Hebrew 12 - Dakota Wowapi Wakan Kin

¹ Heon etanhan waayataninpi maḣpiya śoka wan hinsko tanka aohdute unyanpi kin, hecen taku tkeya qinpi kin owasin eunhnakapi kta, woaktani ohiunyanpi ece kin he koya, qa oinyanke unkitokam wanke cin he wacin tankaya unkinyankapi kta.

² Qa Jesus wacinunyanpi kin toka kage c̣a hduśtan kin hee ekta euntonwanpi kta. He iye, wowiyuśkin itokam ehdepi qon he on, can susbeca kin hee kaeś iyowinkiye c̣a, wowiśtece kin he taku da śni, qa Wakantanka oiyotanke etapa kin eciyatanhan kiyotanka.

³ Tuwe waḣtanipi sa taku i en hiyeyapi kin he iye en waḣbayedan iyowinye ciqon he awacin po, hecen nitawacinpi kin ekta iconimnipi kte śni, qa wacin iboyaśakapi kte śni.

⁴ Woaḣtani kici yecizapi kin en nahaḣin we kin ekta aiyahdeya ecanonpi śni.

⁵ Qa wowahokonkiye cinca iyecenoniciyapi kin he ayektonjapi he; Micinkśi, Itancan wicakapsinpsinte cin he tice dake śni wo, qa iyopeniye cinhan wacin ibośake śni wo, eye cin.

⁶ Itancan kin wicaśta waśtekida kinhan, he iyopekiye c̣a, cinca iyowinwicakiye cin otoiyohi hdapsinpsinta ece.

⁷ Wiyopeniyanpi kinhan, cinca kin iyecen Wakantanka ecaniconpi; tukte cinca kin he atkuku iyopekiye śni he.

⁸ Tuka owasin en opapi ece kin iyecen iyopeniyanpi śni kinhan, tuwe cinca tanin śni kin henicapi, qa cinhintkuyapi un kin henicapi śni.

⁹ Unkan, wicaceḣpi eciyatanhan atewicunyanpi kin hena iyopeunkiyapi ece, unkan wicunhduonihanpi hecinhan, sam iyeya wicanagi Ateyapi kin he anaungoptanpi kte c̣a on unnipi kta.

¹⁰ Hena e anpetu tonana hehanyan, token iyokipipi kin hecen iyopeunkiyapi; tuka he qe unwaśtepi kte cin he on, hecen iye towakan kin en ounpapi kta.

¹¹ Wiyopewicayapi kin owasin en icunhan woiyokipi śni, tuka woiyokiśice; tuka ihakam tona hecawicakiconpi kin en wicoowotanna waskuyeca wookiye kin icaḣwicakiya ece.

¹² Heon etanhan wicanape kaozezeya un kin hena yuwankan icu po, qa hupahu waśake śni kin hena koya;

¹³ Qa nisihapi canku mdaya kicaga po, taku huśte kin he icunonpa iyeyapi kte śni, tuka okiziyapi kte cin heon.

¹⁴ Owasin en wookiye akita po, qa nakun wowakan kin, he tuwe yuhe śni kinhan Itancan kin wanyake kte śni.

¹⁵ Qa tuwe Wakantanka to waonśida kin iyohi kte śni naceca, heon aic̣iciya iwanihdaka po, okinni can hute paza icage c̣a, nugiyeniyanpi kta, qa hecen wicota aśamyapi kta.

¹⁶ Okinni wicawihomni wan yuke kta, qa taku wakan ohoda śni, Esa iyececa, he watokapa kin taku yutapi onśpadan iyopekiya.

¹⁷ Qa iyohakam woyawaśte kin hduhe kta, tuka ḣeyata iyeyapi, he sdonyayapi, qa token tawacin yutokeca kte cin he iyeye śni, iśtamnihanpe on nina akita tuka.

¹⁸ Paha oyutanpica, qa peta on ide qon he ekta yahipi śni, qa taku iyotan samya wanke cin, qa otpaza, qa nina icamna kin;

¹⁹ Qa nakun mazayahotonpi tanka hoton, wicoie ho kin hena koya; he tona naḣonpi qon wicoie kin he akta owicakiyakapi kte śni e icekiyapi.

²⁰ Taku econ wicaśipi qon he okitpanipi; Woteca wan hee kaeś paha kin yutan kinhan he inyan on kininpi kta, qa iś wanhinkpe on katpa iyeyapi kta ce.

²¹ Unkan he wanyakapi kin nina wowinihan, qa heon Moses, Nina maḣniyanyan qa macancan ce, eya.

²² Tuka Zion Paha kin ekta yahipi, Wạkantanka ni un otonwe tawa kin, Jerusalem maḣpiya tanhan u kin, qa ohnihde unpi kin kektopawinge ota ekta;

²³ Omniciye tanka, qa tokaheya wicatonpi okodakiciye kin, maḣpiya ekta caje owicawapi kin hena, qa Wakantanka owasin wicayaco kin he, qa wicaśta owotanna yuśtanpi nagipi kin hena ekta;

²⁴ Qa Jesus wicotakuye teca kin en iyotahedan un kin hee ekta, qa we amnimnipi kte cin, Abel sam iyeya taku waśte eye cin he ekta.

²⁵ Ihnuhan tuwe ie cin anayagoptanpi śni kinhan; tona tuwe maka akan ie ciqon he anagoptanpi śni qon hena najicapi śni hecinhan, sam iyeya unkiye naunjicapi kte śni, tuwe maḣpiya tanhan ie cin ihaunktapi śni kinhan.

²⁶ Iye ho kin he ehan maka kin yahuhuza, tuka nakaha wahounyanpi qa heya, Ake wancadan maka ecedan mdahuhuza kte śni, tuka nakun maḣpiya kin.

²⁷ Unkan, Ake wancadan, eye cin he taku tona yahuhuzapi kte cin hena taku kagapi kin iyecen yutokan iyeyapi kta, hecen taku tona yahuhuzapica śni kin hena ecen he kta, he kapi.

²⁸ Heon etanhan wokiconze yuhohopica śni kin unkicupi, wowaonśida unhapi kta, hecen woyuonihan, wokokipe ko yuha Wakantanka iyokipiya ohoundapi kta.

²⁹ Wakantanka unkitawapi kin he peta waḣuḣnaḣye cin heca.