II. Inyan 1 - Dakota Wowapi Wakan Kin

¹ Simon Inyan, Jesus Messiya tawowidake qa yeśi qon he, tona Wakantanka unkitawapi toowotanna kin on, qa Jesus Messiya Wanikiye cin eciyatanhan, unkiye unhapi kin iyecen wowacinye teḣika yuhapi kin hena wowapi wicakicaga.

² Wowaonśida, wookiye ko, Wakantanka sdonyapi kin en, qa Jesus Itancan unkiyapi kin on niciyuotapi nunwe.

³ Iye towaśake wakan kin he taku on wiconi qa woohodapi kte cin owasin unqupi kin he iyececa, tuwe wowitan qa wookihi on unkicopi kin he sdonyapi kin eciyatanhan.

⁴ Hena on taku tanka ḣinca, qa taku teḣike ḣinca iwahounyanpi; hecen hena on Taku Wakan ouncage kin en oyapapi kta, wiconi kin de en wocantiheye śica on wicośice nayecipapi kin.

⁵ Qa nakun he on nina mniheic̣iya po, wacinyayapi kin en waditakapi kin ikoyagya po; qa waditakapi kin en wosdonye;

⁶ Qa wosdonye kin en iyatahdeic̣iyapi śni; qa iyatahdeic̣iyapi śni kin en wacintankapi; qa wacintankapi kin en taku wakan iyececapi;

⁷ Qa taku wakan iyececapi kin en waśtekicidapi; qa waśtekicidapi kin en wacantkiyapi ikoyagya po.

⁸ Hena taku kin en niunpi qa niciyuotapi kinhan, Jesus Messiya Itancan unkiyapi sdonyapi kin en taku icaḣye c̣a waskuyeca aicage cin henicapi kta e nicagapi.

⁹ Tuka tuwe dena yuhe śni kinhan, he iśtagonge c̣a tehan wawanyaka okihi śni, qa waḣtani qon hena kipakintapi kin he akiktonja.

¹⁰ Heon etanhan, mihunkawanji, nicopi qa nicaḣnigapi kin aic̣iciya hdusuta po; hena hecen ecanonpi kinhan icimana nihinḣpayapi kte śni.

¹¹ Qa nakun heon Jesus Messiya Itancan qa Wanikiya unkitawapi tokiconze owihanke wanice cin en yaipi kte cin wijinya nic̣upi kta.

¹² Heon etanhan taku hececa ohinniyan kiksuyeciciyapi kta awektonje kte śni, hena niye ḣinca sdonyayapi, qa nakaha wowicake kin de en sutaya nihdepi eśta.

¹³ Tohanyan wakeya kin de ohna waun kin hehanyan kiksuyeciciyapi kin on iyocipaśtakapi kte cin he hecetu wadake:

¹⁴ Wakeya mitawa kin de aśkadan wehnake kta sdonwakiya, Jesus Messiya Itancan unkiyapi omakiyake ciqon iyececa.

¹⁵ Tuka nakun detanhan imdamde cin iyohakam, taku kin dena ohinniyan yeksuya oyakihipi kta e awakite kta.

¹⁶ Jesus Messiya Itancan unkiyapi towaśake qa hi kte cin hena unkoniciyakapi qehan, hitunkakanpi ksamya kagapi kin unkunpi śni, tuka iye tanka ḣince cin he iśta on wanunyakapi.

¹⁷ Wakantanka Ateye cin eciyatanhan woyuonihan wowitan ko icu, wowitan waśte kin etanhan wicaho kin de hiyu qehan, Micinkśi waśtewakidake cin he dee, on iyomakipi ḣinca ce.

¹⁸ Unkan wicaho kin he maḣpiya eciyatanhan u kin he naunḣonpi, paha wakan kin akan kici unyakonpi qehan.

¹⁹ Tuka wokcanpi oie iyotan suta wan unhapi; he qe anayagoptanpi kinhan tanyan ecanonpi kta, petijanjan tukten otpaze cin en ijanjan kin iyececa, nicantepi kin ekta anpao kamdeze c̣a, en anpao wicanḣpi kin hinanpe kte cin hehanyan.

²⁰ Qa de tokaheya sdonya po, wowapi wakan kin en wokcanpi kin owasin tuwedan iye cinka oyake śni.

²¹ Wokcanpi kin wanakajatanhan wicaśta tawacin kin eciyatanhan u śni; tuka wicaśta wakan Wakantanka tawa Woniya Wakan kin token iewicakiye ciqon hena hecen eyapi ece.