Hebrew 13 - Dakota Wowapi Wakan Kin

¹ Hunkawanjinkiciyapi waśtekicidapi kin he ecen un nunwe.

² Oicimani kin wonwicaya akiktonjapi śni po; heconpi kin on wanjikśi maḣpiya ohnihde kin sdonwicaye śni won wicayapi.

³ Tona kaśka wicahnakapi kin hena om nicaśkapi kin iyecen wicakiksuya po; qa tona kakiśyapi un kin hena koya, wicatancan kin ohna dukanpi kin heon.

⁴ Owasin en wakan kiciyuzapi kin he woyuonihan, qa ohehdepi aśamyapi śni kin; tuka wicawihomnipi qa wawiciḣaḣapi econpi kin hena Wakantanka wicayaco kta.

⁵ Waicucupikte cin wanin oyaḣandapi kta, qa taku duhapi kin hena on iyonicipipi nunwe. Tohinni aciyuśtan kte śni qaicimana eḣpeciye kte śni, eye ciqon heon etanhan.

⁶ Heon, Itancan kin omakiye cin hee, qa he etanhan taku wicaśta akantu ecamiconpi kte cin kowakipe kte śni ce, waditagya unkeyapi kta.

⁷ Tona awannihdakapi, Wakantanka oie kin oniciyakapi kin hena wicakiksuya po, hena wicoḣan ihanke kin he awacin po, qa wacinyanpi qon he en opa po:

⁸ Jesua Messiya, ḣtanihan qa nakaha okonwanjidan, qa owihanke wanice kta.

⁹ Ihnuhan woonspe otakiya qa toktokeca on yutokan iyeniyanpi kinhan; woyute tona he awacinpi qon takudan okihiwicaye śni kin he wicacante kin yusuta śni, tuka wowaonśida kin on yusutapi kin he waśte.

¹⁰ Walina wośnapi wan unhapi kin he etanhan tona wakeya qon ohna oḣanyanpi kin hena yutapi kta iyececapi śni.

¹¹ Woteca, tona we kin woaḣtani on, wawayuśna itancan kin tipi wakan kin timahen ai qon, hena tancanpi kin tihocoka kin itankan ḣuḣnaḣyapi ece.

¹² Heon Jesus iś eya, iye we kin on oyate kin wicayuecedan kta e otonwe tiyopa kin itankan kakiśyapi qon.

¹³ Hecen iye on aiapi qon aiḣpeunyanpi kin yuha ekta wicoti kin tankan unyanpi kta.

¹⁴ Deeiya otonwe ohinniyan ecen he cin unhapi śni, tuka wanji u kte cin he unkakitapi.

¹⁵ Heon etanhan, iye caje on, ohinniyan Wakantanka en wowitan wośnapi kin unkaupi kta, unkihapi etanhan waskuyeca, iye caje kin on, wounhdakapi kin hee.

¹⁶ Taku waśte; econpi, qa wacantkiyapi kin hena akiktonjapi śni po, hena wośnapi kin Wakantanka iyokipi ece.

¹⁷ Tona wahokonniciyapi kin hena anawicakigoptan po, qa wicihukuya yeic̣iya po, hena ninagipi kin on awanniyakapi, ohdakapi kte cin he iyecen; hecan wowiyuśkinyan econpi kta, qa woiyokiśinya econpi kte śni; he niyepi kin on waśte.

¹⁸ Wocekiye unkekiciya po; wicanagi waśte unhapi unkecinpi, taku owasin en owotanna unkoḣanyanpi kta uncinpi.

¹⁹ Tuka hecanonpi kta e iyotan cecioiyapi, koḣanna niyepi ekta u mayanpi kte cin heon.

²⁰ Unkan, Wookiye Wakantanka kin, Jesus Itancan unkiyapi, taḣinca awanwicahdake tana kin he, wiconṭe etanhan ake hiyuye ciqon he wicotakuye owihanke wanica we kin eciyatanhan,

²¹ Iye tawacin kin ecen ecanonpi kta e, wicoḣan waśte owasin en niyusutapi kte, qa taku iye iśta kin en oiyokipi kin ecaniconpi kta, Jesus Messiya eciatanhan; he wowitan owihane wanica kicihan nunwe.

²² Mihunkawanji, ceciciyapi ce, wowahokonkiye wicoie kin iyowinkiya po, wicoie tonana on wowapi cicagapi.

²³ Timotheos hunkawanjin unyanpi kin wanna kiyuśkapi e sdonya po, he ecadan u kinhan kici wanciyakapi kta.

²⁴ Tona niyepi en itancanpi kin hena owasin, qa tona owotanna un kin owasin nape wicayuza po. Itatia etanhanpi kin hena nape niyuzapi.

²⁵ Wowaonśida kin niyepi owasin en nicipi on nunwe. Amen.