Galatia 4 - Dakota Wowapi Wakan Kin

¹ Unkan kaken epa; Tawaye kte cin tohanyan hokśiyopa un kin hehanyan wowidake kin takudan ocitpani śni, taku owasin on itancan un eśta.

² Tuka tohan Atkuku ke cin hehanyan waonspekiye c̣a tipi awanyag wicakiyapi kin bena he yuhapi.

³ He iyecen unkiś eya hounkśiyopapi qehan, wicoicage woonspe tokaheya kin ihukuya unyakonpi.

⁴ Tuka wanna anpetu iyehantu qehan, Wakantanka iye Cinhintku kin u śi, winoḣinca wan etanhan icage c̣a woope kin oḣdateya kagapi.

⁵ Hecen tona woope kin ihukuya un kin hena opewicakiton kta, atayedan cinhintkuyapi kin unhapi kte cin heon etanhan.

⁶ Unkan cinkśiniyanpi kin heon Wakantanka iye Cinhintku Taniya kin nicantepi kin en niu śipi, he, Abba, Ate, eya howaya ece.

⁷ Hecen wowidake kin henica śni, tuka cinhintku kin henica. Qa cinhintku hecinhan, Messiya eciyatanhan Wakantanka ekta tawaye kte cin heca.

⁸ Tuka Wakantanka sdonyayapi śni qehan, taku wakan śni kin hena wowidag niyanpi.

⁹ Unkan nakaha Wakantanka sdonyayapi, qa iś Wakantanka sdonniyanpi yaunpi kin, hecen token ake taku tokaheya hunkeśni qa takudan okihi śni un kin ekta nihdohdapi, qa hena ake wowidag niyanpi kta yacinpi he.

¹⁰ Anpetu qa wi kin, omaka waniyetu ko awacanipi.

¹¹ Kocicipapi, taku śni on niyepi kin ḣtacicinipi epca, heon etanhan.

¹² Mihunkawanji, ceciciyapi ce; Miś waun kin iyecen un po; niye yaunpi kin iyecen waun, taku śica takudan ecamiyeconpi śni.

¹³ Tokaheya ekta wicaceḣpi waśake śni on wotanin waśte kin ociciyakapi kin he sdonyayapi.

¹⁴ Qa miceḣpi en taku iyutanmaye cin he śiceyadapi śni, qa paha iyeyayapi śni, tuka Wakantanka ohninde ye cin iyecen, qa Jesus Messiya iyecen tin ye mayaśipi.

¹⁵ Hecen wowaśte duhapi qon tukte e he. Kaken ciyaotaninpi, okihipica unkanś niiśtapi kin yahduśdokapi qa mayaqupi kta wicayadapi kta tuka.

¹⁶ Wowicake ociciyakapi kin heon toka mayayapi he.

¹⁷ Hena e tanyan canteniciyuzapi seca, tuka he taku waśte on etanhan śni, ḣeyata iyeunyanpi kta cinpi, hecen niye tanyan cantewicayakiyuzapi kta.

¹⁸ Tuka ohinniyan taku waśte on tanyan canteyuzapi kin he waśte, qu niyepi ekta waun kin hecedan śni.

¹⁹ Micinca, niyepi kin en Messiya icaḣyapi kte cin heon ake hokśiksuya waun.

²⁰ Niyepi kin on, token wacin mduza tanin śni, heon nakaha ekta cicipi waun qa miho kin wahdatokeca kta wacin.

²¹ Tona woope ihukuya yaunpi yacinpi kin, woope kin nayaḣonpi śni hecinhan omakiyaka po.

²² Wowapi en hecen kagapi; Abraham cinhintku nonpa, unma wowidake winoḣinca etanhan, qa unma iś winoḣinca tawaic̣iye cin etanhan.

²³ Tuka wowidake winoḣinca etanhan un kin he wicaceḣpi eciyatanhan tonpi, qa tawaiciye cin etanhan un kin wahoyapi kin on tonpi.

²⁴ Hena e wiyacinpi wan ee; qa wicotakuye nonpa kin heepi. Unma Sinahe kin etanhan u, he wowidag yapi kaga, Hagar hee.

²⁵ Qa Hagar he Arabia ekta Sina ḣe kin hee, qa Jerusalem wanna he cin kici akidecen un, qa cinca kici wowidake un.

²⁶ Tuka Jerusalem wankan tanhan u kin he tawaiciya, he owasin ina unyanpi kin ee.

²⁷ Hecen wowapi en kagapi; Cinca oyakitpani qa cinca ton śni yaun kin iyuśkin wo; tohinni hokśinyaksuye śni kin panpan qa dowan wo; tuwe iśnana un kin he cinca ota, qa hihnaton kin he cinca tonana.

²⁸ Mihunkawanji, Isaak iyecen wahoyapi cinca kin heuncapi.

²⁹ Tuka he ehan tuwe wicaceḣpi eciyatanhan tonpi kin he Woniya eciyatanhan un kin he śicaya kuwa qon, iś eya dehan iyececa.

³⁰ Tuka Wowapi wakan kin token eya he; Winoḣinca wowidake un kin cinca kici tankan iyeya wo; wowidake un cinca kin he tawaiciya cinca kin kici akidecen tawaye kte śni.

³¹ Hecen mihunkawanji, wowidake un cinca kin ee śni, tuka tawaic̣iya cinca kin unkiyepi.