹ Qa niś eya wocekiye on ounyakiyapi kta, hecen wicaśta ota etanhan, taku unqupi qon he on, unkiyepi on etanhan wicota wopida eyapi kta.

¹² Unkiyuśkinpi kin he unnagipi hdaotanin kin hee, wowicake wowakan ko en okonwanjidan, wicaceḣpi woksape yuhe śni, tuka Wakantanka towaonśida yuha, wicoicage kin ehna unnipi, qa niyepi kin ekta iyotan hececa.

¹³ Taku dawapi, qa sdonyayapi kin hecedan wowapi en unnicagapi; qa owihanke kin hehanyan wicayadapi kta kepce.

¹⁴ Onśpa sdonunyayapi, unkiyuśkinpi kin he niyepi, he iyecen wowitan nitawapi kin he unkiyepi, Jesus Itancan taanpetu kin en.

¹⁵ Hecen wacinmduza, tokaheya niyepi kin ekta ciupi kta tuka, on inonpa wowaśte duhapi kte cin heon.

¹⁶ Qa niyepi kin etanhan iyoopta Makedonia ekta mde c̣a, ake Makedonia etanhan niyepi kin ekta icicawin wahdi kta, qa Juda makoce kin ekta ye mayayapi kta wacin.

¹⁷ Hecen wacin mduze c̣ehan, hehan iyowiḣan wacin mduza he; qa token mic̣iconze cin he wicaceḣpi eciyatanhan mic̣iconze c̣a hecen, Han, han, hiya, hiya, eya waun he.

¹⁸ Wakantanka wacinyepica, wicoie unkeniciyapi qon he, han qa hiya, hee śni.

¹⁹ Miye, qa Siluanos, qa Timotheos, Jesus Messiya Wakantanka Cinhintku kin unkoniciyakapi qon he, han, qa hiya, hee śni, tuka iye kin on, han ecedan.

²⁰ Wakantanka iwahounyanpi kin hena owasin iye en, Han hee, qa iye en Amen, unkiyepi kin etanhan Wakantanka yatanpi kte cin heon.

²¹ Tuwe niyepi kici Messiya en unyusutapi, qa sdaunyanpi kin he Wakantanka kin ee.

²² Qa he unkapuspapi, qa uncantepi kin ekta Woniya tokaheya icupi ece kin he unqupi.

²³ Unkan uakaha minagi kin ekta Wakantanka mayaotanin kta e cewakiya; Itoncipapi kta e on nahaḣin Korinth ekta wai śni.

²⁴ Wacinyuyapi kin on wowidag unniyanpi śni, tuka widuśkinpi kin en ounniciyapi kta. Wacinyanpi on sutaya nayajinpi ece.