Hebrew 4 - Dakota Wowapi Wakan Kin

¹ Hecen okiḣpapi kin de en unkopapi kta e iwahounyanpi kin, heon niyepi kin wanjikśi iyoyahipi kte śni se ececa e ikounpapi kta.

² Wotanin waśte kin unkokiyakapi, iś iyepi kin iyececa; tuka wicoie naḣonpi qon he owicakiye śni, tona naḣonpi kin wowacinye icicahiyapi śni kin heon etanhan.

³ Tuka tona wicaundapi kin okiḣpapi kin en ounpapi kta; heye ciqon iyececa; Śinwahda on okiḣpapi mitawa kin en opapi kte śni ce, epa ce; maka icage cin hehantanhan wicoḣan kin yuśtanpi tuka.

⁴ Tukten anpetu iśakowin kin he ke c̣a hecen eya, Anpetu iśakowin kin he Wakantanka okiḣpa, taku kage cin owasin etanhan.

⁵ Qa hen ake, Okiḣpapi mitawa kin en opapi kte śni.

⁶ Heon etanhan, hunḣ en opapi kte cin he tokata ihan, qa tuna tokaheya wotanin waśte owicakiyakapi qon hena wicadapi śni kin heon en opapi śni.

⁷ Ake anpetu wan ke c̣a Dawid en heya, Anpe dehan, iye ho kin nayaḣonpi kinhan, cante hdutehipi śni po.

⁸ Jośuwa okiḣpe wicakiya unkanś, he iyohakam anpetu tokeca caje yate kte śni tuka.

⁹ Hecen Wakantanka taoyate kin okiḣpapi wan wicakicihan.

¹⁰ Tuwe okiḣpapi en ope cin he wanna toḣtani kin ayuśtan, Wakantanka iye tawa ayuśtan qon iyececa.

¹¹ Heon etanhan wookiḣpe kin he en unkopapi kta e amniheunkiciyapi kta, okinni wicadapi śni qon he iyecen tuwe iḣpaye kta naceca.

¹² Wakantanka oie kin he ni un, wawokihi, qa mazasagye anog ope kin he isanpa pe ḣinca, wicanagi, wicaniya kici iyotahedan capa iyaye c̣a, okihepi cupe ko kicakse c̣a, wicotawacin wicacante wacin yuze cin hena koya iyukcan ece.

¹³ Qa taku kagapi kin takudan iye iśta kin en anaḣbepica śni; tuwe oicazo unqupi kin he iśta kin en taku owasin tancodan qa śdayehnahan yanka.

¹⁴ Heon Wawayuśna Itancan tanka wan, Jesus Wakantanka Cinhintku, maḣpiya kin ekta iyaye cin hee unhapi kin heon wounhdakapi kin he sutaya unhduzapi kta.

¹⁵ Wawajuśna itancan kin, unkiye unkakijapi kin en unkicanptapikta okihi śni kin heca unhapi śni, tuka iye taku owasin on iyutanyanpi, unkiye iyeuncecapi, tuka woaḣtani codan un.

¹⁶ Heon etanhan wowaśte oiyotanke kin en waditagya unkicupi kta, hecen wowaoniida unkicupi kta, qa tohan uncinpi eca wowaśte wawokihi kin iyeunyanpi ece e kta.