Hebrew 5 - Dakota Wowapi Wakan Kin

¹ Wawayuśna itancan otoiyohi, wicaśta etanhan icupi kin, he Wakantanka taku tawa kin en, wicaśta on etanhan ehdepi, taku kicic̣upi, woaḣtani on wośnapi kin hena ko wayuśna kta e heon.

² Tona onspepi śni, qa canku icunom yapi kin hena onśiwicada kta okihi, iś iye wookihi śni aohduteyapi nakaeś.

³ Qa heon oyate kin on wośna ece kin, he iyecen iś iye woaḣtani econ kin on taku wayuśna ece kta.

⁴ Qa tuwedan iye cinka wowitan kin de icu śni, tuka, Aaron iyecen, Wakantanka tuwe kico kin hecedan.

⁵ He iyecen, Messiya iś eya Wawayuśna itancan kta e ihdutan śni; tuka tuwe, Micinkśi kin he niye, anpe dehan cinca cicaga ce, eciye ciqon hee hecon.

⁶ Qa nakun tokan en kaken eya; Melkizedek ouncage kin iyecen Wawayuśna owihanke śni kin henica ce.

⁷ He qe anpetu wicaceḣpi en un qehan, wocekiye, wokidapi ko eye c̣a, iśta mnigaga nina hoyekiye c̣a, tuwe wiconṭe etanhan ehdaku kta okihi kin he cekiye c̣a, kokipeyahan un kin, heon naḣonpi.

⁸ Qa Cinhintku kin hee kaeś, taku token kakije cin on woanagoptan onspeiciciya.

⁹ Qa iye yuśtanpi kin heon tona anagoptanpi kin owasin owihanke wanin wiconi kin wicakicaga.

¹⁰ Melkizedek ouncage kin iyecen, Wawayuśna Itancan, Wakantanka keciye cin.

¹¹ Wicaśta kin he on taku ota unkoniciyakapi kta, tuka oyakapi teḣika, wanaḣon yahunkapi śni nakaeś.

¹² Hinnakaha waonspekiya henicapi kta, tuka nahaḣin tuwe Wakantanka oie oowa tokaheya kin hena akta onspeniciyapi kta e iyenihantupi, qa tona asanpi ece cinpi, qa waconica yun okihipi śni kin hee en iyoniptapi.

¹³ Tuwe kaśta asanpi ece yute cinhan, he wicoowotanna wicoie kin en wayupike śni, nahaḣin hokśiyoqopa nakaeś.

¹⁴ Tuka tona tankapi, qa wanna taku utapi on tanyan ihduśtan pi, taku waśte, taku śica ko iyukcanpi kin, hena waconica yutapi ece.