Hebrew 7 - Dakota Wowapi Wakan Kin

¹ Melkizedek, Salem Wicaśtayatapi, qa Wawayuśna Wakantanka Iyotan wankantu kin he tawa, hee, Abraham, wicaśtayatapi wicakaśtake cin, etanhan hdicu kin he itkokipe c̣a yawaśte.

² Unkan Abraham taku owasin etanhan iwikcemna kin he qu. Wicaśta kin he tokaheya caje oyakapi kin on, Woowotanna wicaśtayatapi kin hee, qa hehan, Salem wicaśtayatapi kin, he Wookiye wicaśtayatapi kin hee.

³ Atkuku wanica, hunku wanica, qa wicoicage oyakapi kin wanica, anpetu tokaheya wanice c̣a wiconi owihanke wanica, Wakantanka Cinhintku kin iyecen icaḣyapi, qa Wawayuśna ohinniyan yanka.

⁴ Wicaśta tanka kin de wanyaka po, Abraham, hunkakeyapi un kin hee kaeś, taku iwakte ahdi kin etanhan iwikcemna kin he qu.

⁵ Tona Lewi cinca kin etanhanpi, wośnapi wicoḣan yuhapi kin hena, wicoope kin eciyatanhan iye hunkawanjitkupi oyate kin etanhan taku icupi kta e iwahowicayapi; hena Abraham nite kin etanhan inanpapi tuka heconpi.

⁶ Tuka tuwe hena etanhan wicoicage hdawa śni kin he Abraham etanhan taku iwikcemna kin icu, qa wahoyapi kin yuhe ciqon he yawaśte.

⁷ Unkan he de akinicapi śni, tuwe ihukuya un kin he iyotan waśte kin on yawaśtepi ece.

⁸ Qa deciya wicaśta ṭapi kte cin hena taku iwikcemna kin icupi ece; tuka heciya, he ni un e yaotaninpi.

⁹ Unkan he de heyepica; Lewi taku iwikcemna kin icu ece kin, he iś eya Abraham eciyatanhan taku iwikcemna kin wicaqu;

¹⁰ Melkizedek itkokipe c̣ehan he nahaḣin atkuku nite kin mahen un.

¹¹ Heon etanhan, Lewi wośnapi wicoḣan yuhe cin eciyatanhan woyuśtan en au unkanś; he en oyate kin wicoope yuhapi; tokiyatanhan wawayuśna tokeca wan icage kta, Melkizedek ouncage kin eciyatanhan, qa Aaron ouncage kin eciyatanhan caje yatapi kte śni he.

¹² Wośnapi wicoḣan kin he yutokecapi kinhan, heon etanhan wicoope kin nakun yutokecapi kta.

¹³ Qa tuwe on hena hecen eyapi qon he wicoun tokeca etanhan inanpa; he etanhan tuwedan wahna wośnapi kin ekta oḣanye śni.

¹⁴ Itancan unkitawapi kin he Juda wicoun kin etanhan icaga e sdonunyanpi; qa wicoun kin he wośnapi kagapi kta e Moses takudan eye śni.

¹⁵ Qa de iyotan atanin, Melkizedek ouncage kin iyecen, Wawayuśna tokeca wan icage kta;

¹⁶ He wicaceḣpi wicoie woope kin eciyatanhan śni, tuka wiconi owihanke wanica wowaśake kin eciyatanhan icaḣyapi.

¹⁷ Melkizedek ouncage kin iyecen, Wawayuśna ohinniyan nanka ce, eya yaotaninpi qon.

¹⁸ Unkan nakun woahope tokaheya ye cin he yutokan iyeyapi, waśake śni qa taku okihipica śni kin heon etanhan.

¹⁹ Woope kin he takudan yuśtan śni, tuka wowacinye iyotan waśte kin he en au; qa heon Wakantanka kin en ikiyedan unkupi.

²⁰ Iye wokonze oie kin codan wawayuśna kin kagapi śni; dena e wokonze oie codan wawayuśna wicakagapi;

²¹ Tuka he qe wokonze wicoie kin eciyatanhan; tuwe, Melkizedek ouncage kin iyecen Wawayuśna ohinniyan nanka ce, Itancan kin heye c̣a iyopeiciye kte śni ce, eciye ciqon hee hecon.

²² He iyecen wicotakuye iyotan waśte kin en Jesus wayuecetu wan kagapi.

²³ Wiconṭe kin on, ohinniyan en un okitpanipi kin, heon hena wawayuśna kin otapi.

²⁴ Tuka he qe owihanke wanin yanke cin, heon wośnapi wicoḣan yutokecapica śni wan yuha.

²⁵ Qa hecen tona iye eciyatanhan Wakantanka en upi kin hena owasin niwicaye kta okihi, hena wocekiye ewicakiciye kta e ohinniyan ni un kin heon.

²⁶ Wawayuśna Itancan kin hececa he iyounkipipi, wakan, iyaonpepica śni, waaśape śni, qa waḣtanipi sa wicicunonpa un, qa maḣpiya kin sanpa wankantuya icaḣyapi.

²⁷ He iye, wawayuśna kin hena iyecen, anpetu iyohi, tokaheya iye waḣtani kin on, qa hehan oyate waḣtanipi kin on etanhan wośna kte cin he iyecece śni; wancadan hecon, iye atayedan waihduśna qon he ehan.

²⁸ Woope kin he wicaśta waśakapi śni kin hena wawayuśna wicakaga ece; tuka wokonze wicoie kin, woope iyohakam un kin, he Cinhintkuyapi, owihanke wanin yawaśtepi kin he kaga.