II. Johannes 1 - Dakota Wowapi Wakan Kin

¹ Hunkayapi un kin, Kuria kaḣnigapi qon wowapi kicaga; iye cinca kin, wowicake eciyatanhan waśtewicawadake cin hena om, qa miśnana śni, tuka nakun tona wowicake sdonyapi kin hena owasin;

² Wowicake kin en unyakonpi, qa owihanke wanin unkicipi un kte cin heon etanhan.

³ Wowaśte, wowaonśida, wookiye ko, Wakantanka Ateyapi kin eciyatanhan, qa nakun Jesus Messiya Itancan, Ateyapi kin he Cinhintku kin eciyatanhan, wowicake wacantkiyapi ko en, nicipi un nunwe.

⁴ Ateyapi kin woahope unqupi qon iyecen, nicinca wowicake eciyatanhan manipi iyewicawakiye c̣ehan nina imduśkin.

⁵ Unkan nakaha, Kuria, ceciya ce, woahope teca wan cicage cin iyecece śni, tuka wanji otokahe ekta unhapi qon, otoiyohi canteunkiciciyapi kte cin hee.

⁶ Qa wacantkiyapi kin he dee, tawoahope kin eciyatanhan maunnipi kte cin hee. Woahope kin he dee, Otokahe ekta taku nayaḣonpi qon he ohna mayanipi kte cin.

⁷ Wanna wicahnaye sa ota wicoicage kin ehna iyayapi, hena Jesus Messiya wicaceḣpi un hi qon oyakapi śni. He wicahnaye sa qa Messiya kipajin kin heca.

⁸ Iwanihdaka po, hecen taku unkamnanpi kin toki eḣpeunyanpi kte śni, tuka wokajuju iyakic̣uya unkicupi kta.

⁹ Tuwe waḣtani qa Messiya tawoonspe kin en un śni kin he Wakantanka yuhe śni. Tuwe Messiya tawoonspe kin en un kin he Ateyapi kin yuhe c̣a nakun Cinhintku kin.

¹⁰ Tuwe en niipi qa woonspe kin de yuhe śni kinhan, kin u śipi śni po, qa wookiye eciyapi śni po.

¹¹ Tuwe wookiye eciye cin he iye oḣan śice cin en opa.

¹² Taku ota wowapi cicagapi kta mduha eśta, miniḣuha minisapa ko on ecamon kte śni: tuka en ciupi qa i eciyatanhan ociciyakapi kta e ecin cante mduza; hecen wowiyuśkin unkitawapi kin ojudan kta.

¹³ Nitanka kaḣnigapi qon cincawicaye cin hena nape niyuzapi. Amen.