Hebrew 1 - Dakota Wowapi Wakan Kin

¹ Ehanna, Wakantanka toktogye, otakiya wicaśta wokcan kin eciyatanhan hunkake wicunyanpi kin wowicakiyake ciqon, he, anpetu ehake kin dena icunhan, iye Cinhintku kin eciyatanhan wounkiyakapi;

² He on woicage kin owasin kage c̣a, he taku owasin tawaye kta e ehde:

³ He iye towitan okitanin, qa ouncage okagapi ḣince cin hee, iye towaśake oie kin on taku owasin hduha yanka, he iś iye eciyatanhan waunḣtartipi wopakinte kage c̣ehan, Taku iyotan tanka wankan yanke cin he etapa kin en kiyotanka.

⁴ He iye caje wan maḣpiya ohnihde kin isanpa waśte aiḣpeyapi qa yuhe cin, he iyecen sam iyeya waśte.

⁵ Micinkśi kin he niye, anpetu kin de cinca cicaga ce, maḣpiya ohnihde kin tukte wanji eciya he. Qa ake, He atemaye kta, qa miye cinkśiwaye kta ce.

⁶ Unkan, tokapa kin he wicoicage kin ekta hiyuye c̣ehan hecen eya, Wakantanka ohnihde wicaye cin owasin he itokam canpeśka makehde enajin kta ce.

⁷ Qa maḣpiya ohnihde kin hena on kaken eya, He tateyanpa kin ohnihdeye c̣a, peta ide kin wowidakeya ece.

⁸ Tuka Cinhintku kin heciya, Wakantanka, oiyotanke nitawa kin he owihanke wanica; nitokiconze mazasagye kin he mazasagye owotanna;

⁹ Woowotanna waśteyadake cin heon Wakantanka, nita Wakantanka kin, tona nitawaśi kin hena isanpa wowiyuśkin wihdi on sdaniyan ce.

¹⁰ Qa, Itancan, otokahe ekta maka ahe cin eyahde, qa ninape kage cin maḣpiya kin hee;

¹¹ Hena yutakuni śni aye kta, tuka niye ecen yaun; owasin onḣoḣda wan iyecen kuke kta;

¹² Qa śina wan iyecen pehan eyahnake c̣a, hecen yutokecapi kta; tuka niye okonniwanjidan, qa waniyetu nitawa kin owihanke kte śni ce.

¹³ Tuka ohnihdewicaye cin tukte wanji e, Mietapa kin en iyotanka wo, tona toka niyanpi kin hena nisiha woahe kin en ewicawahnake kta ce, eciya he.

¹⁴ Hena owasin taku wakan wawokiya, tona wiconi aiḣpewicayapi, qa tawapi kte cin hena owicakiyapi kta e u wicaśipi qon hena eepi śni he.