Hebrew 9 - Dakota Wowapi Wakan Kin

¹ Hehan awicakehan tokaheya qon he en woohoda wicoḣan kin yukan, qa nakun makata tipi wakan.

² Wakeya wan kagapi, tokaheya kin he ohna petijanjan ihupa, qa wahna wotapi, qa aguyapi taninyan ehnakapi kin, he tipi wakan eciyapi.

³ Qa ti cokahnakapi icinonpa mahen tanhan, he wakeya kin iyotan wakan eciyapi:

⁴ Hen mazaskazi oizinyapi kin, qa wicotakuye can koka kin akapatanhan owancaya mazaskazi akaḣpeton, hee ohna mazaskazi cega manna ohnakapi kin, qa can sakadan Aaron tawa kin ḣca aye ciqon, qa wicotakuye inyan mdaska kin hena.

⁵ Qa he iwankapatanhan, wowitan Cerubim wowaonśida ohe kin aohanziyapi; hena on nakaha atayedan taku unkeyapi kte śni.

⁶ Hena taku kin hecen yuśtanpi qehan, wawayuśnapi kin wakeya tokaheya kin en yapi, qa ohodapi wicoḣan kin econpi ece.

⁷ Tuka icinonpa kin he en Wawayusna itancan kin ecedan, waniyetu otoiyohi wancadan mahen i, qa we codan i śni, he iś iye atayedan on, qa oyate taku ecinśniyan econpi ko on en ai.

⁸ Heon Woniya Wakan kin hecen oyaka, Wakeya tokaheya kin nahuḣin ecen he cin icunhan, tipi iyotan wakan kin ekta canku kin nahaḣin yuotaninpi śni:

⁹ He ito kayehan wiyacinpi un, qa en taku wicaqupi wośnapi ko aipi, tuka hena e tuwe hecon kin nagi kin yuecedan kta okihi śni.

¹⁰ Hena e woyuecetu kte anpetu kin hehanyan, woyute, qa woyatke, qa woyujaja ota, econ wicaśipi kin.

¹¹ Tuka Messiya, taku waśte u kte cin en, Wawayuśna Itancan ihdutanin, wakeya iyotan waśte qa yuśtanpi, nape on kagapi śni, wicoicage kin de etanhan śni, kin he ohna;

¹² Tatokadan qa ptejicadan we kin yuhe śni, tuka wopekitonpi owihanke wanin kage c̣a, iye we kin hduha wancadan tipi iyotan wakan kin timahen iyaya.

¹³ Hecen tatanka qa tatokadan we kin, qa pte heyuktanna caḣota amnimnipi kin, tona waaśape cin wicayuecedan, qa wicaceḣpi yuska kta e okihi hecinhan;

¹⁴ Sam iyeya Messiya, Woniya owihanke wanice cin eciyatanhan, Wakantanka en iyaonpepica śni waihduśna qon, he iye we kin, wiconṭe wicoḣan kin etanḣan nagi nipakintapi kta, Wakantanka ni un kin wowidag niyanpi kte cin heon.

¹⁵ Qa heon etanhan, Wicotakuye Teca kin en Iyotahedan un kin he iye, hecen wicotakuye tokaheya ihukuya waḣtanipi qon hena kajuju kta e on ṭe cin, he eciyatanhan tona wicakico kin owihanke wanin taku tawapi kte cin iwahowicayapi qon he yuhapi kta.

¹⁶ Tukten wicotakuye wanji yukan hecinhan, hen wicotakuye kage cin he wanna ṭa e yutaninpi.

¹⁷ Taku ṭapi kin hena on wicotakuye wowapi kin suta ece; tuka wicotakuye kage cin nahanḣin ni un kiuhan, he takudan okihi śni.

¹⁸ Unkan heon wicotakuye tokaheya qon he we codan yuecepidan śni.

¹⁹ Woope kin eciyatanhan, Moses woahope kin owasin oyate kin owicakiyaka yaśtan qehan, ptejicadan, qa tatokadan we kin icu, qa mini, taḣinca hin duta, peji ḣota ko, qa wowapi kin oyate kin owasin ko, awicamnimni;

²⁰ Qa heya, Wicotakuye Wakantanka econ niśipi kin we kin he dee ce.

²¹ Qa nakun wakeya kin, taku wakśica wowinyunyanpi kte cin owasin ko we amnimni.

²² Woope kin eciyatanhan taku owasin se we on pakintapi; qa we papsonpi śni ehantanhan wokajuja wanica.

²³ Heon etanhan, hena taku kin on, taku maḣpiya ekta un iyacinpi kin pakintapi kta e hecetu; tuka taku maḣpiya ekta un kin hena e qe taku sanpa waśte wośnapi kin on.

²⁴ Messiya tipi wakan nape on kagapi kin he mahen i śni, tipi wakan ḣinca iyacinpi kin hena ee; tuka maḣpiya kin e qe mahen, qa heciya unkiyepi on Wakantanka itokam ihdutanin kta.

²⁵ Qa wnwayuśna itancan kin he owanka wakan kin en, taku tokeca we kin yuha, waniyetu otoiyohi wancadan mahen i ece kin he iyecen ota akihde waihduśna kta iyecece śni;

²⁶ He iyececa unkanś, maka kagapi kin ehantanhan, wanna ota akihde kakije kta tuka; tuka nakaha woicage ihanke kin en, iye waihduśna kin eciyatanhan, woaḣtani yutokan iyeye kta e on taninic̣iya.

²⁷ Unkan wicaśta kin wancadan ṭapi kte cin he iwahowicayapi, qa he iyohakam woyaco kta:

²⁸ He iyecen Messiya, wicota waḣtanipi kin yuhe kta e wancadan wayuśnapi; unkan, tona he wanyakapi kta ape yukanpi kin hena niwicaye kta e, woaḣtani codan, inonpa ihdutanin kta.