Hebrew 10 - Dakota Wowapi Wakan Kin

¹ Taku waśte u kte cin ohanzi kin he woope kin en un, qa hena atayedan taku kin ouncage kin hee śni; heon etanhan, waniyetu otoiyohi wośnapi ohinniyan aipi kin he tona en hipi kin wicayuecedan kta okihi śni.

² He okihi unkanś hena taku kin wayuśnapi ayuśtanpi kte śni he. Tona en opapi wancadan pakintapi kinhan icimana woaḣtani sdonkiyapi kte śni tuka.

³ Tuka hena on waniyetu otoiyohi woaḣtani kiksuyapi ece.

⁴ Tatanka tatokadan kici hena we kin woaḣtani yutokan iyeye kta okihipica śni.

⁵ Heon etanhan, makata hi qehan, Wośnapi, taku wicaqupi ko yacin śni, qa tancan wan miyecaga ce, eya.

⁶ Peta wośnapi, qa woaḣtani on wośnapi kin hena iyonicipi śni;

⁷ Hehan, Ito wau, wowapi tanka en miye on hecen owapi ce; Wakantanka, nitawacin kin ecen ecamon kta ce, epa.

⁸ Wankan, Wośnapi, taku wicaqupi, peta wośnapi, qa woaḣtani on wośnapi kin; woope eciyatanhan ahi wayuśnapi kin; heha yacin śni, qa iyonicipi śni, eye c̣ehan;

⁹ Hehan nakun, Wakantanka, nitawacin kin ecen ecamon kta wau ce, eye cin. Tokaheya kin he yutokan iyeya, icinonpa kin he hdusuta kte cin heon.

¹⁰ He iye tawacin kin ee on unyuecepidan, Jesus Messiya tancan wancadan wayuśnapi kin he eciyatanhan.

¹¹ Wawayuśna otoiyohi anpetu iyohi, en ohoda inajin, qa ohinniyan taku wośnapi ece kin hena ake ecekcen wayuśna, hena woaḣtani kajuju kta tokadan okihi śni.

¹² Tuka wicaśta kin de, woaḣtani on wośna wanjidan wahduśna, hehan Wakantanka etapa kin eciyatanhan owihanke wanin kiyotanka;

¹³ Qa hetanhan tona toka yapi kin hena owasin iye siha kin ihukun iyewicayapi kta ape yanka.

¹⁴ Wośnapi wanjidan on etanhan tona wicayuecepidan kin hena owihanke wanin wicahduśtan.

¹⁵ Woniya Wakan kin he nakun unkiciyaotaninpi; tokaheya eye ciqon he iyohakam;

¹⁶ Anpetu kin hena iyohakam, wicotakuye wicawecage kte cin he dee kta, Itancan kin eya; Mitoope kin hena iye cantepi kin en wicawaqu kta, qa tawacinpi kin en owakiwa kta;

¹⁷ Qa iye waḣtanipi, taku ecinśniyan econpi ko, icimana weksuye kte śni.

¹⁸ Hena owasin kajujupi kinhan, woaḣtani on wośnapi kin wanice kta.

¹⁹ Heon, mihunkawanji, Jesus we kin eciyatanhan tipi iyotan wakan kin en waditagya unyanpi kte;

²⁰ Canku wan teca qa ni un, ti cokaya hnakapi, iye ceḣpi kin hee, ohna unkicagapi kin he eciyatanhan.

²¹ Qa Wakantanka ti kin ohna Wawayuśna Itancan wan unhapi;

²² Heon cante wicake ḣinca hduha śogya wacinunyanpi qa ikiyedan unkupi kta, wicanagi śice cin etanhan uncantepi kin unkamnimnipi;

²³ Qa mini ska kin on untancanpi kin unyujajapi; qa wacinunyanpi unhdaotaninpi kin he yuhohupi śni unhduhapi kta; tuwe wahounyanpi kin he wacinyepica:

²⁴ Qa otoiyohi awaunkicicinpi kte, wacantkiyapi, qa wicoḣan waśte en iyounkicipaśtakśpi kte cin heon.

²⁵ Qa wanjikji econpi kin iyecen mniunkiciyapi ece kin he unkayuśtanpi kte śni; tuka wahokonuhkiciciyapi kta; qa anpetu kin he kiyadan u wandakapi kinhan, sanpa nina ecanonpi kta.

²⁶ Wowicake sdonyapi kin unkicupi kin he iyohaham iyokipiya waunḣtanipi kinhan, woaḣtani on wośnapi kte cin wanica.

²⁷ Tuka woyaco inihanyan apepi kin he, qa wocanniye ide kin, tona tokayapi kin hena ihangwicaye kta.

²⁸ Tuwe Moses toope kin akta śni, nonpa qa iś yamni yaotaninpi kinhan, he onśidapi śni ṭa ece;

²⁹ Hecen tuwe Wakantanka Cinhintku we kin amani, qa wicotakuye we kin on yuecepidan qon he wakan śni dake c̣a, Wowaśte Woniya kin he taku i en hiyeye cinhan, he wokakije iyotan tanka hiyahde kte śni kecannipi he.

³⁰ Tokic̣onpi kin he mitawa, towicawecic̣on kta ce, Itancan kin eya ce, tuwe eye ciqon he sdonunyanpi. Qa ake, Itancan taoyate kin wicayaco kta ce.

³¹ Wakantanka ni un nape kin en ohinhpayapi kin he wokokipe.

³² Anpetu tokaheya kin kiksuya po, hena en iyoyamniyanpi, qa hehan wicokakije okicize tanka wan iyahdeniciyapi.

³³ He icunhan waaiśpi, wicokakije ko on iwanniyakapi kta enihdepi; qa nakun tona hecawicakiconpi kin hena tawaśi wicayayapi.

³⁴ Miye makaśkapi kin icunhan onśimayakidapi, qa woyuha duhapi qon nicipi kin he on widuśkinpi, maḣpiya ekta woyuha iyotan waśte ohinniyan ye kte cin he duhapi sdonyakiyapi kin heon etanhan.

³⁵ Wadinitakapi qon he ayuśtanpi śni po, he woyuha tanka okihi kta.

³⁶ Wacinnitankapi kta iyececa; hecen Wakantanka tawacin kin ecen ecanonpi kinhan, taku iwahounyanpi kin he iyacupi kta.

³⁷ Wanna aśkadan tuwe u kte cin he hi kta, qa yutehan kte śni.

³⁸ Tuwe owotanna un kin he wacinyan un kin on ni kta. Tuka tuwe namni kinhan he minagi kin iyokipi kte śni ce.

³⁹ Tuka tona wicotakuni śni ekta icicawin hdapi kin heuncapi śni; tona wacanagi ni kta e on wicadapi kin hena unkiyepi.