Galatia 5 - Dakota Wowapi Wakan Kin

¹ Hecen tawaic̣iyapi kin on Messiya tawaic̣iye unyanpi kin he en ṭinsadan un po, qa ake wowidake yapi wanapin kin on iyaihdaśkapi śni po.

² Wanyaka po, Palos he miye e kaken eciciyapi; Banic̣iḣdayapi kinhan Messiya takudan on oniciyapi kte śni ce.

³ Wicaśta bakiḣdayapi kin otoiyohi kaken ewakiya ece; Woope kin ocowasin econ kta iyececa tuka ce.

⁴ Tona woope kin on niyaowotanpidan keniciyapi kin wanna Messiya eḣpeyayapi, qa wowaonśida etanhan nihinḣpayapi kin.

⁵ Unkiye Woniya kin eciyatanhan wicoowotanna woape kin wacinyanpi on unkapepi ece.

⁶ Jesus Messiya en bakiḣdayapi kin he takudan okihi śni, qa nakun bakiḣdayapi śni kin; tuka wacinyanpi wowaśte en oḣanye cin he taku okihi ece.

⁷ Tanyan yainankapi; tuwe iyoncipi śni kin, hecen wowicake kin wicayadapi kte śni he.

⁸ Woawacin kin de tuwe nicopi kin eciyatanhan u śni.

⁹ On napoḣyapi cistinna kin he aguyapi ocowasin napoḣya.

¹⁰ Itancan kin eciyatanhan wacinciyapi, takudan tokeca awacanipi kte śni; qa tuwe kaśta nagiyeniyanpi kinhan he woyaco hduhe kta.

¹¹ Mihunkawanji, miś miye bakiḣdayapi kin ieyanwapaha kinhan tokeca e śicaya makuwapi he; kinhan, can susbeca iwośihda kin he enakiyapi tuka.

¹² Tokin tona cante okic̣unin niyanpi kin hena yudpa iyewicayapin.

¹³ Mihunkawanji, tawaiciyapi kin en nicopi, tuka tawaiciyapi kin he wicaceḣpi iyokipi kta e wowinyunyanpi śni po; tuka wowaśte on otoiyohi okiciciya po.

¹⁴ Woahope kin ocowasin wicoie wanjidan en ecetu, he dee, Niś niye inihdacinyan wicaśta aiyog yaun kin canteyakiye kta ce.

¹⁵ Tuka yecidahtakapi qa temyeciyapi kinhan, on wakta po, okinni ihangye ciyapi kta naceca.

¹⁶ Miye kaken epe; Woniya kin on mani po, hecen wicaceḣpi on cantiheye cin yahduśtanpi kte śni.

¹⁷ Wicaceḣpi kin he Woniya kin inakiwizi, qa Woniya kin iś wicaceḣpi kin inakiwizi, qa henaozakiya anokatanhan kicizapi, hecen taku token yacinpi śni kin hena ecanonpi ece.

¹⁸ Tuka Woniya kin yus aniyanpi hecinhan, woope kin ihukuya yaunpi śni.

¹⁹ Wicaceḣpi wicoḣan kin taninyan un; Wawiciḣaḣapi, wiinaḣmanpi, waaśapapi, wicaśtapi śni;

²⁰ Wakagapi kin ohodapi, wapiyapi, śice kicidapi, wakinicapi, wawihnupi, wacantahdepi, wicokicize, wawakipajinpi, yuomdecapi,

²¹ Winawizipi, tin wicaktepi, witkopi, qa witkoya wacipi, qa taku tona hecece cin hena ee; wanakaja ociciyakapi kin he iyecen nakaha eciciyapi, Tona taku hececa econpi kin hena Wakantanka tokiconze kin tawapi kte śni.

²² Tuka Woniya kin waskuyeca tawa kin he, wowaśtedake, wowiyuśkin, wookiye, wacintankapi, wicowaḣbayedan, wowaśte, wowacinye;

²³ Wicotawacin waśte, qa iyatahde ic̣iyapi śni hena ee; qa taku hecece cin woope kin tuktedan iyamya un śni.

²⁴ Unkan tona Messiya tawa wicaye cin hena wicaceḣpi kin icipaweḣ okatanpi, qa wacinyuzapi cantiheyapi koya.

²⁵ Woniya kin unkicinipi kinhan, Woniya kin unkopapi kta.

²⁶ Otoiyohi śihdakiciyapi, qa winakiciwizipi, qa ecinśniyan iwinkta ic̣iyapi wanin unyakonpi nunwe.