Hebrew 8 - Dakota Wowapi Wakan Kin

¹ Taku nakaha unkeyapi yuptahnakapi kin he dee; Wawayuśna Itancan kin hececa unhapi, maḣpiya ekta Otancanke oiyotanke etapa kin en kiyotanka;

² Tipi wakan kin he, qa wakeya wicakapi kin, Itancan ticaga qa wricaśta akantu econpi śni, kin he en ookiye kin hee.

³ Wawayuśna otoiyohi taku kicic̣upi, wośnapi ko wayuśna kta e kagapi; heon wicaśta kin de iś eya taka wayuśna hduhe kta e hecetu.

⁴ Maka akan un unkanś, Wawayuśna kin heca kte śni; wawayuśna woope kin eciyatanhan taku kicic̣upi kin wayuśnapi ece kin hena yukanpi kin heon.

⁵ Hena oowa, qa taku maḣpiyata un kin ohanzi kin en oḣanyanpi ece; Moses wakeya qon age kta hehan Wakantanka okiye c̣a, Awacin wo, ḣe kin ekta token wanyag niciyapi qon he iyecen owasin yakage kta ce, eciya.

⁶ Tuka nakaha iye wawokiyapi iyotan waśte wan yuha, wicotakuye waśte ḣinca, wahoyapi iyotan waśte kin en ahe cin e en wiciyotahedan un kin, heon etanhan.

⁷ Wicotakuye tokaheya kin he iyaonpepica śni unkanś, iyokihe kin he tuktedan kiyukanpi kte śni tuka.

⁸ Hena taku iyawicaonpe c̣a heya, Wanyaka wo, anpetu kin u kta, hena en Israel tiyohnaka, qa Juda tipi kin wicotakuye teca wicawecage kta, Itancan kin eya:

⁹ Egupta makoce kin etanhan awicawau kta e hena hunkakewicayapi kin nape wicamduze ciqon anpetu kin he en, wicotakuye wicawecage ciqon he iyecece śni; wicotakuye mitawa kin he miciyuhapi śni; qa heon miś ihawicawakta śni ce, Itancan kin eya.

¹⁰ Anpetu kin hena iyohakam wicotakuye wicawecage kte cin he dee; Hena wicotawacin kin en mitoope kin wicawaqu kta, qa cantepi kin akan owawa kta, qa miye Wakantanka mayanpi kta, qa miś hena mitaoyate wicawaye kta;

¹¹ Qa wicaśta otoiyohi tuwe ikiyadan ti, qa otoiyohi hunkawanjitku kin onspewicakiyapi, qa, Itancan kin sdonya wo, eyapi kte śni; tuka owasin sdonmayanpi kta, wohakakta tankinkinyanpi ko:

¹² Taku ecinśniyan econpi kin hena onśiwicawada kta, qa waḣtanipi, wicoḣan śica econpi ko, icimana wicaweciksuye kte śni ce, Itancan kin eya.

¹³ Taku teca cajeyate cin he tokaheya kin yutanina kin heon heya. Unkan taku tanina, qa takuni śni aye cin, he tanin śni iyaye kta kiyadan ihan.