Hebrew 11 - Dakota Wowapi Wakan Kin

¹ Wacinyanpi kin he taku apepi oahe kin ee, qa taku wanyaapi śni un yuotanin kin hee.

² He on hunka wicayapi kin yuonihanyan ihdaotaninpi qon.

³ Wacinyanpi kin eciyatanhan, Wakantanka oie kin on woicage kin icaḣyapi kin he sdonunyanpi, taka wanyakapi un kin hena taku tanin kin etanhan kagapi śni.

⁴ Wacinyanpi kin eciyatanhan Abel Qain kape c̣a, wośnapi iyotan waśte wan Wakantanka wakiyuśna qon he on owotanna e hduotanin; Wakantanka nakun hecen yuotanin, taku qu kin heon, qa he eciyatanhan ṭa keś nahaḣin ia ece.

⁵ Wacinyanpi kin eciyatanhan Henok wiconṭe wanyake kte śni e tokan ayapi, qa tuktedan iyeyapi śni, Wakantanka tokan aye cin heon. Tokan ayapi śni itokam Wakantanka iyokipiye cin he okiyakapi.

⁶ Tuka wacinyanpi codan tuwedan iyokipiye kta okihi śni. Tuwe en u kinhan he Wakantanka ni un, qa tona aic̣iciya akitapi kin hena iyunwin wicaqu ece kin he wicada kta.

⁷ Wacinyanpi kin eciyatanhan Nowa Wakantanka ihamna, taku nahaḣin wanyakapi śni kin hena, qa itonkipa un kin heon tiyohnaka tawa ni kte cin on wata tanka wan kaga; qa iye oḣan kin on oyate kin wicayaco, qa hecen woowotanna wacinyanpi eciyatanhan un kin he tawa kta e icaga.

⁸ Wacinyanpi kin eciyatanhan Abraham, makoce wan yuhe kte cin he ekta ye śipi qehan, anagoptan, qa tokiya ye kte cin tanyan sdonkiye śni iyaya.

⁹ Wacinyanpi kin eciyatanhan makoce iwahoyapi qon he en ounyan, makoce tawa śni kin en iyececa, Isaak qa Jakob taku iwahoyapi qon om tawaye kte cin hena om wakeya ohna ti ece.

¹⁰ Otonwe wan taku ahde kin ahe cin he ape yanka, ticage c̣a icaḣye cin he Wakantanka kin ee.

¹¹ Wacinyanpi kin eciyatanhan, Sara iye qe cinca yuhe kta e wowaśake icu, qa wanna waniyetu ece kin sanpa hiyu tuka cinca ton, tuwe iwahoye ciqon he wicaka e awacin yanke cin heon.

¹² Heon wanjidan etanhan, qa he ṭa nun seca, tuka he etanhan wicota icaga, maḣpiya wicanḣpi kin iyenaka, qa miniwanca kahda wiyaka sukaza kin iyecen yawapica śni.

¹³ Dena owasin wacinyan ṭapi, taku iwahowicayapi qon nahaḣin icupi śni, tuka tehan tanhan wanyakapi, qa wicadapi, qa adoksohan icupi, qa maka akan oyate tokeca qa unhdaka unpi kin heca ihdaotaninpi.

¹⁴ Tona taku hececa eynpi kin hena makoce wanji akitapi e taninyan ohdakapi.

¹⁵ Unkan awicakehan makoce kin etanhan hiyupi qon he wacin en ynzapi unkanś, heciya ake ekta hdapi kta okihipi tuka.

¹⁶ Tuka nakaha wanji iyotan waśte maḣpiya ekta wanke cin hee akitapi. Heon etanhan Wakantanka hena Wakantanka tawapi kin eciyapi kta iśtece śni, qa otonwe wan wiyeya ewicakicihnaka.

¹⁷ Wacinyanpi kin eciyatanhan, Abraham, iyutanyanpi qehan, Isaak wahauśna, qa tuwe taku iwahoyapi qon wicada kin he cinhintku ecedan kin wahduśna.

¹⁸ Isaak etanhan wicoicage nitawa kin cajeyatapi kta ce, eciyapi tuka qon.

¹⁹ Wiconṭe ee kaeś etanhan Wakantanka ekicetuya okihi he wicada; qa hetanhan nakun wiyacinpi on ehdaku.

