III. Johannes 1 - Dakota Wowapi Wakan Kin

¹ Hunkayapi waun kin, Gayos waśtedakapi kin, wowicake en waśtewadake cin he, wowapi cicaga.

² Waśtecicida, taku owasin isanpa, tanyan iyoopte de kta qa zaniyan yaun kta e cewakiya ece, ninagi iyoopta ye cin iyececa.

³ Hunkawanjinkiciyapi kin den hipi, qa wowicake en niun kin he oyakapi qehan, wowicake eciyatanhan mayani kin heon nina imduśkin.

⁴ Micinca wowicake kin eciyatanhan manipi nawaḣon kin heon wowiyuśkin iyotan tanka mduha, takudan kape śni.

⁵ Waśtecicida, taku hunkawanjinkiciyapi kin, qa nakun wicaśta toktokeca ecawicayecon kin he tanyeḣ ecanon:

⁶ Hena e okodakiciye kin en wacanyakiye cin tanyan oyakapi: hena icimanipi en, Taku Wakan iyecen, owicayakiye cinhan, tanyan ecanon kta.

⁷ Iye caje kin on iyayapi, qa Ikcewicaśta kin etanhan takudan icupi śni, heon etanhan.

⁸ Heon tona hececapi kin hena iyowinwicunkiyapi kta iyececa; hecen wowicake kin ounkiyapi kta.

⁹ Okodakiciye kin wowapi wicawecaga; tuka hena ehna Diotrephes itancan ic̣ida kin he iyowinunkiyapi śni.

¹⁰ Heon etanhan wau kinhan, iye oḣan kin, oie śica on unkaiapi ece kin hena weksuye kta. Unkan he on imnan śni, tuka iye ḣinca hunkawanjinkiciyapi kin iyowinwicakiye śni, qa tona hecon wacinpi kin iyowicaki śni, qa okodakiciye kin etanhan tankan iyayewicaya ece.

¹¹ Waśtecicida, taku śice cin he en ope śni wo, tuka taku waśte kin. Tuwe taku waśte econ kin he Wakantanka eciyatanhan un, tuka tuwe taku śica econ kin he Wakantanka wanyake śni.

¹² Demetrios owasin on tanyan oyakapi, qa wowicake kin nakun eciyatanhan; unkan unkiś eya he unyaotaninpi, qa waunyaotaninpi kin he wowicake e sdonyayapi

¹³ Taku ota ociciwa kta mduha tuka, tuka minisapa wiyaka ko on hena wowapi cicage kte śni:

¹⁴ Tuka ecadan wanciyake kte, qa i eciyatanhan onkokiciciye kta wacin.

¹⁵ Wookiye niye en niciun nunwe. Takukiciyapi kin hena nape niyuzapi. Takukiciyapi cajeyan nape wicayuza wo.