II. Inyan 2 - Dakota Wowapi Wakan Kin

¹ Tuka he ehan oyate kin ehna wicaśta wokcan itonpi śni yukan qon, he iyecen niyepi kin ehna waonspekiya itonpi śni kin heca yuke kta, naḣmana wohnuni woihangye kin en aupi kta, Itancan opewicakiton qon he eḣpeyapi, qa wicotakuniśni oḣanko amnaic̣iyapi kta.

² Qa wicoḣan śica econpi kin en wicota opapi kta; hena on wowicake canku kin yaśicapi ece e kta.

³ Qa waicu wacinpi kin eciyatanhan wicoie skuyn on wiyopeniyanpi kta; hena e wicayacopi kin wanakajatanhan en awicau, qa ihangwicayapi kte cin he ḣba śni.

⁴ Wakantanka maḣpiya ohnihde waḣtanipi qon hena wicakpatan śni, tuka wakanśica ti kin ekta iyayewicaya, qa woyaco kte cin hehanyan wicayuhapi kta e otpaza maza icicaḣiḣa on wicakaśka hecinhan;

⁵ Qa maka tannike cin kpatan śni, tuka Nowa wicaśta wiciśahdogan wicoowotanna oyake cin he kpatan, qa wicoicage waḣtanipi sa amnitanwicaya;

⁶ Qa Sodom qa Gomorra otonwe kin caḣota kaḣya eḣpewicaye, woihangye on wicayaco, qa tona tokata waḣtani sa unpi kte cin hena woonspe wicakicaga;

⁷ Qa Lot owotanna un, wicaśta waḣtepi śni oḣan śicapi kin wacin iyowicakiśica ece kin he ehdaku:

⁸ Wicaśta owotanna kin he hena wicehna ti, qa taku wanyake c̣a naḣon kin on, anpetu eca iye nagi owotanna ekta wacin iyowicakiśica ece, śicaya oḣanyanpi kin on:

⁹ Itancan kin wicaśta waśte wowiyutanye kin etanhan token ewicahdaku kta sdonya, qa nakun wicaśta owotanna śni kin woyaco anpetu kin hehanyan wicayuhe kta, śitkihdawicayapi kta e heon:

¹⁰ Tuka tona woaśamye cantiheyapi kin en wicaceḣpi eciyatanhan manipi, qa wokiconze waḣtedapi śni kin hena iyotan: hena waḣanic̣idapi qa wamnaic̣idapi ece; qa tona tankapi kin wicayaśicapi kokipapi śni.

¹¹ Maḣpiya ohnihde kin, wookihi qa wowaśake on iyotanpi qeyaś, Itancan kin itokam wayaśicapi woyaco kin en awicayapi śni ece.

¹² Tuka dena iś, woteca iyececa, wicayuzapi qa ihangwicayapi kta e on wicakagapi kin, taku okaḣnigapi śni keś he yaśicapi ece; qa wicotakuniśni tawapi kin en ihangic̣iyapi kta;

¹³ Qa anpetu icunhan tanyan wotapi kin he woiyokipi dakapi kin heon woaḣtani iyunwin kin icupi kta. Hena om wayatapi icunhan wohnayeic̣iyapi kin on iyuśkinpi, woaśape qa taku samya wanke cin hecapi;

¹⁴ Iśta yukanpi wiinaḣmanpi kin on ojudan qa woaḣtani ayuśtanpica śni; wicanagi kacegya unpi kin hena wicahnayanpi ece; cante wawicakipi e ecewakta kin heca yuhapi, wicotakuniśni cincapi kin:

¹⁵ Canku owotanna kin ayuśtanpi, qa onuniyata unpi, Balaam Bosor cinhintku woaḣtani iyunwin waśtedake ciqon he tacanku kin en opapi:

¹⁶ Iye taku śica econ qon on iyopeyapi; śonśonna kin ia okitpani ece wicaho on ie c̣a, wicaśta wokcan witkotkoya oḣanye cin he kiśica.

¹⁷ Miniyowe mini wanica, maḣpiya śapa tate iyumni on toke cincin eyaye cin hena hecapi; hena on otpaza sape ḣinca owihanke wanica wicakicihnakapi.

¹⁸ Waḣanḣanic̣idaya takuśniśni eyapi eca, wicaceḣpi cantiheyapi kin eciyatanhan, witkoya oḣanyanpi kin on, tona wohnaye en ounyanpi kin kitan ecinyan nawicakicipapi qon hena iyakapewicayapi ece.

¹⁹ Tawaic̣iyapi kin wicaqupi kta keyapi, tuka iyepi kaeś wicotakuniśni iwicadaka. Taku on tuwe iyakapeyapi kinhan, ha on wowidagyapi ece.

²⁰ Itancan qa Wanikiya Jesus Messiya sdonyapi kin eciyatanhan, wicoicage kin de en woaśape kin nakipapi eśta, ake hena on iyakapeyapi qa en ihdaśkapi kinhan, hena otokahe ekta waśte qa owihankepi kin he śica ece.

²¹ Woowotanna canku kin he sdonyapi śni unkanś he waśte kta tuka, qa he sdonyapi qa woahope wakan wicaqupi kin ayuśtanpi kin he śice ḣinca.

²² Tuka wiyacinpi eyapi wicakapi kin he iyecen waakipapi; Sunka taku hiyuye cin he ake hduta ce; qa, Kukuśe yujajapi qon he ake upśija en iwanka ce.