Galatia 6 - Dakota Wowapi Wakan Kin

¹ Mihunkawanji, wicaśta wan ihnuhanna taku śica en iyoḣpaye cinhan, niye tona owotanna yannpi kin woksape wowaḣbayedan yuha wicaśta kin he ake piya opeya maniya po; qa awanihdaka wo, okinni taku wawiyutanyan un kin en niu nun ce.

² Otoiyohi waqinpi kin kicic̣in po, hecen Messiya toope kin tanyan eoetu yayapi kta.

³ Tuwe taku śni un eśta, taku ic̣ida kinhan, he icihnayan.

⁴ Tuka otoiyohi iye oḣan kin awakicin kta, hecen iye qe eciyatanhan, qa tokan tanhan śni, tyuśkin kta.

⁵ Otoiyohi waqinpi tawa kin kicin kta.

⁶ Tuwe wicoie kin eciyatanhan onspekiyapi kinhan, he waonspekiye cin taku waśte kin owasin etanhan okinikiya nunwe.

⁷ Ihnuhan nihnayanpi kin; Wakantanka uncapi kte śni ce. Wicaśta kin taku oju kinhan, he yukse kta ce.

⁸ Tuwe iye ceḣpi kin wokiciju kinhan, he wicaceḣpi kin etanhan wicotakuni śni mnaye kta; qa tuwe Woniya kin wokiciju kinhan, he Woniya kin eciyatanhan wiconi owihanke wanica mnaye kta.

⁹ Taku waśte econ unkapinpi śni nunwe; hu unstakapi śni kinhan tohantu kte cin mnaunyanpi kta.

¹⁰ Heon tohanyan unkokihipi kinhan, wicaśta owasin taku waśte ecawicunkiconpi kta, qa wacinyanpi tiyohnaka kin hena iyotan.

¹¹ Wowapi hinsko tanka miye minape on cicagapi e wandakapi.

¹² Tona wicaceḣpi ekta waśte ihdutaninpi cinpi kin hena banic̣iḣdayapi kta cinniciyapi, Mesaiya can susbeca tawa kin on śicaya kuwapi kte śni kin heon heconpi.

¹³ Tona bakiḣdayapi kin hena e qe nakun woope kin tanyan yuhapi śni, tuka banic̣iḣdayapi kta cinpi, niceḣpipi kin on iwinktapi kta heon.

¹⁴ Tuka takudan on imawinkta śni nunwe, Jesus Messiya Itancan unkiyapi ean susbeca tawa kin hecedan on, he on miye ekta wicoicage kin icipaweḣ okatanpi, qa wicoicage kin ekta icipaweḣ omakatanpi.

¹⁵ Jesus Messiya en bakiḣdayapi kin he takudan okihi śni, qa bakiḣdayapi śni kin he nakun, tuka wicaśta teca kin.

¹⁶ Tona woope kin de eciyatanhan manipi, Israel Wakantanka tawa wicaye cin hena ko, wookiye, wowaunśida ko, wicakici unpi nunwe.

¹⁷ Detanhan tuwedan nagiyemaye śni nunwe; Jesus Messiya towapetogton kin mitancan kin en yuha waun.

¹⁸ Mihunkawanji, Jesus Messiya Itancan unkiyapi towaonśida kin ninagipi kin kici un nunwe. Amen.