Galatia 3 - Dakota Wowapi Wakan Kin

¹ Galatia wicaśta wacin tonpi śni kin, tuwe niyuhnaśkinyanpi, qa hecen wowicake kin anayagoptanpi kte śni he; niyepi kin en Jesus Messiya icipaweḣ okatanpi kin he niiśtapi kin itokam yuotaninpi.

² Decedan omayakidakapi kta wacin, woope wicoḣan kin on, qa wacinyan anagoptanpi kin, unma tukte eciyatanhan Woniya kin iyaeupi he.

³ Tokaheya Woniya kin on ecanonpi, qa ehake wicaceḣpi kin on nihduśtanpi kta he, qa wacinyatonpi kte śni.

⁴ Kana owasin taku śni on iyotanhan iyeyakiyapi he; he taku śni on etanhan hecinhan.

⁵ Tuwe Woniya kin yuhe niciyapi, qa niyepi en tankaya oḣanye cin he woope wicoḣan kin on, qa wacinyan anagoptanpi kin unma tukte eciyatanhan he.

⁶ Hecen Abraham Wakantanka wicada, unkan he woowotanna kiciyawapi qon.

⁷ Heon etanhan, tona wacinyanpi kin en opapi kin hena Abraham cincawicaye cin eepi, he sdonya po.

⁸ Wacinyanpi kin on Wakantanka Ikcewicaśta kin wicayaowotanna kte cin, he Wowapi wakan otokaheya tanhan wanyake c̣a, hecen tokaheya Abraam wotanin waśte kin okiyaka; Niye en oyate kin owasin wicayawaśtepi kta ce.

⁹ Hecen tona wacinyanpi kin hena Abraham wacinye ciqon kici wowaśte yuhapi.

¹⁰ Tona woope wicoḣan kin etanhanpi kin hena woyaco kin en unpi. Hecen wowapi en kagapi; Tona taku woope wowapi kin en kagapi kin owasin opeya unpi śni, qa ecen econpi śni kin hena otoiyohi wanna wicayacopi ce.

¹¹ Unkan woope kin eciyatanhan tuwedan Wakantanka itokam yaowotanpi śni e sdonunanpi: Tona owotanna un kin ena wacinyanpi eciyatanhan nipi kta ce.

¹² Unkan woope kin he wacinyanpi kin eciyatanhan śni; tuka, Wicaśta kin tuwe hena econ kinhan, hena on ni kta ce.

¹³ Woope woyaco kin etanhan Messiya eunhdakupi, unkiyepi on iye woyaco ikicaga. Wowapi en hecen kagapi, Tona can en otkeyapi kin hena owasin yacopi ce.

¹⁴ Hecen Jesus Messiya eciyatanhan Abraham wowaśte tawa kin he Ikcewicaśta kin en awicau kta; hecen wacinyanpi kin on Woniya iwahounyanpi kin he unkicupi kta.

¹⁵ Mihunkawanji, wicaśta akantu iyecen iwaa. Wicaśta akantu wicotakuye tawa kin hee kaeś, wanna hduśtanpi kinhan, tuwedan hdujuju śni, qa taku en akage śni ece.

¹⁶ Abraham iye cinca kici wahoyapi; Cincapi kin eye śni, hehan ota kapi kta, tuka wanjidan, qa, Nicinkśi kin, he Messiya kin ec.

¹⁷ Unkan miś kaken epe kta; Otokahe ekta wicotakuye Messiya en Wakantanka hdusuta kin he, iyohakam waniyetu opawinge topa sanpa wikeemna yamni ehan woope u kin he tokaheya kin yujuju, qa hecen wahoyapi qon ecetuśniye kta okitpani.

¹⁸ Taku tawapi kte cin he woope eciyatanhan un unkanś, wahoyapi kin eciyatanhan śni; tuka he Wakantanka Abraham iwahoya.

¹⁹ Hehan tokeca e woope kin yukan he. He woaḣtani on kagapi, cinca iwahoyapi qon u śni kin hehanyan, qa ohnihdewicayapi kin on yusutapi, iyotahedan un wan nape kin ohna.

²⁰ Iyotahedan un kin he wanjidan eciyatanhan śni, tuka Wakantanka eqe wanjidan.

²¹ Heon woope kin he Wakantanka taku iwahowicaye cin he kaśeya he. Hiya hecetu śni. Woope wiconi kaga okihi unkanś, awicakehan woope kin eciyatanhan wicoowotanna u kta tuka.

²² Tuka Wowapi Wakan kin he owasin woaḣtani oḣdateya un wicayawa, qa hecen tona wicadapi kin hena, Jesus Messiya wacinyanpi wahoyapi qon he wicaqupi kta.

²³ Wowacinye kin hi śni itokam woope kin on unkaśkapi; qa wowacinye yuotaninpi kte cin en onauntakapi.

²⁴ Hecen woope kin he wayeunkiyapi kin hee, Messiya en unkahipi kta, hecen wowacinye on unyaowotanpi kta e heon.

²⁵ Tuka wowacinye kin wanna hiyohi, hecen wanna wayekiyapi kin ihukuya unyakonpi śni.

²⁶ Jesus Messiya wacinyanpi kin eciyatanhan owasin Wakantanka cinca kin heuncapi.

²⁷ Tona Messiya caje on baptem nic̣upi kin hena Messiya kodakapi.

²⁸ He en Juda qa Helenes wicaśta ko wanica; wowidake un tawaic̣iya ko wanica; wica winyan ko wanica; tuka Jesus Messiya ekta owasin okonniwanjipidan.

²⁹ Messiya tawa niyanpi hecinhan, Abraham cinca kin henicapi, qa wahoyapi kin eciyatanhan tawayapi kte cin.