²⁰ Wacinyanpi kin eciyatanhan Isaak, Jakob qa Esa wicahdawaśte, taku u kte cin heon.

²¹ Wacinyanpi kin eciyatanhan Jakob, wanna ṭe kta hehan, Joseph cinhintku napin wicahdawaśte, qa cansagye oinkpa kin akan wocekiye eya.

²² Wacinyanpi kin eciyatanhan Joseph, wanna ṭe kta hehan, Israel cincapi kin hetanhan hdapi kte cin he caje yate c̣a, iye huhu kin aye wicaśi.

²³ Wacinyanpi kin eciyatanhan, Moses tonpi kin, hehan hunkakepi kin wi yamni hehan yan anakiḣmanpi, hokśidan watte e wanhdakapi, qa wicaśtayatapi toope kin kokipapi śni.

²⁴ Wacinyanpi kin eciyatanhan Moses wanna tanka icage c̣ehan, Pharo cunwintku cinca eciyapi kta wicada śni;

²⁵ Wakantanka taoyate kin om kakija un kte cin he hdaḣniga, qa woaḣtani woiyokipi kin he ptenyedan yuhe kta e cin śni;

²⁶ Messiya on aiapi kin he, woyuha Egupta en un kin sam iyeya wowijice tanka daka; wokajuju iyunwin kin he awacin kin heon etanhan.

²⁷ Wacinyanpi kin eciyatanhan Egupta makoce kin ayuśtan, qa wicaśtayatapi tocanniye kin kokipe śni. Tuwe wanyagpica śni kin he wanyaka se ape yanka.

²⁸ Wacinyanpi kin eciyatanhan wośnapi wohduze, qa we amnimnipi kin hena kaga, tuwe cinca tokapapi kin ihangwicaye cin he iye owicayutan kte śni heon.

²⁹ Wacinyanpi kin on Mde-śa kin he opta iyayapi, puze cin iyecen. Unkan Egupta oyate kin hecon utapi qehan, minin ṭapi.

³⁰ Wacinyanpi kin eciyatanhan Jeriko conkaśke kin makata iḣpaya, anpetu śakowin ohomni unpi qehan.

³¹ Wacinyanpi kin on, Rahab witkowinna kin, tona anagoptanpi śni kin om ihangyapi śni, makoce iwanyag hipi kin hena wookiye on iyowinwicakiye c̣ehan.

³² Qa taku sanpa epe kta he; Gideon, qa Barak, qa Samson, qa Jeptha, qa Dawid, qa Samuel, qa wicaśta wokcanpi kin owasin owicamdake kta anpetu kin iyehankeca śni.

³³ Hena wacinyanpi kin eciyatanhan wokiconze kin ohiyapi, wicoḣan owotanna oḣanyanpi, wahoyapi kin icupi, mnaja kin iohmusyapi;

³⁴ Peta wohitike cin kasnipi, maza sagye ope kin nakicipapi, wowaśake śni etanhan waśagiciyapi, okicize en waditaka ic̣icagapi, qa Ikcewicaśta ozuye kin napewicayapi.

³⁵ Winoḣinca kin cinca kiṭcapi kin ekicetuyapi ewicahdakupi. Qa wanjikji nina kakiśyapi, tuka etanhan ehdakupi kta cinpi śni, woekicetu iyotan waśte kin yuhapi kte cin heon etanhan.

³⁶ Qa wanjikji waaiapi, qa nina wicakaśtakapi kin on iyutanpi, qa nakun maza icicaḣiḣa, kaśka wicahnakapi ko on.

³⁷ Inyan on wieakinmpi, canibakse on bawicaksapi, iyutanwicayapi, mazasagye on wicaktepi; taḣinca ha qa tatokadan ha koyag manin unpi; taku owasin icakijapi, kakijapi un qa śicaya wicakuwapi.

³⁸ Hena maka kin de iyewieakicihantu śni; ḣewoskan manin unpi, ḣe kin akan, taku itu unpi otipi, qa makoḣdoka kin ohna.

³⁹ Hena owasin wacinyanpi kin eciyatanhan tanyan ihdutaninpi, qa taku wahoyapi kin ocowasin icupi śni.

⁴⁰ Wakantanka taku sam iyeya waśte unkiyepi on ehnaka, hecen hena e unkicunonpa tanhan wicahduśtanpi kte śni.